Ocina cimue Olombangi Via Yehova via lavoka calua unyamo ulo, oku sandekiwa Kuonepa 1 yovideo losapi, Olondaka Viwa Viatiamẽla ku Yesu. Olohuluwa vialua viomanu via mõla ovideo yaco. Eyi oyo ovideo yatete yolonepa 18! Upange upi vamanji alume kuenda akãi va kasi oku linga oco tu kuate olonepa vikuavo kuenda nye o sukila oku linga oco o va kuatise kupange waco?

 Onepa yalua yovideo losapi Olondaka Viwa, yi kasi oku ngalavaliwila ko filiale yo ko Australasia, ci soka 50 toke 80 komanu va kasi oku kuatisa osimbu olonepa viaco vi ngalavaliwa. a Vamanji alume kuenda akãi va pongiya onanya, ondalelo kuenda ovikulia vikuavo. Osimbu ka va telekele, va pita otembo yalua loku sokiya okulia ku sukiliwa. Manji Esther o talavaya Voseketa Yoku Landa Okulia, wa lombolola ndoco: “Tu landa ovikulia komanu va litepa oco tu kuate ovina viwa via litepa vondando ya sunguluka. Kuenda olonjanja vialua, tu linga epongoloko kesokiyo lietu oco ovikulia vimue ka vi ka nyõlehe.” Eteke olio eteke, tu pesela eci ci soka olondolale vikuãla kokulia kuomunu lomunu.

 Ocimunga cetu ka ci sukila lika okulia pole, ci sukilavo eteyuilo. Eteyuile konepa yipi? Ko Australia, kuli oloneke vimue okuti ku linga owuya walua kuenda utanya walua. Oco vamanji vosi va teyuiwe kowuya waco, ku tungiwa olombalaka kuenda ovitumãlo vikuavo omanu va pondola oku puyukila, oku kapa ulela woku litukusa u teyuila kutanya, olosapilinyu kuenda ovava oku nyua. Manji Kevin o talavaya koseketa yo Audio/Video, wa lombolola ndoco: “Valua pokati ka vamanji va kuatisa kupange waco, vana va talavaya ko Betele okuti, va linga ungende oloneke viosi. Ovo va linga upange owu, lovopange akuavo lumbombe kuenda lesanju. Etu nda ka tua tẽlele oku linga upange waco nda ka ca kaile lekuatiso liavo.”

 Olonepa vimue ka citava oku vi ngalavalela vo Betele, ndeci vokati ale vohondo yoku ngalavalela. Omo liaco, oco olonepa viaco vi ngalavaliwe, ci sukila oku enda kovitumãlo vikuavo. Oco ku ngalavaliwe ovolandu Embimbiliya kovitumãlo kuna ka kuli olusu, atapalo awa kuenda olonjo, vamanji va ka ngalavala kuenda vana va kuatisa, va sukila oku enda kovitumãlo viocipãla. Ci sukila okuti, umue o longeka ovina viosi vi sukiliwa, oku viambata kuenda oku vi soleka lutate pocitumãlo coku ngalavalela. Osimbu oku ngalavala ka kua fetikile, vamanji va songuila upange woku ngalavala, va kũlĩhĩsa nda kuli ologerador, ovava oku nyua kuenda olokalete. Ocimunga ca vamanji va linga upange woku ngalavala va sikĩla kolonjo via vamanji, volowotele ale volombalaka.

 Oku ngalavalela kocitumãlo caco, ci sukila olombongo vialua, cambata otembo yalua kuenda ci kavisa calua vana va linga upange waco. Kuenje kunyamo 2023, Osungu Yolombangi Via Yehova ya tava okuti ku landiwa ocimãno cimue coku ngalavala olovideo londando yi soka 2.5 kolohuluwa violondolale okuti, noke yoku ngalavala olovideo vi molẽha ndu okuti, ove o kasi kocitumãlo cikuavo. Uloño waco, u kuatisa oku lekisa ovideo lonjila yimue okuti oviluvialuvia vi molẽha ciwa kuenda ocinyi ci likuata lovina vi lekisiwa vovikete, oco ci kaile ndu okuti ovideo yi kasi oku ngalavaliwa. Onima yeyililako yeyi yokuti, ka tu pesela olombongo vialua poku ngalavalela pocitumãlo caco. Manji Darren o panga onepa Kosungu Yakulu vo ko Betele ko Australasia, wa lombolola ndoco: “Oku ngalavala locimãno caco, ci tepulula ekavo lia vamanji va kasi oku linga upange waco kuenda cecelela okuti ocimunga ci linga upange waco ci pitulula olonepa vimue. Ndeci, nda tu ngalavalela voluayela, tu pondola oku ngalavala vakukutu atito ocinyi cekumbi osimbu ka lia iñilile. Pole, poku talavaya locimãno coku ngalavala olovideo, cecelela oku pitulula ocinyi cekumbi toke tu kuata elitalatu tu yongola.”

 Oco ku ngalavaliwe ovideo losapi, Olondaka viwa, ca sukilile vamanji valua. Ovo va liyevite ndati omo lialikolisilo osi a lingiwa oku va tata?

 Manji Amber, wa linga ungende weci ci pitãla 700 kolokilometulu oku tunda konjo yaye ko Melbourne, oco a ka kuatise kupange waco wa soneha ndoco: “Tunde eci nda pitĩla kocila colombalãu, vamanji vo ko Betele va nãmbula ciwa. Vamanji valua va ndi laleka oku lilila kumosi lavo. Pocitumãlo cupange vamanji va ñuatisa oku liyeva okuti nda kolapo kuenda ndi soliwe. Nda tambula asumũlũho alua vokuenda kungende wange. Ka ca molẽhe ndu okuti elikolisilo limue!”

 Manji Derek o talavaya vocimunga co Audio e Video wa soneha ndoco: “Tunde kefetikilo oloseketa vialua via siata oku tu kuatisa. Mandula calua vamanji ndi kasi lavo omo va siata oku likolisilako, omo lioku talavaya ciwa lotembo yavo, ovipako kuenda ongusu oco va kuatise kupange waco. Ovo va kuatisa, valieya olumue kuenda vakuahenda. Ocili okuti, Yehova wa siata oku tu sumũlũisa vosi yetu. Nda limbuka okuti eye ka li sakalaisa lika lonima yupange wetu, pole, wa kapakovo onjila ndomo upange wetu u lingiwa.”

 Tu eca olopandu omo liekuatiso wa eca kupange woku ngalavala olonepa viovideo eyi poku eca olombanjaile viove, oku kongelamo vina vi eciwa lekuatiso lio donate.pr418.com.