Olombangi via Yehova via kũlĩhiwa omo liupange wavo woku pongolola alivulu kalimi akuavo. Toke kosãi ya Kuvala yunyamo wo 2014, tua pongoluila Embimbiliya kueci ci soka 125 kalimi kuenda alivulu a lombolola ovolandu Embimbiliya kueci ci soka 742 kalimi. Vupange wetu mua kongelavo oku pongolola olovideo. Toke kosãi ya Susu yunyamo wo 2015, ovideo losapi hati, Nye ci Lingiwa Vonjango Yusoma? ya sandekiwa kueci ci soka 398 kalimi, kuenda ovideo losapi, Momo lie ndi lilongisila Embimbiliya? ya sandekiwa kueci ci soka 569 kalimi. Momo lie kua lingiwila upange waco? Kuenda tua tẽla ndati oku linga upange waco?

Kosãi Yelombo yunyamo wo 2014, osungu Yolombangi Via Yehova yahandeleka olofiliale viosi oco vi linge upange woku ngalavala olovideo kalimi osi citava locimãho coku fetika alilongiso Embimbiliya.

Voku pongolola ovideo yimue mua kongela upange walua. Catete ocimunga ci pongolola ulandu waco. Noke oco yi ngalavaliwe ku nõliwa va manji va vangula elimi liaco. Kuenje vamanji va talavaya kupange woku ngalavala, va ngalavala ovideo kelimi liaco, va kũlĩhisa lutate upange waco, kuenda oku sokiya olondaka vi mõleha vovideo. Oku sulako va kongela ovina viaco viosi loku yi kapa vonumbi yetu yo internet.

Olo filiyale vimue via kuatele ale oloseketa vioku ngalavalela kuenda vamanji va pindisiwa oco va linge upange waco. Pole nye ci popiwa catiamẽla kalimi ana a vanguiwa kuenda a pongoluiwila voloseketa vi kasi ocipãla lo filiyale?

Kolonepa viosi violuali, vamanji vakuakungalavala va talavaya lolomakina vi kuatisa oku linga upange waco. Loku kapa enguena kuenda o kombutador yi kuatisa oku ngalavala, manji o ngalavala angiliya ocitumãlo cimue voseketa yimue, Vonjango Yusoma ale vonjo yimue citava oku lingilamo upange. Vamanji va vangula elimi liaco va tanga ovolandu aco, va talavaya ndasongui vupange kuenda oku konomuisa nda olondaka via ngalavaliwa ciwa. Noke yoku mala oku ngalavala loku kũlĩhisa okuti citava oku yi sandeka vonumbi yetu, manji o linga upange woku ngalavala o longeka olomakina viaye kuenje wenda kocitumãlo cikuavo.

Omo liaco, etendelo liolovideo via pongoluiwa lia livokiya calua okuti kosimbu ci sule.

Omanu va sanjukila calua olovideo viaco. Komanu valua, evi olovideo viatete ovo va mõla kelimi liavo muẽle. Limue pokati kalimi ovideo yaco ya ngalavaliwa elimi lio pitjantjatjara li vanguiwa ko Austrália leci ci soka 2.500 komanu. Ovideo yaco ya ngalavaliwila vimbo limue li tukuiwa hati, Alice Springs, Konano yofeka. Callan Thomas okuti wa kuatisa kupange woku ngalavalaya wa popia hati: “Omanu va sola calua olovideo viaco. Omanu va vangula elimi liaco, va sandiliya calua olovideo viaco kuenda va yonguile oku kũlĩha apa va pondola oku sanga olovideo vikuavo. Ka ca lelukile oku sanga alivulu kelimi liaco. Omo liaco, va komõha calua eci va mola ovideo yaco kelimi liavo muẽle.”

Olombangi vivali Via Yehova kofeka yo Camarões via kala oku linga ungende vowato umue. Noke va talama vimbo limue lia va Pigmeu kuenda va sapela la soma yimbo liaco, okuti wa kala ulongisi wosikola yimue vimbo liaco. Eci vamanji va limbuka okuti o vangula elimi lio Bassa, vo lekisa ovideo losapi hati, Momo lie ndi lilongisila Embimbiliya? kelimi liaye muẽle. Soma wa sola calua ovideo yaco kuenda wa pinga alivulu amue.

Vimbo limue kofeka yo Indonésia, usongui umue wetavo wa lambalala Olombangi Via Yehova kuenda wa timiha alivulu osi va ecele komanu. Vakuavo va seteka oku timĩha Onjango Yusoma. Noke akuenje vakuãla velombo va endele konjo Yombangi yimue ya Yehova oco voko sombise kumue lepata liaye. Ovo va yonguile oku kũlĩha eci ci lingiwa Vonjango Yusoma, kuenje manji wa lekisa ovideo losapi hati, Nye ci Lingiwa Vonjango Yusoma? kelimi lio indonésio.

Noke yoku tala ovideo, umue pokati kakuenje velombe wa popia hati: “Cilo nda limbuka okuti omanu lacimue va kũlĩha catiamẽla kokuene kuenda oco va kulambalaleli.” Ukuenje ukuavo welombe wa pula hati: “Citava oku nyĩha ovideo eyi oco ndi yi lekise komanu vakuavo? Ovideo eyi yi lekisa ulandu wa koleliwa watiamẽla kokuene.” Cilo, akuenje velombe va kuete ocisimĩlo cikuavo catiamẽla Kolombangi Via Yehova kuenda va sanda oku vi teyuila.

Nda okuti handi kua muile olovideo viaco, momo lie ku vi talela kelimi liove?