Ko Mexico kuenda kolofeka vitãlo vio America Central kuli eci ci soka 290 ya vamanji va lieca olumue kupange woku pongolola alivulu kueci ci pitahãla 60 kalimi. Momo lie kulingiwila upange waco? Momo eci omanu va tanga alivulu kelimi liavo muẽle, va kuata elomboloko liwa kuenda esapulo liaco li vetiya ovitima viavo.—1 Va Kor. 14:9.

Oco alivulu a kuate upopi umue uwa, vamanji vamue va talavayele kombala Yolombangi Via Yehova volupale luo Mexico, va yilukila koloseketa vi sangiwa kovitumãlo vava vangula alimi aco. Momo lie ca kuatela esilivilo? Vamanji va kasi kupange woku pongolola alivulu, va kuete epuluvi lioku kala lomanu va vangula elimi liavo kuenje ci va kuatisa oku pongolola alivulu lonjila yimue ya leluka oku kuata elomboloko.

Vamanji va kasi kupange woku pongolola alivulu va liyeva ndati omo lie pongoloko liaco? Federico okuti o pongolola alivulu kelimi lio Náuatle guerrero wa popia hati: “Nda kala eci cipanda ekũi kanyamo volupale luo Mexico kuenda nda sanga lika epata limosi li vangula elimi liange. Pole cilo alupale osi akasi ocipepi loseketa yoku pongolola omanu vosi va vangula elimi liange!”

Karin o kasi kupange woku pongolola alivulu kelimi lio baixo-alemão voseketa yimue yi kasi volupale luo Chihuahua ko Mexico wa popia hati: “Oku kala kumosi lo lo Menonitas, ci ñuatisa oku kũlĩha ndomo va vangula. Tu kasi kuenda tu talavaya volupale lumue lutito kuenje eci ndi vanja ponjanela ndi mõla omanu va ka kuatisiwa lupange woku pongolola tu kasi oku linga.”

Neyfi okuti kaliye o kasi vosekete yoku pongolola alivulu volupale luo Mérida, ko Mexico wa popia hati: “Eci tu longisa Embimbiliya komanu va vangula elimi lio Maia, tu limbuka okuti kuli olondaka vimue okuti ovo ka va kuata elomboloko liwa. Omo liaco ku pange wetu, tu likolisilako oku soneha olondaka viaco vu popi wa leluka.”

Omanu va kala ndati eci va tambula elivulu lia pongoluiwa kelimi liavo? Kũlĩhisa ulandu umue: Elena, okuti o vangula elimi lio Tlapaneco, tunde eci a fetika oku endaenda kolohongele Violombangi via Yehova, papita ale 40 kanyamo. Pole omo okuti olohongele via enda oku lingiwa kelimi lio Espanhol, eye ka kuatele elomboloko liovina va enda oku lilongisa. Eye wa popia hati: “Nda kũlĩhile lika okuti, eci njongola oku kala kolohongele.” Omo liaco, eci Elena a fetika oku lilongisa Embimbiliya lekuatiso liombrochura kelimi lio Tlapaneco, ocisola a kuetele Suku ca livokiya. Kuenje kunyamo wo 2013 wa tumbika omuenyo waye ku Yehova kuenda wa papatisiwa. Elena hati: “Mandula calua Yehova omo a ecelela okuti ndi kuata elomboloko liocili Cembimbiliya.”