Oku upisa keteke 13 toke 16 yosãi ya Kuvala yunyamo wo 2014, kua lingiwa Ocitanda Calivulu co Toronto kofeka yo Canadá. Ocitanda caco ca kapiwa pocitumãlo cimue ci tukuiwa hati, Centro de Convenções Metro Toronto, kuenda kua kapiwa alivulu oku tanga peka kuenda votelefone. Vokuenda kuoloneke vikuãla, ci soka 20.000 komanu va endele pocitanda caco.

Pokati komanu va linga ocitanda caco, pa kala Olombangi Via Yehova, okuti va kapa omesa yimue kuenda otulopatilela tukuavo kumue lolo tablets okuti omanu va pondola oku iñila vonumbi yo internet jw.org.

Umue pokati kasongui opocitanda caco wa popia hati: “Onumbi yene yo internet yokaliye. Ndi sima okuti omanu vakuavo pocitanda nda va linga ndeci ene wa lingi.” Omanu va endele pocitanda caco va popia okuti onumbi yaco ya leluka oku iñilamo kuenda mu sangiwa olonumbi vi kuete esilivilo. Ovo va komõha calua poku mola ndomo onumbi yaco yo internet yi kuatisa omanu oku liyaka lovitangi kuenda asakalalo.

Poku sapela lomanu veya oku nyula ocitanda caco, Olombangi Via Yehova via limbuka okuti osimbu ka kua sokiyiwile ocitanda caco, omanu valua lalimue eteke va yevele ovina viatiamẽla konumbi yetu yo internet jw.org. Omanu valua va tava oku tambula okokanda losapi hati: Pi tu Pondola Oku Sanga Atambululo a Velapo Atiamẽla Komuenyo? Omanu valua va popia okuti va ka iñila vali vonumbi yaco, kuenda vamue va pinga oco Ombangi yimue ya Yehova yi va nyule konjo yavo.

Vosemana yaco votãlo ca kala “Eteke Liomãla” pocitanda calivulu. Kuenje Olombangi Via Yehova via lekisa ovideo yi lekisiwa Voviluvialuvia vi Sonehiwa Vemẽla li Yela yi sangiwa vo jw.org, kuenje olondonge kuenda alongisi vavo va talama oco va tale olovideo viaco.

Ulume umue wa tunda volupale wo Chicago okuti o talavaya kupange woku panga Ambimbiliya wa sola ndomo o Tradução do Novo Mundo ya kapiwa vopatilela ya pangiwa. Eye wa yonguile oku sanga asongui vokofiliyale, kuenje Olombangi Via Yehova via eca kokuaye okokanda kepasu.

Kueci ci soka 700 kalimi a sangiwa vonumbi yaco, omanu va tapa eci ci soka 16 kalimi ndeci: Elimi lio Amarika, lio Bengali, lio Chinês, Liongelesi, lio Fransesi, lio Helasi, lio Gujarati, lio Hindi, lio Koreano, lio Putu, lio Espanyole, lio Sueko, lio Tâmil, lio Tigrínia, lio Urdu kuenda elimi lio Vietename.

Ombangi yimue ya Yehova okuti ya tambula omanu veya komesa yaye, ya limbuka okuti kuli etepiso poku vangula lomunu umue catiamẽla ko jw.org kuenda oku yi lekisa. Eye wa popia hati: “Lia kala epuluvi limue liwa lioku sandeka onumbi yetu.”