Keteke 23 ya Kupemba, 2023, asongui vamue va velapo vuhayele ko Estados Unidos, va lungula omanu ndomo o internet yi kasi oku kokela ovitangi amalẽhe valua.

•   “Ndaño o internet yi pondola oku kuatisa omãla kuenda amalẽhe, kuli ovovangi a lekisa okuti oyo yi kasi oku koka ohele yalua, oku nyõla uhayele wovisimĩlo kuenda ekalo liwa liomãla leli liamalẽhe.”—O Internet Kuenda Uvei wo Vowoño Kamalẽhe: Esapulo Liusongui wolondotolo vakuakupelala ko Estados Unidos, 2023.

 Esapulo liaco, li lekisa ovolandu a kuata onima yi sakalaisa calua.

•   Amalẽhe va kuete 12 kuenda 15 kanyamo “okuti va pesila ci soka olowola vitatu oku konomuisa ovipama vo Internet vokuenda kueteke, va pondola oku kuata ovitangi vialua viuhayele wovowoño, ndeci esumuo kuenda asakalalo.”

•   Elilongiso limue lia lingiwa lamalẽhe va kuete 14 kanyamo, kua limbukiwa okuti, “oku pita otembo yalua oku konomuisa ovipama vo Internet ci tateka omunu oku kuata otulo, o pondola oku pembuiwa la vakuavo, ka sanjukila vali etimba liaye, ka litendi vali okuti o kuete esilivilo, o fetika oku yeva esumuo, capiãla enene komãla vakãi.”

 Olonjali vi pondola oku teyuila ndati omãla vavo kovitangi viaco? Embimbiliya lieca alungulo alua a kuete esilivilo atiamẽla kocitangi caco.

 Linga onepa yove. Olonjali vi sukila oku sokolola kovitangi vi tunda poku konomuisa ovipama vo Internet, loku ñola nda omõla o citava oku talavaya lavio ale sio.

•   Onumbi Yembimbiliya: “Pindisa omõla vonjila a sesamẽla oku endela—Olosapo 22:6, etosi.

•   Oco o lilongise ovina vikuavo, tanga ocipama losapi “Omõlange o sukila hẽ oku Talavaya Lovipama Vimue Vio Internet?”

 Nda ove wa ecelela okuti omõlove o talavaya lovipama vimue vio Internet, kũlĩhĩsa ovitangi vi pongola oku yilikalo kuenda ndomo a talavaya lovipama viaco. O ci linga ndati?

 Teyuila omõlove kovina vi koka ohele. Longisa omõlove oku limbuka kuenda oku yuvula ovolandu a koka ovitangi a sangiwa vo internet.

•   Onumbi Yembimbiliya: “Evĩho liukahonga lovina viosi via vĩha, ale ocipululu ka vi ka tukuiwe pokati kene, . . . ndaño ovilinga vi kutisa osõi, ndaño olombangulo viuveke kuenda olomapalo vĩvi okuti, ovina ka via sungulukile.”—Va Efeso 5:3, 4.

•   Oco o limbuke ovina vikuavo tanga ocipama losapi “Longisa Omõlove Oku Talavaya Ciwa lo Internet.”

 Kapa olongave. Tumbika olonumbi vi lekisa otembo omõlove citava oku tala ovipama vimue vo internet kuenda otembo a pesila poku vi tala.

•   Onumbi Yembimbiliya: “Lavululi oco vu endaendi . . . ndomanu va kuete olondunge, loku talavaya ciwa lotembo yene, momo oloneke via vĩha.”—Va Efeso 5:15, 16.

•   Kuama oviluvialuvia viemela liyela Lunguka: Kũlĩha Ndomo o Talavaya lo Internet Oco o kuatise omõlove oku kuata elomboloko lieci ci kuetele esilivilo oku kapa olongave poku tala ovipama vimue vio internet.