AMAMAKO OKU LAVULULA!

Nye Embimbiliya li Popia Catiamẽla Koku Fendela Oviteka?

SIKA

Ndomo ca lomboluiwa loseketa yasapulo lietavo Liokatolika, vokuenda kuohundo yimue ya lingiwa ko Basilica yo ko São Pedro, keteke 25 yosãi Yelombo 2022, Papa Francisco wa talama kovaso yociñumañuma ca Maria kuenda wa likutilila kokuaye “vutima, wa yika ovaso loku petamisa utue waye.” Eye “wa pinga ombembua ku Maria.” Esapulo limue lionumbi Liokatolika liamisako okuti, Papa wa likutilila “oco a kolise loku kolela omanu capiãla enene o Russia lo Ukrania oco va kale Vutima wa Lipua wa Maria.”

Nye o sima? Anga hẽ ca sunguluka oku likutilila koviteke ale oku vi tukula kefendelo? Kũlĩhĩsa ovisonehua Viembimbiliya vi kuãimo:

“Ku ka lisongele ociñumañuma ale esetahãlo liocina cimue ci kasi kovailu, pamue posi, ale vovava vemẽhi liongongo. Ku ka vi kekamẽle ndaño muẽle oku vetiyiwa oku vi fendela, momo ame ndi Yehova Suku yove, ndi Suku una o yongola okuti omanu vo fendela lika eye.”—Etundilo 20:4, 5. a
“Oviteka viavo, opalata lulu okuti, pange wovaka omunu. Ovio vi kuete omẽla, pole, ka vi tẽla oku vangula; vi kuete ovaso, pole, ka vi tẽla oku vanja; vi kuete ovatũi, pole, ka vi tẽla oku yeva; vi kuete enyulu, pole, ka vi tẽla oku lehũlũla; vi kuete ovaka, pole, ka vi tẽla oku kuata cimue; vi kuete olomãhi, pole, ka vi tẽla oku enda; penguli liavio ka pa tundi ondaka. Omanu vana va vi panga, va ka kala ndoviteka viaco, la vosi vana va kolela kokuavio.”—Olosamo 115:4-8.
“Ame ndi Yehova. Eyi oyo onduko yange; si eci ulamba wange komunu ukuavo, ndaño esivayo liange koviñumañuma via songiwa.”—Isaya 42:8, etosi.
“Tili efendelo lioviteka.”—1 Va Korindo 10:14.
“Li lavi koviteka.”—1 Yoano 5:21.

Oco o kũlĩhe ovina vikuavo vieci Embimbiliya li popia catiamẽla koku fendela oviteka, tanga ocipama losapi hati, “O Conceito Da Bíblia—Imagens” ale tala ovideo losapi hati, Anga hẽ Suku o Tava Oku Fendeliwa Loviteka?

Citava okuti o yongolavo oku kũlĩha eci Embimbiliya li popia catiamẽla kolonumbi vi kuãimo: