Olombangi Via Yehova vi linga ovopange etavo kuenda vi eca ekuatiso ku vana va pita lovilunga kueci ci pitahãla 200 kolofeka. Pole, olofeka cisoka 35, ovio lika vi tẽla oku landa ovina vi sukiliwa lekuatiso lilombanjaile viopocitumãlo. Ndamupi olofeka vi kuavo vi pondola oku tẽlisa a sukila avo?

 Osungu Yolombangi Via Yehova yi kũlĩhĩsa ovopange kuenda asukila konepa yespiritu Yolombangi Via Yehova koluali luosi, kuenje yi linga esokiyo lutate ndomo olombanjaile vi talavayiwa lavio. Nda o filiale yimue yi tambula olombanjaile vialua okuti vi supa ko ku tẽlisa ovopange opocitumãlo, olombanjaile viaco vi eciwa kolofeka vina okuti ka vi tambula olombanjaile vialua. Eci ci lekisa okuti va kasi oku kuama ongangu ya kristão vokocita catete, va enda oku li kuatisa la vakuavo “pocakati coku piñainya.” (2 Va Korindo 8:14) Akristão vana va kuatele ovina vialua va kuatisa vamanji va kuatele ovina vitito.

 Vamanji okuti cilo va tambula ekuatiso liolo filiale vikuavo va kasi oku liyeva ndati? Ndeci, ko Tanzânia kuna okuti onepa yalua yomanu yi kuete lika cisoka olodolare 2 veteke, olombanjaile viaco via talavayiwa lavio oco ku semuluiwe Onjango Yusoma liekongelo lio Mafinga. Ekongelo lia soneha ndoco: “Noke lioku semuluiwa, etendelo liomanu kolohongele lia livokiya calua. Tu pandula calua omo liocali cocisoko ca Yehova kuenda ca vamanjetu vo ko luali luosi. Pocakati colombanjaile viaco tua tẽla oku kuata ocitumãlo cimue ca posoka coku fendela Yehova.”

 Vamue pokati ka vamanjetu ko Sri Lanka ka va kuatele vali okulia omo liefengi lio COVID-19. Pokati kavo pakala manji ukãi o tukuiwa Imara Fernando kuenda o kamola kaye kulume Enosh. Pole, lekuatiso liolombanjaile via tunda kolofeka vi kuavo, ovo va tambula ekuatiso va sukilile. Kuenje wa soneha doco vukanda umue: “Tu eca olopandu vialua ku vamanji va lekisa ocisola kokuetu vokuenda kuoloneke vilo viohali. Tu kuete esanju lialua omo lioku panga onepa kepata eli, kuenda tu likutilila ku Yehova oco eye amameko oku kuatisa vamanjetu vosi vokuenda kuloneke vilo via sulako.”

 Ci kale okuti vamanjetu va kasi kovitumãlo via litepa ale sio, ovo olonjanja viosi va lekisa onjongole yoku tepelako vakuavo ovina va kuete. Ndeci, Enosh wa panga o kakasia kaye ko ku eca olombanjaile momo o yongolavo oku kuatisa vamanji va suka. Manji Guadalupe Álvarez o kuetevo ocituwa coku lekisa ocali. Eye o kasi konepa yimue yo México okuti omanu valua ka va tambula ofeto yi sulemo ale ka va kuete ofeto ya sokapo. Ndaño ndoco, eye eca ombanjaile ndomo ci li kuata lepondolo liaye. Wa soneha ndoco: “Ndi pandula calua Yehova omo liohenda yaye kuenda ocisola caye cocili. Nda kũlĩha okuti olombanjaile viange levi via vamanji vakuavo, vi ka kuatisa vamanji va kasi oku liyaka lesukila.”

 Olo filiale vina vi tuma olombongo kolofeka vi kuete esukila vi kuatavo esanju lialua poku ci linga. Ndeci manji Anthony Carvalho, okuti o panga onepa Kakulu vo Filiale yo Brasil wa popia hati: “Vokuenda kuanyamo alua upange vofeka yetu wa sukilile ekuatiso liolombongo vi tunda kolofeka vikuavo. Omo liekuatiso tua tambula upange wa kula calua. Cilo ekalo lietu konepa yolombongo lia pongoloka, kuenda tu kuete esumũlũho lioku kuatisa vakuetu. Vamanjetu va tenda upange woku kunda ndupange u lingiwa kuoluali luosi kuenda ndolondonge via Kristu, va kũlĩha okuti va kuete ocikele cinene coku kuatisa kupange owu.”

 Yipi onjila ya velapo yoku kuatisa vamanjetu vasuka? Hakutumako olombongo kolo filiale violofeka vikuavo, pole, poku eca olombanjile oco vi kuatise kupange u lingiwa koluali luosi. Eci ci pondola oku lingiwa poku kapa vokasia ombanjile yi kuatisa kupange u kasi oku lingiwa voluali luosi yi sangiwa Vonjango Yusoma ale ponumbi donate.pr418.com. Tua sanjukila calua olombanjaile viosi evi!