Oku pumba upange ci kokela omunu oku kuata ovitangi viekambo liolombongo, vepata, kekalo liaye kuenda kovisimĩlo. Nda wa kũlĩhĩsa olonumbi vi kuãimo via kunamẽla Vembimbiliya, vi pondola oku ku kuatisa oku tẽla oku liyaka locitangi caco.

•   Sapuilako vakuene ndomo o liyevite.

   Ceci Embimbiliya li popia: “Ekamba liocili li lekisa ocisola otembo yosi.”—Olosapo 17:17.

   Noke lioku pumba upange umue, pamue o yeva esumuo lialua, onyeño, ale ku tẽla oku sokolola ciwa catiamẽla kueci o linga kuenda o sima okuti, wa lueya ocina cimue. Nda o sapela la vakuepata kuenda akamba vove catiamẽla kovisimĩlo viove, ovo va pondola oku ku kuatisa oco o liyeve ciwa. Ovo va pondolavo oku ku ĩha olonumbi vi ku kuatisa oku sanga vali upange ukuavo.

•   Yuvula oku sakalala calua.

   Ceci Embimbiliya li popia: “Ko ka sakalali leteke liya, momo eteke liya li ka kuata asakalalo alio.”—Mateo 6:34.

   Embimbiliya li tu vetiya oku linga tete esokiyo limue. (Olosapo 21:5) Li tu lungulavo oku yuvula oku sakalala calua lovina vi ka pita kovaso yoloneke. Olonjanja vialua, tu sakalala lovina vimue okuti, lalimue eteke vi ka pita. Ca sunguluka oku tiamisila utima kovina o linga lika veteke limosi.

   Embimbiliya li eca alungulo a kuatisa, ana a lekisa ndomo cilo o tẽla oku liyaka lovitangi viaco. Oco o kũlĩhe ovina vikuavo, tanga ocipama losapi hati: “Como lidar com o estresse.”

•   Linga apongoloko a sukiliwa kovina o landa.

   Ceci Embimbiliya li popia: “Nda lilongisa . . . oku kuata calua loku suka.”—Va Filipoi 4:12.

   Linga apongoloko amue kekalo liove cilo. Voku ci linga, mua kongela ovituwa viove vioku landa lika ovina vi sukiliwa, oco vi ku kuatise. Kuata utate oco ku ka levale ovina ku sukila.—Olosapo 22:7.

   Oco o kũlĩhe olonumbi vikuavo viatiamẽla konjila ndomo o linga apongoloko ketendelo liolombongo o kuete cilo, tanga ocipama losapi hati: “Como viver com menos dinheiro?.”

•   Talavaya ciwa lotembo yove.

   Ceci Embimbiliya li popia: “Endaendi ndava va kuete olondunge . . . , loku talavaya ciwa lotembo.”—Va Kolosai 4:5.

   Ndaño ku kuete vali alivala a suapo oku enda ale oku tunda kupange, amamako oku kuata esokiyo liwa li ku ecelela oku talavaya ciwa lotembo yove. Poku ci linga, ci ka ku kuatisa oku kuata uloño komuenyo kuenda oku liyeva ciwa.

•   Lekisa onjongole yoku linga ovina via liyekala.

   Ceci Embimbiliya li popia: “Kuli onima yiwa kovopange osi.”—Olosapo 14:23.

   Lekisa onjongole yoku linga ovopange a litepa la ana wa enda oku linga. Citava okuti, o linga ovopange ana a molẽha ndu okuti, ka a kuete esilivilo lialua, ale ovopange ana ka va feti calua okuti u sule lowu wa enda oku linga.

•   Kala ukuepandi.

   Ceci Embimbiliya li popia: “Waya ombuto yove komẽle kuenda ku ka ecelele okuti eka liove li puyuka toke koñolosi; momo ove kua kũlĩhĩle eyi yi ka kula ciwa.”—Ukundi 11:6.

   Amamako oku sandiliya upange. Sapuilako omanu vakuavo okuti, ove o kasi oku sandiliya upange umue. Sapuilakovo epata liove, omanu wa kũlĩha, vana wa tangeli kumosi kuenda vana va lisungue love. Sandiliya volonjo viovopange, vovikanda viasapulo kuenda volonumbi vikuavo vio internet violovenda viaco. Lipongiyila oku pulisiwa kovopange osi o sanda, loku tumisa ovicapa vialua osimbu kua sangele upange umue.