Kosãi Yevambi yo 2013 ko Europa Central kua pita ombela ya koka okuti olondui vieyuka calua. Ko Hungria, olui Danúbio weyukile calua okuti, wa pitãhala olongave viawo okuti ka ca siatele.

Omo liocitangi caco, epalanga ukuakũlĩhisa ekalo liomanu vofeka yo Hungria, wa sonehela kombala Yolombangi Via Yehova nda citava okuti, omanu vocisoko cavo va pondola oku kuatisa kupange woku li teyuila kandunde. Poku eca etambululo, ombala Yolombangi Via Yehova ya laleka akongelo osi a kasi ocipepi lolui Danúbio, oco a kuatise kupange wa sokiyiwa lombiali.

Akongelo osi a tava kelaleko liaco. Koloneke via kuamamo, ci soka 900 Kolombangi via Yehova via tunda kueci ci soka 72 kakongelo va kuatisa kupange woku liteyuila kandunde. Ovo va enda oku kapa okokanda kuvangi mua sonehiwa onduko yavo, olupale va tunda locisonehua hati, “Olombangi Via Yehova”.

Usongui umue wocisoko co Cruz Vermelha vo Hungria wa tuma ukanda vekongelo limue poku soneha hati: “Ene u sesamẽla epandiyo kuenda esumbilo lietu. Ongangu ndeyi yoku likuata omunga kuenda oku talavayela kumosi ka ya siatele, loku kongelamo ungende wa lingi. Ñuete esanju lioku vangula catiamẽla kokangu yiwa wa siati oku eca volupale luetu!”

Usongui umue wocisoko ca siata oku eca ekuatiso, okuti o pangavo onepa kombiali yofeka vo Hungria, wa tuma ukanda kombala Yolombangi Via Yehova loku eca olopandu omo liekuatiso va eca.