Olombangi Via Yehova ka vi talavaya lika Lembimbiliya limosi. Pole, tu sole oku talavaya Lembimbiliya li Kola—Epongoluilo Lioluali Luokaliye lia sandekiwa kalimi alua. Embimbiliya eli li tukula onduko ya Suku, lia suapo kuenda lia leluka oku kuata elomboloko lialio.

•   Oku Tukuiwa Kuonduko ya Suku. Ambimbiliya amue ka a tukula Usovoli walio. Ndeci Embimbiliya limue li tukula olonduko viomanu 70 va pongolola Embimbiliya liaco. Pole lacimue ocinimbu ci tukula onduko Yusovoli walio—Yehova Suku!

   Pole, Embimbiliya li Kola—Epongoluilo Lioluali Luokaliye, lia tumbulula onduko ya Suku povitumãlo vialua ya enda oku molẽha vovisonehua viatete, osimbu okuti vana va li pongolola ka va tukuiwile.

•   Oku suapo. Ambimbiliya amue, ka a pitiya esapulo lialio lonjila ya suapo. Ndeci, Embimbiliya limue lia pongolola Mateo 7:13 ndoco: “Iñilili pepito lia sukatela, momo epito lia sanjavala kuenda onjila ya leluka, vi ambata kifelu.” Pole, ovisonehua viatete ka vi tukula “ifelu,” vi tukula ondaka “oku kunduiwa.” Citava okuti, vakuakupongolola va sonehamo ondaka “ifelu” omo lioku tava okuti, olondingaĩvi vi kangisiwa vifelo yondalu otembo ka yi pui. Pole, ocisimĩlo eci ka ci sangiwa Vembimbiliya. Omo liaco, Embimbiliya li Kola—Epongoluilo Lioluali Luokaliye, lia pongolola ciwa ocinimbu eci ndoco: “Iñili vombundi ya sukatela, momo ombundi ya sanjavala kuenda onjila yi tuala kenyõleho ya tanda kuenje valua va endelamo.”

•   Ca leluka oku kuata elomboloko lialio. Embimbiliya limue lia pongoluiwa ciwa ka lia suilepo lika, pole, lia lelukavo oku kuata elomboloko lialio. Tala ocindekaise cimue. Kukanda ku Va Roma 12:11, upostolo Paulu wa tukula ondaka yi pondola oku lomboloka oku ‘kuata owuya wespiritu.’ Pole, omo okuti, ondaka yaco ka yi kuete elomboloko lia suapo kelimi Liumbundu, Embimbiliya li Kola—Epongoluilo Lioluali Luokaliye, lia yi pongolola lonjila ya leluka yokuti: “Eceleli okuti, espiritu sandu liu vetiyi oku kuata ombili.”

 Embimbiliya li Kola—Epongoluilo Lioluali Luokaliye, li tukula lika onduko ya Suku, lia suapo, lia leluka oku kuata elomboloko lialio kuenda li kuetevo etepiso liokuti: Li eciwa ocali. Omo liaco, omanu valua okuti kosimbu ka va tẽlele ndomo va kuata Embimbiliya, cilo va pondola oku li tanga kelimi liavo muẽle.