Oloneke viosi vokuenda kueci ci soka 40 kanyamo, omanu va kasi Volupale luo Nova York va enda oku mõla ololetala vinene vikusuka vi kuete ci panda 5 kolometulu voku lepa, kilu liosapalalo yombala Yolombangi Via Yehova voluali luosi. Omanu valua toke cilo, va siata oku songuiwa londimbukiso yaco oco va kũlĩhise elivala va kasi kuenda ekalo liotembo.

Eboni wa siata oku mõla ondimbukiso yaco oku upisa konjo yaye ko Brooklyn, wa popia hati: “Ciwa calua oku vanjela ponjanela loku mõla elivala kuenda ekalo liotembo osimbu sia endele kupange. Omo liaco, si cilua kupange kuenda ndi wala uwalo u likuata lekalo liotembo.”

Anga hẽ noke lia 40 kanyamo ondimbukiso yaco haipo yi ka kala?

Citava okuti sio. Omo okuti ombala Yolombangi Via Yehova yi sondolokela konano yo Nova York, omanu va landa osapalalo yaco, ovo va ka nõla nda va yupako ale sio.

Ondimbukiso yatete ya kalapo tunde eci muẽliaco a yi kapapo pa pita ale 70 kanyamo. Olombangi via Yehova via piñainyapo ondimbukiso eyi noke yoku landa osapalalo kunyamo wo 1969.

Ondimbukiso yaco, yi sukila oku yi semulula otembo yosi. Ovitumbulukila vialua viamalẽhe via siata oku yi semũlula, velivala liosi lieteke nda ci sukiliwa.

Ulume umue wa enda oku linga upange waco luteke, wa popia hati: “Eteke limue luteke usongui umue u kuasapulo vo televisão wa tu telefonalela. Eye wa tu sapuila hati, ololosio yene ya cilua 15 kolosengundu. Eye wa yonguile okuti tu yi sokiya ciwa oco a yi lekise vocipama caye luteke. Noke mesele umue ndaño lotulo, wa yi semũlula.

Oco ondimbukiso yaco yi talavaye ciwa kuenda lonjila yimue ya suapo, ya pongoluiwa olonjanja vimue. Vokuenda kuanyamo wo 1980, kondimbukiso yi lekisa ekalo liotembo kua vokiyiwa ocina cikuavo ci kuatisa oku lavulula olograu celsiu, oco vi talavayele kumosi lololosio.

Kunyamo wo 2009 ololampada viosimbu via piñahiwa lololapada viokaliye, okuti via tepulula eci ci soka 4.000 kolondolale via enda oku fetiwa vokuenda kunyamo poku yi semũlula. Koloneke vilo ondimbukiso yaco ka yi sukila ocinyi calua, ndeci kosimbu.