O jw.org yi kasi oku kuatisa omanu voluali luosi. Toke kosãi ya Kupemba yunyamo wo 2014, ombala Yolombangi Via Yehova, ya tambula ovikanda Violopandu vonumbi yaco.

“Ñuete omõla umue okuti handi ka kasi vutunga woku enda kosikola, pole eci a tunda konjo yoku tata omãla o nena olapi, ovikuata vioku papala kuenda ovindalasa vioku liteyuila kutanya viakamba vaye. Tua sapela laye olonjanja vialua okuti eci a kasi oku linga, ci lomboloka oku nyana kuenda oku nyana ekandu. Elikolisilo lietu ka lio kuatisile omo liaco, tua tapa vo jw.org ovideo losapi hati, Oku Nyana Cĩvi. Ovideo yaco yo kuatisa calua. Noke yoku tala ovideo yaco, ovina viosi wa vi tiuwiya momo wa limbuka okuti ku Suku oku nyana ekandu. Onumbi eyi ya tu kuatisa calua!” — D. N., África.

“Omãla vange va sole calua onumbi yetu yo Internet. Ovo va tapa olovideo vi lekisa eci Embimbiliya li longisa catiamẽla koku kemba kuenda koku nyana. Ovo va lilongisavo ovituwa vikuavo vi kuete esilivilo vi ka va kuatisa kovaso yoloneke kuenda oku lekisa ovituwa viwa posi va kasi.”— O. W., ilhas do Caribe.

“Ame lalimue eteke nda solele oku enda kosikola kuenda olonjanja vialua nda sima oku liwekapo oku tanga. Pole eteke limue nda tanga vo jw.org ocipama cimue losapi hati, ‘Ndi Liwekapo hẽ Oku Tanga?’ Ocipama caco ca ñuatisa oku kuata ocisimĩlo ca sanguluka catiamẽla kosikola. Vocipama caco nda lilongisa okuti oku enda kosikola ci ka ñuatisa kovaso yoloneke kuenda ci ka kuatisavo oku kala omunu umue ukualondunge.”— N. F., África.

“Alungulo a sangiwa vonumbi yaco, a ndi longisa oku lekisa ovituwa viwa kosikola. Nda lilongisavo oku tiamisila utima kelilongiso kuenda oku yuvula ovina vi ndi tateka oku lilongisa.”—G., Africa.

“Ukãi umue tu talavayela kumosi, wa sakalalele calua omo okuti omõlaye ukãi wa kala oku liyaka locitangi coku sanumuiwa kosikola, ca piãla enene lumãlehe ukuavo ufeko. Omõlaye ukãi wa kuata usumba walua okuti wa pita oloneke vimue ka endele kosikola. Omo liaco, nda sapela lukãi waco catiamẽla katosi amue a sangiwa vovideo losapi hati: Ndomo o Yuvula Oku Yaka Eci va ku Sanumula, yi sangiwa vo jw.org. Eye wa sola calua, capiãla enene elungulo lioku lekisa ocituwa casunguluka poku potolola ocitangi caco. Eye wa sapela lomõlaye catiamẽla konjila ndomo a pondola oku yuvula oku yaka eci vo sanumula. Omo liaco, omõlaye wa fetika vali oku endaenda kosikola loku lekisa utõi. Vokuenda kuotembo, ocitangi caco ca potoluiwa kuenda ufeko waco wa enda oku u sanumula, wa linga ekamba liaye.”—V. K., Leste Europeu.

“Ngeca olopandu omo liocipama ci sangiwa vonumbi yo Internet, losapi hati: ‘Por que eu me corto?’ Nda siata oku liyaka locitangi caco vokuenda kuotembo yalua. Nda simile okuti ame lika nda kala oku liyaka locitangi caco kuenda ndaño nda setekele oku sapuilako vakuetu ocitangi caco, nda lomue wa kuata elomboloko liaco. Ovolandu a tukuiwa vocipama caco, a ñuatisa calua. Ciwa oku kũlĩha okuti kuli omunu umue o kuete elomboloko liocitangi nda siata oku liyaka laco!”— Umãlehe umue ko Austrália.

“Lekuatiso lionumbi yo internet jw.org, ca leluka oku sanga ekuatiso liovitangi amãlehe va siata oku liyaka lavio. Ovideo yimue, ya ndi kuatisa oku limbuka eci ci lomboloka oku yonjiwa oku lipekela lomunu umue. Nda limbuka okuti ame muẽle olonjanja vimue nda yonjiwile ale oku lipekela lomunu umue, pole, cilo nda kũlĩha eci ndi sukila oku linga oco ndi liteyuile.”— T. W., ilhas do Caribe.

“Omõlange umãlehe o kuete ocitangi cokuti ka tẽla oku kala pamosi. Ocituwa caco, olonjanja vialua ci ndi kavisa calua. Omo liaco, ka tua kuatele ocituwa coku sapela. Eteke limue nda iñila vo jw.org kuenda nda kũlĩhisa ovipama viatiamẽla kolohueli kuenda kolonjali. Omo mu sangiwa ovipama vialua vi lombolola ocitangi ndi kasi oku liyaka laco kuenda via ndi lekisa ndomo ndi pondola oku sapela lomõlange. Onumbi yaco ya kuatisavo calua omõlange. Cilo, eye o tẽla oku sapela ciwa lame loku situlula ovisimĩlo viaye.”—C. B., África.

“Kokuetu tu lonjali, o jw.org yi pondola oku tu kuatisa oku lekisa esanju poku longisa omãla vetu. Onepa ndeci oviluvialuvia vi sonehiwa vemẽla liyela, yi lekisa ndomo ku nõliwa akamba vocili ya kuatisa omãla vetu oku linga ukamba lonjila yimue ya sunguluka kuenda oku nõla akamba va ka va kuatisa oku kuata ovituwa viwa. Olonjanja viosi omãla vetu va liyaka locitangi cimue, vo jw.org mu molẽha ocipama cimue ci lombolola ocitangi caco. Oyo yi kuatisa calua.”— E. L., Europa.

“Ame lukãi wange tunde eci tua kuela papita ale anyamo epandu. Ndeci ca siata volohuela viosi, ka ca lelukile omunu lomunu pokati ketu oku kuata elomboloko liocituwa cukuavo coku sapela kuenda ovisimĩlo vietu. Ocipama losapi hati: ‘Como ser um bom ouvinte’ ci sangiwa vo jw.org ca mbetiya calua. Vocipama caco mu sangiwa olonubi viwa viatiamẽla koku mioñolola ocituwa coku yevelela. Nda tanga ocipama caco kuenje nda ci lekisa kukãi wange. Tu kasi oku seteka oku kapako olonumbi viaco viwa.”—B. B., ilhas do Caribe.

“Ndi kuete ukamba Lombangi via Yehova tunde vunyamo wapita, kuenda ndi sole calua o jw.org. Onumbi yaco ya ndi longisa oku likandangiwa konyeño kuenda oku kala ulume umue kuenda onjali yiwa. Ndi pondola oku popia lutõi hati onumbi yaco ya popela olohuela viange.” — L. G., ilhas do Caribe.

“Lekuatiso lionumbi yo internet jw.org, ndi liyevite okuti ñasi lomuenyo. Olovideo vi lekisiwa Kelimi Lioku yi laika Lio ko Amerika, via ñuatisa oku mioñolola ocituwa cange coku sapela. Ndaenda oku sima okuti lalimue eteke ha kuata ocimãho cimue komuenyo, pole, eci nda tala ovideo losapi hati: “Eu Amo a Bíblia em Língua de Sinais,” nda kuata esanju kuenda nda nõlapo oku tiamisila utima wange kovina viwa komuenyo.”— J. N., África.

“Onumbi yo internet, yi kuete esilivilo lialua. Nda lieca olumue koku kuatisa omanu ovisitatũi, ca piãla enene amãlehe. Ovimãleho vialua kelimi liovindekaise via ndi kuatisa oku mioñolola uloño wange woku sapela. Onumbi eyi yi ngecelela oku kuatisa vamue oku potolola ovitangi vepata liavo kuenda oku tumbulula ukamba wavo.” — K. J., ilhas do Caribe.

“Ame ndimeke kuenda o jw.org yi ñuatisa calua. Lekuatiso lio jw.org ndi pondola oku tapa ovolandu alua okuti, nda cambata otembo yalua oco ndi a tambule. Onumbi yo internet ya kuatisa calua epata liange kuenda ya ñuatisavo oku lekisa ovituwa viwa. Oyo yi ñuatisavo oku tambula olonumbi votembo yimuamue lakamba vangue okuti va lete.”— C. A., América do Sul.

“Komanu vana okuti ka va tẽla oku tanga o braile ale ka va kuete olombongo vioku landa alivulu o braile, o jw. org, uhuasi umue. Ovipama via ngalavaliwa, vi kuatisa olomeke oku kũlĩha ovina vialua. Eyi onumbi yimue ya pangiwila omanu vosi. Oyo yi kuatisa olomeke ndeci ame oku liyeva okuti va sumbiwa lomanu vakuavo vofeka.”— R. D., África.

“Etepiso li kasi pokati konumbi yene yo Internet lolonumbi vikuavo vio internet viatavo akuavo yeyi okuti, oyo ka yi tukula olondaka vina okuti omanu vakuetavo kuenda asongui vatavo ovo lika va pondola oku kuata elomboloko. Kuenda ka yi tu tukula ovolandu alua okuti ka tu tẽla oku a lilongisa. Onumbi yene yo Internet ya leluka kuenda ya teta onimbu. Ka yi tukula olondaka vina okuti ka ca lelukile oku kuata elombloko kuenda ka mu sangiwa elongiso liokuti ovina via tukuluka ño. Oyo ka yi honguisa ekolelo. Pole, yi lombolola okuti ekolelo ocina cimue omanu vosi va pondola oku kuata.”— A. G., Ásia

“Nda si kuete esanju komuenyo nda sia kuatele o jw.org. Voluali lulo okuti omanu ka va kapeleko olonumbi via Suku, onumbi eyi yo internet yi ñuatisa calua. Olonjanja viosi ndi pondola oku tanga kuenda oku yevelela ovipama vi lombolola ovisimĩlo via Suku viatiamẽla kovolandu alua loku kũlĩha atambululo apulilo alua atiamẽla komuenyo.” — J. C., ilhas do Caribe.

“Ame ñasi vokati kusenge kulo Amérika do Sul. Mandula calua omo olonumbi nda siata oku tambula lekuatiso lio jw.org okuti, vi pamisa ekolelo liange. Nda ka ca kaile lekuatiso liaco, ekolelo liange nda lia hongua.”— M. F., Amérika do Sul.