Kunyamo wo 2014 konano yo França, volupale luo Rouen, olohuluwa viomanu via nyula ocitanda pa liongoluila omanu vo kolofeka viosi, va sanga o kuadro mua sonehiwa osapi yokuti, “Embimbiliya: Hẽla liapita, etali kuenda hẽla liya.”

Oco va vetiye onjongole yomanu, posamua pa kala o televisau yi lekisa oviña viosimbu Viembimbiliya. Vokati omanu va pondola oku kũlĩha ovina vikuavo viatiamẽla kolonumbi Viembimbiliya, ovolandu a suapo, oku litava kualio luloño kuenda ndomo lia sandekiwa voluali luosi.

Va lekisavo ndomo Embimbiliya lia puluka vokuenda kuotembo, okuti toke cilo omanu valua va pondola oku li tanga ci kale vopapelo ale vo Internet. Omanu vosi va pita va tambula ocali o Tradução do Novo Mundo, Embimbiliya limue Olombangi Via Yehova via sandeka kueci ci pitãhala 120 kalimi.

Omanu valua va pandula Olombangi Via Yehova omo lionjongole yavo yoku eca Embimbiliya komanu vosi. Usongui umue wocimunga cimue comãla, noke yoku kũlĩhisa ocitumãlo caco wa popia hati: “Embimbiliya onepa yimue yocipiñalo cetu. Elivulu limue li kasi lomuenyo. Olonjanja viosi ndi tanga Embimbiliya, ndi sangamo olonumbi vi ñuatisa oku potolola ovitangi viange.”

Ukãi umue o kuete 60 kanyamo wa lisalukako eci a yeva okuti o pondola oku kopa Embimbiliya ocali. Eye wa popia hati: “Omanu vosi va sukila oku fetika oku tanga Embimbiliya momo vosi yetu tu li sukila!”