Koloneke vilo Olombangi Via Yehova vi kasi oku tambula okulia kuespiritu pocakati co internet okuti kosimbu ci sule. Pole, kolonepa vialua violuali, vamanji ka va kuete olombolongo oco va lande o internet. Kovitumãlo vikuavo o internet yi kupuka calua, ya lenda ale ka kuli o internet.

 Pole, koloneke vilo vamanji valua va pondola oku tapa alivulu ndaño ka va kuete o internet. Ndamupi?

 Poku talavaya lo JW Box, okuti ocimalẽho cimue ca tumiwa ka kongelo ana a kasi kovitumãlo ka kuli o internet. O JW Box, ya sokiyiwa locimalẽho cimue ci sandula o internet ya landiwa kocisoko cimue colomilu, lo software ya sokiyiwa Loseketa yo lo Kombutador yo Betele kuenda alivulu a sangiwa vovimalẽho, lolovideo via sandekiwa vo jw.org. Ocimalẽho locimalẽho ondando yaco yi panda 75 kolondolale.

 Vonjango Yusoma vamanji va tokekisa ovimalẽho viavo kondimbukiso yo Wi-Fi yo JW Box, kuenje va pondola oku tapa alivulu kuenda olovideo. Ndaño vamanji vana va kuete ovimalẽho viosimbu ale viondando yi sulemo va tẽlavo oku iñila vo internet. Pole, akongelo ana ka a kuete o internet va pondola ndati oku amamako lo JW Box yi kuete ovina vio kaliye? Pocakati colo pendrave vi kuete ovolandu o kaliye o vo jw.org. Olo pendrave viaco vi tumiwa otembo lotembo lo filiale kakongelo kuenda yimosi ondando yaco yisoka olondolale 4.

 Ndamupi o JW Box ya siata oku kuatisa vamanjetu? Nathan Adruandra, okuti onjali o kasi ko Republika Demokritika do Kongo wa popia hati: “Vokuenda kuotembo yalua nda seteka oku tapa olovideo losapi hati: “A Yehova,...Nda ku Kolela” kuenda “Ivailuka Ukãi wa Lote.” Pole, lalimue eteke nda ci tẽlele kuenje ca enda oku ndi sumuisa. Cilo mondola oku tapa olovideo viaco votelefone yange. Eci ci tu kuatisa etu tu lonjali oku longisa ciwa omãla vetu.”

 Manji umue o kuatisa akongelo ko Nigéria oku talavaya ciwa lo JW Box hati: “Vamanji va tenda o JW Box ndombanjaile yi likasi ya Yehova. Ovo va sanjuka calua momo cilo va pondola oku tapa alivulu kuenda olovideo viocimalẽho cetu coku longisa lonjila yimue ya leluka.”

 Cipitahãla 1.700 kovimalẽho via tumiwa ku vamanji vo Afrika, ko Oseania lo ko Amerika do Sul kuenda ocimãho oku tumisa o JW Box kakongelo alua akuavo. Pi ku tunda olombongo oco ku lingiwe ovina viosi evi? Kolombanjaile vi kuatisa kupange u lingiwa koluali luosi. Vialua pokati kolombanjaile viaco via siata oku eciwa pocakati conumbi donate.pr418.com. Tua pandula calua omo liolombanjaile viove!