Kosaĩ Yenyenye Linene yunyamo wo 2014 Olombangi Via Yehova voluali luosi va eca okokanda ka lekisa onumbi yetu yo internet jw.org. Noke liupange waco etendelo liomanu va iñila vonumbi yetu, lia livokiya eci ci soka 20 koloporsendu vo kuenda kuosãi yaco okuti ya pitĩla eci ci panda 65 kolohuluwa viomanu. Ci panda 10.000 komanu voluali luosi va pinga elilongiso Liembimbiliya lekuatiso lionumbi yaco okuti ketendelo liosãi ya pita kuavokiya eci ci soka 67 koloporsendu! Upange waco wa kuatisa omanu voluali luosi.

Ombangi yimue ya Yehova ko Canadá ya lama Madeline vo elevador kuenda wa lekisa okokanda a kala okuava losapi hati: Pi tu Pondola Oku Sanga Atambululo a Velapo Atiamẽla Komuenyo? Madeline wa popia okuti vu teke wa pita wa kala pocivembele conjo yaye oku likutilila ku Suku oco o kuatise oku sanga atambululo. Eye wa telefonalela katavo alua loku pinga elilongiso Liembimbiliya pole la limue lia tambulula. Kuenje wa fetika oku lilongisa Embimbiliya Lolombangi Via Yehova.

Ulume waco wa popia hati lalimue eteke a muile Embimbiliya limue. Ombangulo yaco ya vetiya ulume waco oku enda kohongele yimue yimbo Yolombangi Via Yehova. Noke wa popia okuti wa yonguile oku kũlĩha vali ovina vikuavo viatiamẽla Kembimbiliya kuenda o tapa onumbi yetu yo internet.

Guillermo okuti ocisitatuĩ kuenda Ombangi ya Yehova, kofeka Espanha, wa sanga Jorge omunu umue va tangelele kumosi kosikola okuti ocisitatuĩvo. Jorge wa popia okuti inaye ndopo a fa kuenda eye o kuete apulilo alua. Guillermo wa eca kokuaye okokanda va kala oku eca kuenda wolomboluila ndomo a pondola oku sanga vo jw.org ovolandu kelimi liovindekaise okuti a pondola oku tambulula apulilo aye. Guillermo wa lalekavo Jorge oco ende kohongele Vonjango Yusoma. Eye wa tava kuenje lalimue eteke alañele kolohonge ndaño okuti o sukila oku enda ci soka 60 kolometulu oco a pitĩle Konjango Yusoma.

Ndaño okuti mua kongela oku pesela olombongo vialua olohueli vivali okuti Olombangi via Yehova kofeka yo Groenlândia va linga ugende weci ci soka olowola epandu lowato umue utito oco va pitĩle vimbo limue muli ci soka 280 komanu. Ovo va kunda, va eca otuikanda kuenda va lekisa ovideo yimue vopa vo jw.org kelimi lio groenlandês. Va fetikavo oku longisa Embimbiliya kohueli yimue. Cilo, va songola elilongiso liaco lekuatiso lio telefone olonjanja vivali vosemana.

Upange waco ka wa lingiwuile lika Konano Yofeka. Olonbamgi Via Yehova kofeka yi Nicarágua va linga esokiyo lio ku eca okokanda kaco vimbo lio Mayangna, oco va kundile omanu va vangula elimi lio Karibe. Noke lio kuenda ci soka 20 kolohola vokalela kamue ka li kasi ciwa kuenda vetapalo limue lieyuka yikulungu, va sukila oku enda vali ci soka 11 kolowola, olonjanja vimue vatapalo mu yuka olonata oco va pitĩle kovaimbo aco. Eci va pitĩla, va eca otuikanda kuenda va lekisa olovideo kelimi lio mayangna. Omanu vimbo liaco, va komõha calua kuenda va sanjuka.

Estela, wa eca okokanda kulume umue wa kala oku pita volupale lumue vusenge wo amazônia kofeka yo Brasil. Ulume waco ka lekisile onjongole poku tambula okokanda kaco, kuenje wa ka kapa vonjipẽla. Eci a kala oku enda konjo, o mutor wowato waye wa nyõleha kuenje wa talama volui. Osimbu a kala oku kevelela omanu veya oku u kuatisa, ulume waco wa tanga okokanda. Lekuatiso liotelefone yaye, wa iñila vo o jw.org kuenda wa tanga ovipama vialua loku tapa olovideo vialua. Noke yoloneke vimue, ulume waco wa lisanga lulume wa Estela kuenje wa pinga oco a pitiye olopandu viaye omo liokokanda. Eye wa popia hati: “Osimbu nda kala volui, ovipama nda tanga via ndi lembeleka toke eci owuato ukuavo wa pitĩla oco va ñuatise. Omãla vange va sole calua olovideo via Kalembe. Ndi ka iñila vo jw.org olonjanja vialua.”