Omanu voluali luosi va kasi oku tala ohali omo liungangala wopulitika.

•   Ko Mesiko vokuenda kuoviela via lingiwa kunyamo 2023-2024, kua lingiwa ungangala walua, oku kongelamo 39 komanu va pondiwa vatiamẽla kopolitika okuti, olio etendelo lia luapovali toke cilo.

•   Koloneke vilo, o Europa ya pitapo lovitangi vialua omo liungangala wo politika, oku kongelamo oku seteka oku ponda epalanga liatete lio ko Eslovaquia, keteke 15 ya Kupemba 2024.

•   Omanu vo ko Estados Unidos, va sumua calua poku mola ndomo Donald Trump ombiali yatete, vo seteka oku u ponda keteke 13 Yevambi Linene liunyamo 2024.

 Momo lie o politika ya siatela oku kokela ohali yalua komanu? Anga hẽ eteke limue ungangala waco u kapuako? Nye Embimbiliya li popia?

 Embimbiliya lia popele okuti kotembo yetu, yi tukuiwa “oloneke via sulako,” omanu valua va ka kuata ovituwa viungangala kuenda oku koka ovitangi vikuavo.

•   “Koloneke via sulako, ekalo li ka tĩla calua halio li koka ohele. Momo omanu va ka linga . . . vakualutukãi, havakuaciliko, . . . ka va ka tẽla oku likandangiya, olongangala, . . . olomakuli, vakualonamãlãla, vakuepela.”—2 Timoteo 3:1-4.

 Embimbiliya lia popelevo okuti ombuanja yopulitika, ondimbukiso yotembo tu kasi. (Luk 21:9, etosi) Pole, ungangala kuenda oku litepa kuomanu omo lioku tiamela kovitunda via litepa, ka vi kamamako otembo yosi.

 Embimbiliya li lombolola okuti, Suku o ka piñainya olombiali viosi viomanu, luviali waye una u kasi kilu.

•   “Suku yo kilu o ka tumbika usoma umue okuti . . . owo u ka nyanyõla loku kundula ovosoma aco osi kuenje owo lika u ka kala otembo ka yi pui.”—Daniele 2:44.

 Usoma wa Suku, u ka nena omunga kuenda ombembua yocili voluali luosi.

•   Soma Yusoma waco Yesu Kristu, o tukuiwa okuti, “Mbiali Yombembua” kuenda lalimue eteke a ka ecelela okuti ombembua yaco yi nyõliwa.—Isaya 9:6, 7.

•   Omo liaco, vana va kasi oku kuatisa Kusoma wa Suku, va kasi oku lilongisa ndomo va ka kala lombembua. Eli olio esunga lieci Embimbiliya li popela okuti: “Ovo va ka pongolola olosipata viavo oco vi linge atemo Kuenda ovonga avo a ka linga olomĩla. Ofeka ka yi ka katukila ofeka yikuavo losipata, ka va ka lilongisa vali uyaki.”—Isaya 2:3, 4.

 Oco o lilongise ovina vikuavo, tanga ocipama losapi “Nye Usoma wa Suku u ka Linga?” kuenda tala ovideo “Usoma wa Suku u Lomboloka Nye?