Ndaño lakalo a litepa, Yehova Suku o yongola okuti omanu vosi va lilongisa ovina viatiamẽla kokuaye kuenda Kusoma waye. (1 Timoteo 2:3, 4) Eli olio esunga lieci Olombangi Via Yehova via siatela oku pangela Ambimbiliya kuenda oku endisa alilongiso Embimbiliya komanu valua oku kongelamo ovisitatũi. Ocili okuti, ocisoko cetu ca siata oku panga alivulu alua a pongoluiwa volovideo kelimi lioku ilaika a ana a sangiwa kueci ci pitahãla 100 kalimi oku ilaika! Tua siata oku panga ndati alivulu aco loku a eca? Apongoloko api tua linga vokuenda kuotembo?

 Alivulu kalimi oku ilaika, a pangiwa lovimunga via vakuakupongolola kalimi osi voluali luosi. Omunu lomunu vocimunga, o kũlĩhĩsa lutate elivulu ovo va sukila oku pongolola. Noke va nõla onjila ya velapo yoku pitiya ulandu waco kelimi lioku ilaika. Kuenje ovo va ngalavala elivulu oco li kaile ndovideo. Toke cilo, kuli 60 kovimunga via siata oku pongolola alivulu a kuatisa koku endisa alilongiso Embimbiliya kuenda kuli 40 okuti, vi ci linga ño olonjanja vimue.

 Kosimbu, ondando yoku panga olovideo kalimi oku ilaika, ya tĩlile calua. Olokamera violovideo kuenda ovimalẽho vikuavo, ondando yavio ya tĩlile calua okuti cilo ci sule. Handi vali, olovideo via ngalavaliwa povitumãlo tua tunga etu muẽle okuti pamue, tua sukilile oku semũlũla osapalalo yimue ya tungiwa ale. Kuenje oco ocimunga cimue celimi lioku ilaika ci kuate ovimalẽho viosi, nda kua pesiwa eci ci pitahãla 30.000 b kolondolale.

 Oco ku talavayiwe ciwa lolombanjaile via eciwa, ocisoko cetu ca siata oku sanda olonjila vioku mioñolola kuenda vioku leluisa ovopange oku pongolola. Omo liaco, tu kasi oku talavaya lovimalẽho viokaliye, vina vi tu kuatisa calua haivio vi landiwa londando yi sulemo. Oco ovimunga vi ngalavale olovideo, ka vi sukila oku sokiya lika oseketa yimosi oco yi kale yoku ngalavalelamo olovideo, pole, ovio vi sokiya vokomputador yavo evala liamẽla atalala kuenje va ngalavala olovideo voloseketa viavo muẽle. Nda ku sukiliwa vamanji valua, citava okuti va ngalavala olonepa viavo oku upisa voseketa yavo, ale kolonjo viavo; ovo ka va sukila vali oku enda pocitumãlo ca sokiyiwila oku ngalavala.

 Tua siatavo oku panga ovipama violokomputador oco vi kuatise vana va talavaya lavio. Apongoloko aco, a tepulula calua otembo ovimunga vioku pongolola vi sukila oco ku pongoluiwe elivulu limue kelimi lioku ilaika. Vamanjetu va sanjukila calua apongoloko aco. Manji umue o tukuiwa Alexander wa popia hati: “Olovideo kelimi lioku ilaika, via siata oku sandekiwa olonjanja vialua okuti, kosimbu ci sule. Nda ci sanjukila calua. Nda siata oku tala olovideo viaco oloneke viosi.”

 Koloneke vilo, oco ku eciwe ovina viosi ocimunga cimue coku pongolola ci sukila, ku pesiwa lika eci ci panda 5.000 kolondolale. Omo liaco, cilo tu tẽla oku panga olovideo kalimi alua oku ilaika.

 Eci ocimunga cimue ci malusula oku ngalavala elivulu limue kelimi lioku ilaika, olio li sukila oku sandekiwa ku vana va li sukila. Kosimbu tua enda oku panga olovideokasete kuenda Alonga Ovisikilo, pole, ondando yaco ya tĩlile calua, ca enda oku ambata otembo yalua, mua kongelelevo upange walua. Kuenje ovina via ngalavaliwa vi tumisiwa kovenda yimue oco ku lingiwe olokopia violovideo vialua. Kesulilo, olovideokasete Lalonga Ovisikilo vi tumisiwa kakongelo. Kunyamo umosi lika okuti 2013, tua pesela eci ci soka 2.000.000 kolondolale oco ku pangiwe Alonga Ovisikilo kelimi lioku ilaika.

 Vamanji ovisitatũi va sanjukila calua aliangiliyo aco. Pole, ka ca lelukile oku talavaya lolovideo ca piãla enene omo okuti, etendelo liolovideokasete, ale Lialonga Ovisikilo lia livokiya calua. Olonjanja vimue ca sukilile Alonga Ovisikilo alua oco ku pangiwe elivulu limosi lika Liembimbiliya. Manji umue wo ko Brazil o tukuiwa Gilnei wa popia hati: “Olonjanja viosi eci tua yonguile oku tanga ocinimbu cimue Cembimbiliya, tua sukilile oku sanda okasete kuenje tu sanga ovisonehua viaco. Eci ocina cimue ca tĩlile calua.” Manji umue ukãi o tukuiwa Rafayane wa enda oku talavaya lalonga ovisikilo kelimi lioku ilaika wa popia hati: “Ca enda oku ndi kavisa calua poku linga elilongiso liange lio pokolika. Tua enda oku pita otembo yalua poku sanda lika ovisonehua, ale ulala wovinimbu vi kuete elitokeko lovisonehua vikuavo.” Vamanjetu eci va enda oku kala kupange woku kunda, va enda oku lekisa alonga ovisikilo, ale olovideocasete votelevisãu yomunu wa lekisa onjongole. Vamanji vamue va enda oku ambata ocimalẽho coku sika Alonga Ovisikilo. Vokuenda kuotembo yimue yitito, kua fetika oku molẽha ovimalẽho vioku sika kuenda oku lekisa olovideo okuti, via leluka oku vi ambata haivio vi kuete ale ovikete vioku tala olovideo kuenje ovio vamanji valua va enda oku talavaya lavio. Bobby wo ko Estadus Unidus wa popia hati: “Nda okuti noke yoku lekisa ocisonehua cimue o yongola oku lekisa cikuavo, olonjanja viosi o sukila oku pongolola Elonga likuavo Liovisikilo. Eci ca lingiwa vokuenda kuotembo yalua kuenda ca tateka uloño wetu koku fetika ombangulo Yembimbiliya.”

 Kunyamo 2013, ocisoko Colombangi Via Yehova ca sandeka o aplikativo JW Library Sign Language, yina yecelela vamanji oku tapa loku tala olovideo volotelefone viavo, ale volotablet. Elimi liatete lia sandeka o aplikativo yaco, o American Sign Language. Noke kunyamo 2017, vo aplikativo yaco mua lingiwa apongoloko okuti yi kuatisa alimi osi oku ilaika. Vamanji koluali luosi va kuata esanju lialua. Manji Juscelino wo ko Brazil wa popia hati: “Ca ndi komõhisa calua! Toke cilo ndi amamako oku sokolola ndomo Osungu Yolombangi Via Yehova yi kuetele ocisola omanu ovisitatũi kuenda ndomo ovo va yongola okuti, tu amamako oku kula konepa yespiritu ndeci omanu vana va vangula ciwa. Nda sanjukile calua kuenda o aplikativo yaco ya ndi vetiya oku amamako oku lilongisa calua Embimbiliya.”

 Koloneke vilo, tua siata oku panga olovideo viosi kelimi lioku ilaika vi sandekiwa vonumbi yetu yo internet kuenda vo aplikativo JW Library Sign Language. Kuenje cilo, alivulu kelimi lioku ilaika a pondola oku pongoluiwa, oku ngalavaliwa loku a sandeka vokuenda kuoloneke vimue okuti, ka ci lingiwa vali vokuenda kuolosãi, ale anyamo. Ocili okuti, kalimi oku ilaika alivulu a siata oku sandekiwa vapuluvi amuamue lalimi akuavo.

 Kũlĩhĩsa alomboluilo a vamanji vamue ovisitatũi. Manji Klízia wa popia hati: “Ocisoko cipi ca kapako calua ovisitatũi okuti ci angiliya olonumbi tu sukila oco vi pamise ekolelo lietu lonjila ya leluka kokuetu? Voluali ka muli lacimue ci sokisiwa leci ocisoko ca Yehova ca siata oku tu lingila.” Vladimir wa popia hati: “Olovideo vi ndi lekisa okuti, Yehova wa kapako calua ovisitatũi, ndeci eye a tata omanu va yevite.”

 Olovideo vietu, kelimi lioku ilaika kesulilo kua siata oku sonehiwa ndoco: “Ovideo yilo, ya sandekiwila oku kuatisa kupange woku longisa Embimbiliya u kasi oku lingiwa voluali luosi, lekuatiso liolombanjaile.” Tu sanjukila calua olombanjaile viove, poku kuama olonjila vialua vi sangiwa vonumbi donate.pr418.com. Olombanjaile viaco vi tu ecelela oku panga Ambimbiliya kuenda alivulu a kuatisa omanu vosi, oku kongelamo vana va vangula elimi lioku ilaika.