Ka ca lelukile oku pongoluila ocisungo cimue kelimi likuavo. Kaliye sokolola oku pongolola elivulu liosi muli ci soka 135 kovisungo.

Ndaño ka calelukile Olombangi Via Yehova via linga upange waco kuenje vokuenda kuanyamo atatu va tẽla oku pongolola elivulu liavo liovisungo losapi hati: Tu Imbili Yehova Ovisungo, kueci ci soka 116 kalimi. Kueci ci soka 55 kalimi akuavo, kua pongoluiwa eci ci soka 55 kovisungo. Ovimunga vikuavo via vakuakupongoluila alivulu kalimi akuavo, vi kasi oku lingavo upange waco.

Olombangi Via Yehova vi kasi oku pongoluila alivulu kueci ci soka 600 kalimi kuenda ci soka 400 kalimi a sangiwa vonumbi yetu yo internet. Pole ka ca lelukile oku pongolola elivulu liovisungo. Momo lie? Momo mua kongela oku pongoluila ulandu waco kalimi a litepa pole u sukila oku likuata lovisikilo vimuamue.

Oku sokiya olondaka viocisungo cimue, ca litepa loku pongolola ulandu worevista yimue. Poku pongolola Utala Wondavululi, vakuakupongolola valikolisilako oku soneha ulandu u sangiwa kelimi liongelesi. Pole oku pongolola elivulu limue liovisungo ca litepa.

Vakuakupongola ovisungo va kuama onjila ya litepa momo ulandu wocisungo ka u sukila lika oku kuata elomboloko, pole u sukilavo oku posoka kuenda oku ivalukiwa lonjila yimue ya leluka.

Olondaka viocisungo visukila oku leluka oco omunu a kuate lonjanga elomboloko kuenda ocimãho colondaka viaco. Kalimi osi, ulandu kuenda ovisikilo vi sukila oku likuata oco vi imbiwe lulelo, ndu okuti omunu o kasi oku cimba volondaka viaye muẽle.

Vakuakupongolola va tẽlisa ndati ocimãho caco? Ovo ka va pongolola ondaka londaka ndomo ci moleha velivulu liovisungo kelimi liongelesi. Pole va pindisiwa oco va sonehe ulandu wovisungo lonjila yimue yi pitiya ocisimĩlo cimuamue leci ci sangiwa kelimi liongelesi. Ocili okuti vakuakupongolola va likolisilako oku soneha ocisimĩlo Cembimbiliya ci sangiwa vulandu wocisungo. Ndaño oco ovo va soneha olondaka via kũlĩhiwa kelimi liavo okuti ca leluluka oku kuata elomboloko liaco kuenda oku vi ivaluka.

Enanga liatete, oku pongolola ulandu wocisugo ndomo u kasi kongelesi. Noke ombangi yimue ya Yehova yi kuete uloño woku sokiya ovisungo, o kuatisa oku pongola ulandu wocisungo oco uposoke loku kuata elomboloko. Noke vakuakupongolola kuenda vakuakutanga va kũlĩhisa upange wa manji o kuete uloño woku sokiya ovisungo oco va tale nda ulandu Wembimbiliya haimo u sangiwa.

Olombangi via Yehova voluali luosi va sanjuka calua poku tambula elivulu liavo liokaliye liovisungo kuenda li lavokawavo kalimi akuavo.