Vokati kusenge wo Amazonia, mu sangiwa onjango yimue Yolohongele Vinene Yolombangi Via Yehova. Onepa yimue yocitumãlo caco yi kuete 128 kolometulu okuti yi sangiwa konano yolupale luo Manaus, kofeka yo Brasil, ya sitikiwa lusenge. Vusenge waco, citava oku yeva oku imba kuolonjila vi kasi kilu lioviti vi sangiwa vocitumãlo caco. Momo lie pocitumãlo caco pa tungiwila Onjango yimue Yolohongele Vinene?

Olupale luo Manaus u sangiwa eci ci soka 1.450 kolokilometulu lapa olui Amazonas lua pesila. Volupale luaco muli eci ci panda olohulukãi 2 komanu. Onjango yokaliye Yolohongele Vinene, mu ka liongoluiwila ci soka 7.000 Kolombangi Via Yehova vi kasi volupale luo Manaus kuenda vana va kasi kalupale akuavo, oku kongelamo omanu va sangiwa vovaimbo a kasi ocipepi lolui Amazonas kuenda ana a kasi ocipepi lolondui vikuavo. Olupale luo São Gabriel da Cachoeira, lu kasi ocipãla kuenda lu sangiwa eci ci pitahãla 800 kolokilometulu kombuelo yolupale luo Manaus. Oco va ende kohongele yimue yimbo ale kohongele yofeka Vonjango yaco Yolohongele Vinene, Olombangi vimue Via Yehova vi linga ungende woloneke vitatu lombaluku!

Oku tungila Onjango yimue Yolohongele Vinene vusenge wo Amazônia ka ca lelukile. Mua kongelele oku tuma ci soka 13 kolokontentore yovimãleho vi sukiliwa kupange waco. Ovimãleho viaco via tunda ketapu liolonaviyu ko Santos, ko São Paulo, via pita kohulo yokalunga vo Brasil oku lamana lolui Amazonas toke eci via pitĩla pocitumãlo caco.

Onjango yaco Yolohongele Vinene ya tẽlisa ci soka 27 kolonjango via tungiwa vofeka yo Brasil kuenda ci soka 1.956 komanu, va kala kohongele yoku tumbika ocitumãlo caco, Calumingu keteke 4 yosãi ya Kupemba wo 2014. Omanu valua va kala lesanju momo ya kala onjanja yatete oku kala kohongele yimue Vonjango Yolohonglele Vinene.

Kohongele yoku tumbika ocitumãlo caco, ka va yevele lika manji wa kala oku linga ohundo, pole vo mola. Eli lia kala epongoloko limue liwa, momo kosimbu olohongele vimbo kuenda viofeka, via enda oku lingiwa vovitumãlo vimue okuti ka ca tavele oku mola embumbua kuenda manji o kasi oku linga ohundo. Ombangi Yimue ya Yehova ya popia hati: “Pa pita ale anyamo alua tunde eci nda fetika oku enda enda kolohongele viofeka, pole lalimue eteke nda tẽlele oku mola ondalama yimue Yembimbiliya. Nda ponduile lika oku yi yevelela.” Pole cilo, omanu vosi va pondola oku mola embumbua.