Oco ku pangiwe Ambimbiliya alua, Olombangi Via Yehova via kapa omakina yokaliye yoku panga alivulu volupale luo Ebina, vofeka yo Japão.

Kefetikilo, kua kala ocitangi cimue colusu omo liocilemawe kuenda o tsunami, ya pita vofeka yo Japão keteke 11 yosãi Yelombo wo, 2011.

Ndaño locitangi caco, upange waco wa fetikiwa kosãi Yenyenye Linene wo 2011. Ka papitile olosãi vitatu, kuenje Ambimbiliya okaliye o Tradução do Novo Mundo, kelimi lio chinês, a fetika oku pangiwa.

Omakina yaco yoku panga alivulu yi kuete 400 kolometulu. Osimbu Ambimbiliya a kasi oku pangiwa, a kapikwa olo kapa, a sipatiwa, a longekiwa kuenda a kapiwa volokasia loku vi kapa olondimbukiso kuenda oku a seleka.

Oco upange waco u lingiwe, ca sukilile oku linga esokiyo kuenda oku songuila upange waco. Ovimalẽho viomakina yaco, via sukilile oku kapiwa olondimbukiso, noke via kapiwa mueci ci soka 34 kolondendor kuenda viambatiwa lonaviyu oku tunda ko Europa oco vi tualiwe kofeka yo Japão.

Ci soka ekũi lia vamanji va talavaya kombala Yolombangi Via Yehova ko Estados Unidos va endele kofeka yo Japão oco va kuatise kupange waco. Vamue va kalako olosãi epandu, oku longisa ndomo vamanji vo ko Japão va lieca olumue va pondola oku talavaya lomakina yaco kuenda oku yi semulula.

Omakina yaco yokaliye ya komõhisa omanu vana va kuatelevo olomakina vioku panga alivulu vofeka yo Japão. Keteke 19 liosãi Yelombo, wo 2012, ci pitãhala ocita comanu vaco veyile oco va kũlĩhe ocitumãlo caco. Ovo va komõha calua.

Osimbu ka va endele, omunu lomunu wa tambula o Tradução do Novo Mundo ya pangiwa lomakina yaco.

Kofiliyale yofeka yo Japão, hakoko lika ku pangiwa Ambimbiliya pole, kolofiliyale vio ko Estados Unidos kuenda ko Brasil, kua siatavo oku pangiwa Ambimbiliya oco a tumiwe Kolombangi Via Yehova.

Olombangi Via Yehova kuenda omanu vakuavo va panga onepa kupange, va sanjukila calua oku talavaya komosi. Onalavayi yimue okuti Hambangiko ya Yehova, ya popia ndoco: “Ene u kasi ndepata kokuange.”

Keteke liasulako liupange waco, onalavayi yikuavo okuti Hambangiko ya Yehova ya popiavo hati: “Upange wange ukuãimo ka u ka leluka, momo ka u ka lisoka lowu ñasi oku linga kulo ko Torre de Vigia!”