مسیحیوں کے طور پر زندگی
کتاب ”خدا کی سنیں“ کو اِستعمال کرنے کا طریقہ
کتاب ”خدا کی سنیں“ کو اِس لیے تیار کِیا گیا ہے تاکہ تصویروں کے ذریعے اُن لوگوں کو بائبل کی بنیادی سچائیاں سکھائی جا سکیں جو پڑھ نہیں سکتے۔ ہر باب دو صفحوں کا ہے اور اِس میں کافی تصویریں ہیں۔ ہر تصویر کے ساتھ ایک نشان ہے جو ظاہر کرتا ہے کہ اِس کے بعد کس تصویر پر بات کی جائے۔
کتاب ”خدا کی سنیں اور زندگی پائیں“ میں وہی تصویریں ہیں جو کتاب ”خدا کی سنیں“ میں ہیں۔ لیکن اِس میں زیادہ عبارتیں لکھی ہیں۔ اِس لیے اِسے اُن لوگوں کو تعلیم دینے کے لیے اِستعمال کِیا جا سکتا ہے جو تھوڑا بہت پڑھ سکتے ہیں۔ جب طالبِعلم کتاب ”خدا کی سنیں“ کو اِستعمال کرتا ہے تو بہت سے مبشر کورس کراتے وقت اپنی آسانی کے لیے کتاب ”خدا کی سنیں اور زندگی پائیں“ کو اِستعمال کرتے ہیں۔ بہت سے صفحوں کے آخر میں ایک بکس میں اِضافی معلومات دی گئی ہے۔ طالبِعلم کی صلاحیت کو ذہن میں رکھتے ہوئے اِس پر بھی بات کی جا سکتی ہے۔
اِن میں سے کسی بھی کتاب کو کبھی بھی پیش کِیا جا سکتا ہے، چاہے اِنہیں اُس مہینے میں پیش کرنے کی ہدایت دی گئی ہو یا نہیں۔ بائبل کورس کراتے وقت لوگوں کو تصویروں کی مدد سے بائبل میں درج واقعات سمجھائیں۔ کورس کرنے والے شخص سے سوال کریں تاکہ وہ اپنے خیالات کا اِظہار کر سکے اور آپ بھی دیکھ سکیں کہ وہ بات کو سمجھ رہا ہے یا نہیں۔ ہر صفحے کے آخر میں دی گئی آیتوں کو پڑھیں اور اِن پر بات کریں۔ اِس کتاب سے کورس کرانے کے بعد کتاب ”پاک صحائف کی تعلیم حاصل کریں“ سے کورس کرائیں تاکہ کورس کرنے والا شخص بپتسمہ لینے کے لیے تیار ہو سکے۔