Nda citiwila volupale luo Calgary ko Alberta, ko Kanada. Eci nda kala omõla, olonjali viange via linyãla kuenje ame la ina yange tua ilukila kolosekulu viange. Ovo va tu solele calua kuenda ame nda sanjukile calua. Njivaluka ciwa otembo yaco yovomõla.

 Pole, eci nda kuata anyamo epanduvali, omuenyo wange wa pongoloka calua. Ina yange wa kuela vali la isiange kuenje tua ilukila ko Estados Unidos, kolupale luo Saint Louis, Missouri. Ka pa pitile otembo yalua nda limbuka okuti isiange wa laikele oku kala ongangala. Ndeci, eci nda tiuka konjo keteke liatete lioku enda kosikola, isiange wa limbuka okuti nda tatiwa lãvi kosikola yokaliye kuenda sia tẽlele oku liteyuila. Eye wa temele kuenda wa ndi veta vali calua okuti, omãla vo kosikola ci sule! Omo liaco, nda fetika oku liyaka lomãla vakuavo eci nda kuata lika anyamo epanduvali.

 Ocituwa ca isiange coku tema calua ca koka okuti, ina yange o kala omunu umue ukuacinyeño usa haeye ka sanjukile. Ovo va enda oku lihoya loku litĩla. Eci nda tẽlisa 11 kanyamo nda fetika oku nyua kuenda oku fenya olodroga. Nda fetika oku kala ongangala kuenda oku litenga vombuanja yolokololo. Eci nda mala oku lilongisa kosikola ya pita pokati, nda kala omunu umue wa piãla calua kungangala.

 Eci nda kuata 18 kanyamo, nda lisonehisa Kocisoko Colomondi ko Estados Unidos. Omo liepindiso nda tambula, ungangala wange wa livokiya. Nda lilongisa oku ponda omanu. Noke lianyamo atãlo, nda siapo upange wusualali kuenje nda lilongisa o psicologia momo nda yonguile oku talavaya ko FBI (Departamento Federal de Investigações). Nda fetika oku lilongisila ko Estados Unidos kuenda ndamamako oku lilongisa eci nda tiukila ko Kanada.

 Eci nda kala kosikola ya velapo sia kolelele vali komanu vosi. Omanu va kala vakuacipululu, ovina viosi voluali via kala ndu okuti ka vi silivila kuenda ovitangi viomanu via kala ndu okuti ka vikuete esulilo. Nda liwekapo oku tava okuti omanu va ponduile oku pongolola oluali oco lu linge ocitumãlo cimue ciwa.

 Omo okuti sia kuatele vali elavoko komuenyo, nda fetika oku nyua calua, oku fenya olodroga loku sokolola lika kolombongo kuenda kukahonga. Omuenyo wange wa kala lika woku enda kovipito loku sonda akãi. Omo lioku kolela calua kepindiso liusualali nda tambula, olonjanja viosi nda enda oku litenga vovaima. Nda kuata onjila yange yoku tetulula ovitangi kuenda nda enda oku veta omunu wosi ndi sima okuti ka kaile oku tata ciwa ukuavo. Pole, nda kala oku linga upika wungangala.

 Eteke limue ame kumue lekamba liange tua fenyele calua olodroga vohondo yoposi yonjo yange loku longeka eliamba oco li landisiwe. Noke eye wa ndi pula nda ndi tava okuti kuli Suku. Nda tambulula ndoco: “Nda Suku eye o kuete eko omo liohali yi kasi voluali, si yongola oku kũlĩha lacimue catiamẽla kokuaye!” Keteke lia kuamamo okuti eteke liange liatete kupange wokaliye, umue Ombangi ya Yehova tu talavayela kumosi, wa ndi pula ndoco: “Ove hẽ o sima okuti Suku eye o kuete eko omo liohali yi kasi oku pita voluali?” Nda komõha omo lioku ndi linga epulilo liaco, omo lieci nda popia keteke lia pita. Omo liaco, nda yonguile oku kũlĩha ovina vikuavo. Vokuenda kuolosãi epandu via kuamamo, tua sapela calua kuenda wa ndekisa Vembimbiliya atambululo apulilo a tatama calua nda kuatele atiamẽla komuenyo.

 Kotembo yaco, nda kala lufeko wange, pole, eye ka yonguile oku kũlĩha lacimue catiamẽla kovina nda kala oku lilongisa. Vocalumingu cimue ndo sapuila okuti, nda laleka Olombangi Via Yehova oco viye konjo loku tu longisa Embimbiliya. Keteke lia kuamamo eci nda tiuka kupange, nda sanga okuti wa enda kuenda wambata ovikuata viosi via kala vonjo. Nda tundila posamua kuenda nda fetika oku lila. Noke nda likutilila ku Suku loku pinga ekuatiso. Ya kala onjanja yatete nda likutilila loku tukula onduko ya Suku, Yehova.—Osamo 83:18.

 Noke yoloneke vivali, ohueli yimue okuti Olombangi Via Yehova, yeya oku lilongisa Embimbiliya lame onjanja yatete. Eci ovo va enda, ndamamako oku tanga elivulu tua lilongisa losapi, Poderá Viver Para Sempre no Paraíso na Terra. a Elivulu liaco nda limala oku litanga vuteke waco. Ovina nda lilongisa viatiamẽla ku Yehova kuenda komõlaye Yesu Kristu, via vetiya utima wange. Nda limbuka okuti Yehova ukuacisola, eci tu tala ohali eye o talavo ohali. (Isaya 63:9) Ocina cimue ca ndi vetiya calua, oku lilongisa eci catiamẽla kocisola Suku a ndi kuetele kuenda kocilumba omõlaye a eca kokuange. (1 Yoano 4:10) Nda limbuka okuti Yehova wa lekisa epandi kokuange “momo ka yongola okuti umue o nyõliwa, puãi, o yongola okuti vosi va likekembela.” (2 Petulu 3:9) Nda limbuka okuti Yehova wa kala oku ndi kokela kokuaye.—Yoano 6:44.

 Vosemana yaco, haico nda fetika oku enda kolohongele. Esinga liange lia lepele calua, nda enda oku wala ovimbilingu kuenda omanu va enda oku kuata usumba eci va mbanja. Ndaño ndoco, Olombangi Via Yehova via ndi tata nda umue ukuepata liavo va lisula osimbu oku u mola. Ovio via lekisa okuti Akristão vocili. Nda liyeva ndu okuti nda tiukila konjo yolosekulu viange, pole, ekalo liaco lia velelepo.

 Ka pa pitile otembo yalua, ovina nda lilongisa Vembimbiliya via fetika oku pongolola omuenyo wange. Nda teta esinga, nda liwekapo oku linga evĩho liukahonga, oku nyua calua kuenda oku fenya olodroga. (1 Va Korindo 6:9, 10; 11:14) Nda yonguile oku sanjuisa Yehova. Omo liaco, sia lisandelele esunga eci nda lilongisa okuti ovina nda kala oku linga vĩvi. Handi vali, nda enda oku yeva esumuo lialua vutima. Nda sokolola ndoco: ‘Si yongola vali oku linga ovina evi.’ Noke ka pa pitile otembo yalua, nda likolisilako oku pongolola ovisimĩlo kuenda ovituwa viange. Kuenje nda limbuka onima yi tunda koku linga ovina vi likuata locipango ca Yehova. Keteke 29 Yevambi Linene 1989, eci pa pita olosãi epandu noke yoku fetika oku lilongisa Embimbiliya nda papatisiwa kuenje nda linga Ombangi ya Yehova.

 Embimbiliya lia ndi kuatisa oku pongolola ekalo liomuenyo wange. Kosimbu nda enda oku tata omanu lungangala eci va ndi lingisa onyeño ale ceci va ndi sanumula. Pole, cilo ndi likolisilako oku kala “ukuambembua lomanu vosi.” (Va Roma 12:18) Nda kũlĩha okuti epongoloko liaco hameko nda li linga, Yehova eye wa lilinga pocakati Condaka yaye kuenda yespiritu sandu.—Va Galatia 5:22, 23; Va Heveru 4:12.

 Cilo, siupikakovali wolodroga, wungangala kuenda wukahonga, pole, ndi sanda oku sanjuisa Yehova kuenda oku likolisilako kupange waye. Mua kongela oku kuatisa vakuetu oku u kũlĩha. Eci pa pita anyamo amue noke yoku papatisiwa, nda ilukila konepa yikuavo yoluali, oco ndi kuatise kovitumãlo kua sukilile akundi volondaka viwa. Vokuenda kuanyamo, nda kuata esanju lioku longisa omanu valua kuenda oku mola ndomo Embimbiliya lia pongolola ekalo liomuenyo wavo. Ndi kuetevo esanju omo ina yange wa lingavo Ombangi ya Yehova. Ocina cimue co kuatisa oku ci linga, apongoloko awa nda linga komuenyo wange.

 Kunyamo 1999, volupale luo El Salvador, nda pindisiwa kosikola okuti cilo yi tukuiwa hati, Osikola Yakundi Vusoma. Osikola yaco ya ndi pindisa oco ndi tẽle oku songuila upange woku kunda, oku longisa vekongelo kuenda oku litata. Kunyamo waco, nda kuela lukãi wange ndi sole calua Eugenia. Kuenje kavali ketu tua talavaya kupange wakundi valikasi ko Guatemala.

 Koloneke vilo sia sumuile vali omo liekalo liomuenyo, pole, nda sanjuka calua. Oku linga ovina Embimbiliya li popia, ca ndi yovola kevĩho liukahonga, liungangala kuenda ca ñokela ocisola cocili kuenda ombembua komuenyo.