Olosãi viosi tua siata oku lavoka lesanju ovipama vi pamisa ukamba wetu la Yehova kuenda olovideo vio JW Broadcasting. Pole, vamanji valua vo Afrika ka va tẽla ndomo va tala ovipama viaco pocakati co Internet. Momo lie?

 Onepa yalua yomanu vo Afrika ka ca lelukile kokuavo oku kuata o Internet. Kuenje kuna kuli o Internet yaco, pamue ya lenda calua kuenda ya tĩla calua. Ndeci, manji umue ukuakunyula akongelo ko Madagaskar, wa tapa ulandu umue wosãi wo JW Broadcasting vocitumãlo cimue muli o Internet. Eye wa feta 16 kolondolale (okuti ci panda 10.328.50 kolokuanja) okuti, vi pitahãla olombongo omanu vamue va siata oku nganyala vosemana! a

 Ndaño lovitangi viaco, olohuluwa viomanu vo Afrika, cilo va pondola oku tala ovipama vio JW Broadcasting okuti ka va vi tali pocakati co Internet. Momo lie?

 Tunde kunyamo 2017, ovipama vio JW Broadcasting via siata oku sandekiwa lonjila yecelela okuti omanu vo kolofeka vio kombuelo yo Afrika va vi tala pocakati covingungu vimue viotelevisãu vio satélite. Ovina vi pitiyiwa vovingungu viaco viocali kuenda vi sangiwamo ci soka 24 kolowola veteke, oloneke 7 vosemana kueci ci soka 16 kalimi.

 Oco ci tẽliwe, Olombangi Via Yehova via feta onjo yimue yupange woku lekisa oviluvialuvia pocakati co satélite. O satélite yi kasi oku talavayiwa layo, yi pitĩla kueci ci soka 35 kolofeka vio kombuelo yo Afrika. Ofeto yaco yi pitahãla 12.000 kolondolale vosãi (okuti ci pitahãla 7.000.000 kolokuanja.) Olonjanja vimue kua siata oku vokiyiwa olombongo vikuavo oco ku lekisiwe ovipama vi lingiwa vepuluvi liaco okuti vi lekisiwa vovingungu vikuavo. Eci cecelela okuti omanu valua va tala olohongele viofeka kuenda olohongele vilikasi viepasu li lingiwa lonumiwa yimue yo Kombala Yolombangi Via Yehova, kofiliale yimue.

 Omanu valua, oku kongelamo vana okuti Halombangiko Via Yehova, va siata oku tala ovipama vi lekisiwa vovingungu vio JW satélite volonjo viavo vocimalẽho cotelevisãu yavo. Pole, vamanji valua ka va kuete olombongo vi tẽla oco va lenda ovimalẽho vi sukiliwa oco va tale ovingungu viaco vio satélite. Oco vamanji va kuatisiwe lulandu wovipama vio JW Broadcasting, ci pitahãla 3.670 Kolonjango Viusoma, kua kapiwa ocimalẽho ci tambula ondimbukiso yo satélite. Ocimalẽho caco ci kuete ondando yi soka 70 kolondolale (okuti ci soka 44.000 kolokuanja) nda Onjango Yusoma yi kuete ale otelevisãu, ale o projetore. Vondando yaco mua kongela ale upange woku eca. Pole, nda ci sukiliwa oku landa ovimalẽho viosi, ondando yaco yi pondola oku tẽla 530 kolondolale (okuti ci soka 337.000 kolokuanja.)

 Vamanjetu va sanjukila calua ovingungu viaco viotelevisãu. Ukulu umue wekongelo lio ko Kamarões wa popia hati: “Kepata lietu ovingungu viaco, vi kasi ndomana vekalasoko.” Manji Odebode wo ko Nigeria wa popia hati: “Epata lietu li tala ovingungu viaco oloneke vitatu vosemana. Omãla vange va lavoka lesanju oloneke viaco. Vapuluvi amue ovo va pinga oco tu kapeko ovingungu vio JW.” Rose wo ko Nigeria, wa popiavo hati: “Nda sanjuka calua poku popia hati, cilo si tali calua asapulo ovingungu vikuavo, nda siata oku tala vali ovingungu vio JW. Eci nda enda oku tala asapulo, nda sumuaile calua omo liovina viaco kuenda atesãu ange a enda oku londa. Pole, ulandu wovipama vio JW Broadcasting vi kavuluisa haivio vi pamisa! Ndi sole calua ovingungu viaco. Ombanjaile yimue yinene ya tunda ku Yehova.”

 Manji umue ukuakunyula akongelo ko Mosambike wa popia okuti, vocikanjo caye Olonjango Viusoma vi kuete ovimalẽho vi ecelela oku kuata ovingungu pocakati co satélite. Vamanji va tiamẽla kakongelo aco va pitĩla selo osimbu ohongele ka ya fetikile, handi pamue, veya eci ku kamba ci pitahãla owola yimosi, oco va tale ocipama JW Broadcasting pocakati co satélite.

 Kohongele yolofeka 2019, ya lingiwa ko Johannesburg kofeka yo Afrika do Sul, olohundo via velapo oku kongelamo olohundo via lingiwa la vamanji va panga onepa Kosungu Yolombangi Via Yehova, via lekisiwa vovingungu viaco kovivanja vikuavo ecea. Sphumelele o talavaya Koseketa yo Broadcasting kofiliale yo Afrika do Sul wa popia hati: “Nda ka kua kaile ovingungu viaco, nda tua lekisa olohundo pocakati co Internet. Pole, nda tua sukila o Internet yimue yiwa loku yi feta. Ovingungu vio JW satélite via ci leluisa calua kuenda via koleliwa.”

 Olombanjaile wa siati oku eca lutima wosi oco vi kuatise kupange u kasi oku lingiwa voluali luosi, vi ecelela okuti vamanji valua vo Afrika, va tala ovipama vio JW Broadcasting pocakati co satélite. Tu pandula calua omo liolombanjaile viene wa siati oku eca volonjila via liyekala pocakati conumbi donate.pr418.com.