Ovisungo ombanjaile yimue yi komõhisa ya tunda ku Yehova. Vi pondola oku kuatisa ovisimĩlo vietu, oku pongolola ekalo lietu kuenda oku tu vetiya. Eci oco ci pita lovisungo vietu. Ocili okuti, ovisungo viaco vi pondola oku linga ovina vikuavo ndeci: Ovio vi pamisa ukamba wetu la Yehova.

 Tunde kunyamo 2014, kua pangiwa eci ci pitahãla 70 kovisungo kuenda cilo, cimue pokati kovisungo viaco ca sandekiwa kueci ci pitahãla 500 kalimi! Pole, pamue o lipula ndoco: ‘Helie wa siata oku panga ovisungo viaco kuenda vi pangiwa ndati?’

 Ovisungo vi pangiwa locimunga ci talavaya lovisungo Voseketa Yoku Ngalavala Olovideo Lovipama Vioku Yevelela okuti, ci songuiwa la mitavaso Yocimunga Celongiso Cosungu Yolmbangi Via Yehova. Ocimunga ci talavaya lovisungo, ci kuete vamanji 13 okuti, akãi kuenda alume, vana va kuatisa oku soneha ovisungo, oku vi mioñolola, oku linga ulala wesokiyo liaco, loku kuatisa kovopange aco. Handi vali, Ocimunga Celongiso ca tava okuti vamanji voluali luosi vana va lieca olumue, va talavayela oku upisa kolonjo viavo oku kongelamo vakuakusoneha ovisungo kuenda olonjimbi. Vamanji vaco lumbombe, va talavaya lovoloño avo okuti, ka va sandi ekemãlo liavo muẽle.

 Ocisungo, ci pangiwa ndati? Catete, Ocimunga Celongiso ci nõla ocisonehua ku kunamẽla ocisungo caco kuenda evetiyo oco ci sukila oku kuata. Noke ocimunga ci talavaya lovisungo, ci linga upange woku sokiya ocisungo kuenda oku soneha olondaka viaco. Ku ngalavaliwa ocisungo coku seteka. Ocimunga Celongiso ci kũlĩhĩsa ocisungo caco coku seteka kuenje ceca olonumbi vikuavo. Noke ocimunga ci talavaya lovisungo ci semũlũla ocisungo caco kuenje ci ngalavaliwa. Ovisungo viaco vi ngalavaliwa vovitumãlo vialua oku kongelamo volo filiale kuenda volonjo vioku ngalavalela.

 Oco ku sokiyiwe loku ngalavala ovisungo viaco, vamanjetu va talavaya lolo aplikativo vioku ngalavala, ocipama covisungo viatosi, ociseleko covina via ngalavaliwa kuenda vikuavo. Vupange waco mua kongelavo oku talavaya lovimalẽho viovisikilo vioku tenga ovisikilo, vioku vokiya ocileñi kuenda anguena. Enguena lenguena ondando yaco yi pondola oku soka 100 kolondolale, ale ceci ci pitahãla 1.000 kolondolale okuti (olombongo vio ko Estadus Unidus yo Amerika). Kunyamo 2020, tua pesela 116.000 kolondolale oco ku landiwe ovimalẽho vioku ngalavala ovisikilo.

 Alikolisilo api a lingiwa oco ku tetẽliwe olombanjaile via eciwa? Oco ko Betele ka ku ka kaile ocimunga cimue cinene ca vakuakutalavaya lovisungo, kua siata oku talavayiwa la vamanji valua va lieca olumue. Handi vali, oco ka ku ka kongeliwe vamanji valua kuenda oku va ngalavala, vamanjetu va siata oku soneha loku sokiya ovisungo pocakati cokomputador.

 Vamanji va sole oku yevelela ovisungo viaco. Manji Tara wo ko Alemanya wa popia hati: “Ovisungo vi ndi kuatisa oku tula utima eci ndi sakalala calua. Oku vi yevelela kelimi liange muẽle, ci kasi ndu okuti Yehova o ñuete kapepe.” Manji Dmitry wo ko Kazakistãu wa popia hati: “Ndi sole calua oku yevelela ovisungo okuti, si li sakalaisa nda ovio vi li kuata lolonumbi Viembimbiliya ale sio. Momo ovio vi ndi kuatisa oku pamisa ukamba wange la Yehova.”

 Manji Delia wo ko Afrika du Sul poku lombolola ndomo a liyevite catiamẽla kovisungo wa popia hati: “Ovio via siata oku pamisa ekolelo liange. Nda nda sumua, ale ndi kasi oku liyaka locitangi cimue, otembo yosi kuli ocisungo cimue ci likuata lekalo liaco. Olonjanja vialua, oku yevelela lika ocisikilo cocisungo, oco lika ndi sukila oco ndi liyeve ciwa!”

 Ovisungo vimue vi soliwe calua. Lerato, o kasivo ko Afrika du Sul, wa popia hati: “Ocisungo ‘Sokolola Asumũlũho tu ka Kuata Kovaso Yoloneke’ kuenda ‘Oluali Luokaliye Luo Luiya,’ vi ndi vetiya oku sokolola kotembo yo kovaso eci ndi ka yolela ina yange. Olonjanja viosi ndi yevelela ovisungo viaco, ndi kala ndu okuti, o kasi oku iya kokuange oco tu lipupole kapepe.”

 Ocisungo cimue ca kuatisa calua umalẽhe umue wo ko Siri Lanka. Eye wa popia hati: “Ulongisi wange wuloño, wa ndi pembuila kovaso ya vana tu tangela kumosi omo lioku kala Ombangi ya Yehova. Nda kuata usumba kuenda sia kũlĩhĩle eci ndi popia. Eci nda enda konjo, ina yange wa ndi vetiya oku yevelela ocisungo ‘O Estudo me Faz Bem (Elilongiso li Ñuatisa).’ Ocisungo caco ca ñuatisa oku linga akonomuiso kuenda oku pongiya etambululo limue. Keteke lia kuamamo, nda sapela lulongisi wange. Eye wa njevelela kuenda wa sola alongiso Olombangi Via Yehova. Ndi pandula ocisoko ca Yehova omo lioku tu sokiyila ovisungo vi vetiya.”

 Ku fetiwa ndati oco ku lingiwe ovisungo viaco? Ci lingiwa pocakati colombanjaile vi eciwa kupange u kasi oku lingiwa voluali luosi okuti, vialua pokati kavio vi eciwa poku kuama olonjila vi sangiwa vonumbi donate.pr418.com. Tu pandula calua omo liolombanjaile viove vi eciwa lutima wosi.