Poku vangula catiamẽla kuyaki o Irão ya linga lo Isareli Casapalo 13 ya Kupemba, 2024 usonehi wa velapo wo lo Nações Unidas, António Guterres wa popia ndoco: “Yilo oyo otembo yoku lisapela kuenda oku tepulula ohole yekalo liaco. Otembo yoku lavulula kuenda yoku likandangiya.”

 Ovoyaki vo Kutundilo, ocindekaise covina vi kasi oku pita voluali luosi.

 “Voluali mu kasi oku pita etendelo lialua liovoyaki tunde Kuyaki Wavali wa pita Voluali luosi. Ci soka olohuluwa 2 viomanu, va kasi kovitumãlo ku kasi oku pita ovoyaki aco.—Conselho de Segurança yo ONU, 26 de Susu 2023.

 Kovitumãlo ku kasi oku pita ovoyaki aco, mua kongela o Isareli, o Gaza, o Suria, o Azerbaijão, o Ucrânia, o Sudão, o Etiópia, o Níger, o Mianmar kuenda Haiti. a

 Ovoyaki a ka pua otembo yipi? Anga hẽ asongui voluali va tẽla oku nena ombembua? Nye Embimbiliya li popia?

 Ovoyaki tu lete voluali koloneke vilo, ondimbukiso yokuti ndopo muẽle ka ku kala vali ovoyaki. Ovoyaki aco a kasi oku tẽlisa ovitumasuku Viembimbiliya, viatiamẽla koloneke tu kasi. Embimbiliya li tukula otembo yaco okuti, “esulilo lioluali.”—Mateo 24:3.

•   “Vu ka yeva eci catiamẽla kovoyaki kuenda asapulo ovoyaki. . . . Ofeka yi ka katukila ofeka kuenda usoma u katukila usoma.—Mateo 24:6, 7.

 Tanga ocipama losapi, “Nye Ceca Uvangi Wokuti tu Kasi “Koloneke Via Sulako,” Ale “Kotembo ya Sulako”? oco o kũlĩhe ndomo ovoyaki a kasi oku pita koloneke vilo a kasi oku tẽlisa ovitumasuku Viembimbiliya.

 Embimbiliya li likuminya okuti ovoyaki a lingiwa lomanu, a ka puako. Pole, ci ka lingiwa ndati? Omanu havoko va ka malako ovoyaki aco. Ocili okuti o Harmagedo “uyaki okuti, u ka pita keteke linene lia Suku Ukuonene Wosi,” oyo yi ka malako ovoyaki aco. (Esituluilo 16:14, 16) Noke liuyaki waco, Suku o ka tẽlisa ohuminyo yaye yoku nena ombembua yi ka kala otembo ka yi pui, pokati komanu.—Osamo 37:10, 11, 29.

 Oco o lilongise ovina vikuavo viatiamẽla kuyaki u ka malako ovoyaki osi, tanga ocipama losapi “Uyaki wo Harmagedo u Lomboloka Nye?”