Kunyamo wo 1987 manji Lyman Swingle, okuti o panga onepa Kosungo Yolombangi Via Yehova wa lingila ohundo yimue kueci ci soka 63.580 komanu va liongoluile vocila cimue ci tukuiwa hati, Plaza Monumental de Valência, ko Venezuela. Omanu valua va enda uteke wosi lokalela oco va ka yevelele ohundo yaco. Manji Lyman Swingle wa sapuila olonjeveli hati: “O filiyale yene ka yititoko vali. Cilo ombala yene ya pita pokati. Kuenda ndopo vu tẽlisa etendelo lieci ci soka ‘100.000 kakundi’!”

Kunyamo wo 1987 vo Venezuela mua kala eci ci pitãhala 38.000 kakundi, va kala oku kunda olondaka viwa Viusoma. Kotembo yaco kua kala lika olofeka ecelãla via kuatele ci pitãhala 100.000 kakundi.

Onjila ndomo olombangi Via Yehova via livokiya koluali luosi ci komohĩsa. Noke Liuyaki Watete wa Pita Voluali Luosi kua kala lika etendelo limue litito liomanu va enda oku kunda Usoma wa Yehova. Pole ekalo liaco lia pongoloka. O Anuário Yolombangi Via Yehova yunyamo wo 1943 ya lombolola ndoco: “Ulandu wunyamo wo 1942, ndaño ka wa sokelepo omo liekambo lioku sapela, uwa calua ... Momo u lekisa okuti voluali luosi muli eci ci pitãhala 106.000 kakundi va litumbika kupange [woku kunda olondoka viwa].” Ndaño muẽle vokuenda Kuyaki Wavali wa Pita Voluali Luosi omanu valua va tava kocili Cembimbiliya. Kunyamo wo 1950, kofeka yo Estados Unidos mua kala eci ci pitãhala 100.000 kakundi.

Ofeka yikuavo ya tẽlisavo ci soka 100.000 kakundi kunyamo wo 1974, o Nigéria.

Vunyamo wa kuamamo etendelo liakundi vofeka yo Brasil kuenda ko Alemanha lia pitãhala 100.000 kakundi. Evokiyo liaco kovifuka vikuãla via lekisa okuti ocili Cembimbiliya ca vetiya ovitima viomanu voluali luosi.

Etendelo liomanu va tava kolondaka viwa liamamako oku livokiya voluali luosi. Evokiyo liaco lia tẽlisa ocitumasuku cokuti: “U o sule o linga epata, lu otito o linga ofeka ya pama.” (Isaya 60:22)

Ndomo ca lekisiwa vulandu upange unyamo wo 2014 ci soka 24 kolofeka muli eci ci pitãhala 100.000 Kolombangi Via Yehova. Oku kongelamo ofeka yo Venezuela okuti ya tẽlisa etendelo liaco kunyamo wo 2007. Voluali luosi muli eci ci soka 115.416 kakongelo Olombangi Via Yehova kuenda 8.201.545 kakundi.