Olombangi via Yehova vi kasi oku likolisilako oco vakundile omanu kalimi a vanguiwa vofeka yo Irlanda kuenda ko Grã-Bretanha. * Kolofeka viaco omanu ka va vangula lika ongelesi, pole va vangulavo o irlandês, o gaélico escocês kuenda o galês.

Kosãi Yenyenye Linene yunyamo wo 2012, vonumbi yo jw.org mua sandekiwa onepa yimue mu sangiwa alimi alua oku kongelamo o irlandês kuenda o galês; kuenda kosãi Yenyenye yunyamo wo 2014, mua sandekiwavo o gaélico escocês. Handi vali kua siatavo oku sandekiwa alivulu alua kalimi aco. Omanu va siata oku tambulula ndati?

Ocitunda cimue cetavo ca tambula okokanda kelimi lio gaélico escocês, kuenda wa ka tanga lolukandi velivala liaco kuenje wa fetika oku lila. Momo lie a lilila? Eye wa komõha ndomo ulandu waco wa pongoluiwa kuenda wa pula hati: Helie wa pongolola ulandu owu? Wa pongoluiwa ciwa!”

Ci soka 750 komanu, va iñila vonumbi yo jw.org kelimi lio gaélico escocês kosãi yatete eci ya sandekiwa.

Ulongisi umue woko Universidade Nacional da Irlanda, kolupale luo Galway, wa sapuila Ombangi yimue ya Yehova hati, ka yongola oku vangula catiamẽla ketavo. Pole eci a limbuka okuti o pondola oku tambula ombrochura losapi hati, A Bíblia — Qual É a Sua Mensagem? kelimi lio irlandês, wa pingako yimue. Eye wa popia okuti omanu vosi va sukila oku kuata epuluvi lioku tanga alivulu a tiamẽla Kembimbiliya kelimi liavo muẽle, kuenda wa pandiya Olombangi via Yehova omo lia likolisilo avo oku sandeka alivulu kelimi lio irlandês.

Ukãi umue wa kukua wa lombolola esanju a kuata eci a tambula ombrochura kelimi lio galês poku popia hati: “Oku vangula ocili, nda wa nyihile elivulu eli kelimi liongelesi, nda sia tambuile pole, ndi ka sanjukila oku li tanga kelimi liange muẽle.”

Kosãi Yenyenye yunyamo wo 2014, alivulu a sandekiwa kelimi lio galês vo jw.org. a livokiya. Kuenda etendelo liomanu va iñila vo jw.org. oco va tange alivulu kelimi lio galês, lia livokiya calua kosãi yaco.

Eci Yesu a lomboluila olondonge viaye vivali ovisonehua, ovo va popia lesanju hati: “Ovitima vietu ka via tokotele hẽ eci a vangula letu vonjila, leci a tu situluila Ovisonehua?” (Luka 24:32, etosi) Nda ocili Cembimbiliya ci lomboluiwa ciwa kelimi liomanu, ci va kuatisa komuenyo wavo.

Ulume umue o tukuiwa hati, Emyr, Kofeka yo Gales, wa kuela Lombangi yimue ya Yehova, lalimue eteke a lekisile onjongole ketavo liukãi waye. Noke wa linga ukamba lulume umue Ombangi ya Yehova o tukuiwa hati, Russell. Emyr wa lombolola ovina vio vetiya oku pongolola ovisimĩlo viaye poku popia hati: “Nda nõla oku lilongisa Embimbiliya eci Russell a nyiha elivulu Embimbiliya li Longisa Nye? * kuenda wa popia hati: ‘Elivulu eli lia sonehiwa kelimi lio galês. Cilo muẽle, tu fetika oku li lilongisa kavali.’” Momo lie Emyr a solela onjila ndomo Russell a sapela laye? Eye wa lombolola hati: “Etu tu vangula elimi limuamue, ekalo lietu limuamue kuenda tu litava tava pokati.” Emyr wa yeva “esanju” eci a kũlĩhisa Embimbiliya kelimi liaye muẽle momo ovina viosi volomboluila violomboloka.

Olombangi Via Yehova vi ka amamako oku kuatisa omanu oku lilongisa velimi liavo ocili catiamẽla ku Suku, elimi li vetiya utima wavo.