Citava hẽ Okuti Omunu Umue o Nõla Oku Siapo Oku Kala Ombangi ya Yehova?

SIKA

Citava. Kuli olonjila vivali omunu a pondola oku lekisa okuti ka yongola vali oku kala Ombangi ya Yehova:

Poku soneha ukanda umue. Omunu o pondola oku soneha ale oku sapuila ekongelo okuti ka yongola vali oku kala Ombangi ya Yehova.
Kovilinga viaye. Olonjanja vimue ovina omunu a linga ovio vi lekisa okuti ka yongola vali oku panga onepa kongongela yetu ya vamanji voluali. (1 Petulu 5:9) Pamue eye o fetika oku enda enda ketavo likuavo kuenda o popia okuti o kamamako oku ci linga.—1 Yoano 2:19.

Nye ci popia nda omunu umue wa liwekapo oku kunda ale oku enda kolohongele? Anga hẽ ci lomboloka okuti eye Hambangiko vali ya Yehova?

Sio. Ci lekisa okuti ekolelo liomunu waco liahongua. Eci ca litepa lomunu umue o popia okuti ka yongola vali oku kala Ombangi ya Yehova ale o siapo oku enda kolohongele. Pamue citava okuti omanu vana va enda lika olonjanja vimue kupange woku kunda ale kolohongele, va sumua. Eci ka ci lekisa okuti va siapo oku kala Olombangi Via Yehova. Omo liaco, ka tu ivalako omanu vaco pole tu seteka oku va kuatisa kuenda oku va lembeka. (1 Va Tesalonike 5:14; Yuda 22) Nda omunu waco o yongola oku kuatisiwa, akulu vekongelo va likolisilako oco omunu waco a tumbulule ukamba waye la Suku.—Va Galatia 6:1; 1 Petulu 5:1-3.

Ocina akulu vekongelo va yuvula oku linga oku kisika umue oku kala Ombangi ya Yehova. Omunu lomunu o sukila oku nõla etavo a kuama. (Yehosua 24:15) Etu tu tava okuti omunu o sukila oku fendela Suku lutima wosi ale omo okuti eye o ci yongola.—Osamo 110:3; Mateo 22:37.