Ohongele yofeka yunyamo 2020, ya kala ocina cimue cilikasi tu ka ivaloka—momo koluali luosi oyo ohongele yetu yatete yofeka ya lingiwa okuti, ya ngalavaliwa kuenda ya sandekiwa vo Internet! Kuenje ko Malawi kuenda ko Moçambique, valua pokati ka vamanjetu, va tala loku yevelela ohongele yaco okuti, ka va talavayele lo Internet. Va ci linga ndati?

 Ocimunga Casongui kuenda Ocimunga Celongiso Yosungu Yolombangi Via Yehova, via ecelela okuti, ohongele yofeka yi lekisiwa vovingungu vio televisãu kuenda oku yevalisiwa vo Radiu ko Malawi lo kofeka yo Moçambique. Momo lie kua lingiwila eliangiliyo liaco? Olondando vimue vio Internet ko Malawi, via tĩlapo vali okuti kolonepa vikuavo violuali ci sule, kuenje Olombangi vimue Via Yehova ovo lika va kuete epondolo lioku kuata o Internet. Ndeci, William Chumbi, o panga onepa Kocisoko Cakulu vo ko Betele yo Malawi wa popia hati: “Ovingungu vio Radiu levi vio televisãu, ovio lika ovimalẽho via ecelela oku eca okulia konepa yespiritu ku vamanjetu.” Luka Sibeko, o pangavo onepa Kocisoko Cakulu vo ko Betele yo Malawi wa vokiyako ndoco: “Nda ka tua tambuile okulia kuaco pocakati co televisãu kuenda o Radiu, vamanji vamue ovo lika nda va kuatisiwa lohongele yaco yofeka vocikanjo cofiliale yetu.” Ko Moçambique vamanji vamue, nda ka va kuatelevo epondolo lioku landa ovimalẽho vi va kuatisa oku tala ohengele yaco ca piãla enene o Internet yaco.

 Omo liefengi lio COVID-19, ovingungu vimue vio televisãu kuenda vio Radiu, via siata ale oku lekisa loku yevalisa olohongele vietu viekongelo. a Vamanjetu va endele kovingungu viaco oku ka pinga oco ku vokiyiwe vali otembo yoku lekisa loku yevalisa ohongele yofeka.

 Vamanjetu ko Malawi, va liyaka lovitangi vimue. Olonjanja vimue, ovingungu viasapulo, vi ecelela okuti, vana va sandiliya ovopange aco va eceliwa owola yimosi. Momo va kuete ovisimĩlo viokuti, nda ocipama caco ci tumãla otembo yalua, ka ci vetiya olonjeveleli. Pole, vamanjetu va lombolola okuti, upange wetu u kuatisa omanu vosi. Ndaño muẽle vekalo tu sangiwa cilo, tu kasi oku eca komanu epuluvi lioku yeva olondaka viwa vi lembeleka Viembimbiliya, vina vi pondola oku va kuatisa oku kala olonungi viwa kuenda oku kuata esanju vepata. Vakuavingungu viaco eci va yeva olondaka evi via vamanji, va tava oku vokiyako otembo yoku lekisa loku yevalisa ohongele.

 Ovingungu vio televisãu kuenda vio Radiu vio ko Malawi, via ecelela okuti, ohongele yofeka yi lekisiwa loku yevalisiwa komanu valua vofeka yaco. Ko Moçambique, ohongele yofeka ya lekisiwa vovingungu vimue vio televisãu kuenda ya yevalisiwa kueci ci soka 85 kovingungu vio Radiu.

 Kolofeka viaco vivali, kovingungu vio televisãu kua fetiwa 28.227 kolondolale b kuenda ci panda 20.000 kolondolale via fetiwa kovingungu vio Radiu. Ondando ya fetiwa kovingungu vio Radiu ya litepele ndeci, kua fetiwa 15 kolondolale kovingungu violuvumba kuenda 2.777 kolondolale kovingungu viocivanja cofeka.

 Vamanjetu va likolisilako calua oku talavaya ciwa lolombanjaile vietu. Ndeci, ko Malawi, ovo va pinga oco ovingungu viasapulo vi tepulule ondando yaco okuti, ci tẽla 30 kolopursentu. Voku tepuluiwa kuolondando viaco, kua supa 1.711 kolondolale. Ko Moçambique, ovingungu vimue viasapulo via tepulula olondando viavo omo liovituwa viwa tua siata oku lekisa vioku kala vakuacili kuenda oku feta votembo ya tukuiwa.

 Vamanjetu, va sanjukila calua oku tala loku yevelela ohongele yofeka pocakati covingungu vio vofeka yavo. Ukulu umue wekongelo kofeka yo Malawi o tukuiwa Patrick, wa popia hati: “Tu eca olopandu ku vamanji va panga onepa Kosungu Yolombangi Via Yehova omo liovina viosi va siata oku tu lingila vokuenda kuefengi.” Isaac wo ko Malawi, wa popiavo hati: “Omo okuti ka tu kuete ovimalẽho vikuavo, tua sanjukila aliangiliyo alikasi ocisoko ca Yehova ca linga, oco tu yevelele ohongele yofeka pocakati co Radiu. Omo lieliangiliyo liaco, epata liange liosi, lia kuatisiwa lohongele yofeka. Tua limbuka uvangi wocisola Yehova a kuetele afendeli vaye.”

 Ohongele yofeka yunyamo 2020, oyo ya kala ohongele yatete yofeka yukundi umue ko Moçambique. Eye wa popia hati: “Eliangiliyo lioku tala ohongele yofeka vo televisãu, lia ndi ivaluisa okuti, Yehova eye Suku ukuonene wosi. Efengi ka lio tatekele oku tu ĩha okulia ku pamisa ekolelo lietu loku u fendela vohondo yange yoku kala lakombe. Nda mola uvangi wocisola ci kasi pokati kafendeli va Yehova. Nda limbukavo okuti, eli olio etavo liocili.”

 Ukulu umue wekongelo o tukuiwa okuti Wyson wa popia hati: “Ngeca olopandu omo lionjila ukuenje wa kolelua a siata oku tu tata vokuenda kuefengi. Eliangiliyo eli lioku tala ohongele yofeka vo televisãu kuenda oku yi yevelila vo Radiu, lia tu kuatisa calua etu tu kasi oku liyaka locitangi cekambo liolombongo konepa yilo yoluali okuti kuli uhukũi walua, pole, tua tambula ocipama caco loku kuatisiwa laco.”

 Catiamẽla kohongele yofeka yunyamo 2021, Ocimunga Casongui Locimunga Celongiso, ca eca vali epuluvi liokuti, ohongele yofeka yi pitiyiwa vo televisãu kuenda vo Radiu kolonepa via nõliwa. Kua fetiwa ndati olombongo vioku pitiya ohongele yofeka? Pocakati colombanjaile via lingiwa voluali luosi okuti, via eciwa volonjila via liyekala vi sangiwa vonumbi donate.pr418.com. Tu pandula calua omo liolombanjaile viene wa siati oku eca lutima wosi.