زبور 50:1-23
آسَف کا نغمہ۔
50 خداؤں کے خدا یہوواہ نے فرمایا ہے؛اُس نے مشرق سے مغرب تک* پوری زمین کو بُلایا ہے۔
2 خدا نے صِیّون سے جس کی خوبصورتی بےمثال ہے، اپنا نور چمکایا ہے۔
3 ہمارا خدا آئے گا اور چپ نہیں رہے گا۔
اُس کے سامنے بھسم کرنے والی آگ ہےاور اُس کے اِردگِرد تیز آندھی چلتی ہے۔
4 اُس نے آسمان اور زمین کو بُلایا ہے تاکہ اپنے بندوں کی عدالت کرے؛اُس نے کہا ہے:
5 ”میرے وفادار بندوں کو میرے پاس جمع کرو،ہاں، اُن کو جنہوں نے قربانی کی بِنا پر میرے ساتھ عہد باندھا ہے۔“
6 آسمان خدا کی نیکی کا اِعلان کرتا ہےکیونکہ وہی منصف ہے۔ (سِلاہ)
7 ”اَے میری قوم! جو مَیں کہوں گا، وہ سُن؛اَے اِسرائیل! مَیں تمہارے خلاف گواہی دوں گا۔
مَیں خدا ہوں، ہاں، تمہارا خدا۔
8 مَیں تمہاری قربانیوں کے حوالے سے تمہاری اِصلاح نہیں کر رہااور نہ ہی تمہاری بھسم ہونے والی سالم قربانیوں کے حوالے سے جو مسلسل میرے سامنے ہیں۔
9 مجھے تمہارے گھر سے بیل نہیں چاہیےاور نہ ہی تمہارے باڑوں سے بکرے
10 کیونکہ جنگل کے تمام جانور میرے ہیں،یہاں تک کہ ہزاروں پہاڑوں پر رہنے والے درندے بھی۔
11 مَیں ہر پہاڑی پرندے کو جانتا ہوں؛میدانوں کے بےشمار جانور میرے ہیں۔
12 اگر مجھے بھوک لگی ہو تو مَیں تمہیں نہیں بتاؤں گاکیونکہ زرخیز زمین اور اِس کی ہر ایک چیز میری ہے۔
13 کیا مَیں بیلوں کا گوشت کھاؤں گااور بکروں کا خون پیوں گا؟
14 خدا کا شکر ادا کرو اور یہی تمہاری قربانی ہوگی؛اپنی وہ منتیں پوری کرو جو تُم نے خدا تعالیٰ کے حضور مانی ہیں؛
15 مصیبت کے وقت مجھے پکارو۔
مَیں تمہیں بچاؤں گا اور تُم میری بڑائی کرو گے۔“
16 لیکن خدا بُرے شخص سے کہے گا:
”تمہیں میرے حکموں کے بارے میں بات کرنےیا میرے عہد کے بارے میں بتانے کا حق کس نے دیا؟
17 کیونکہ تمہیں اِصلاح* سے نفرت ہےاور تُم بار بار میری باتوں کو ٹھکرا دیتے ہو۔*
18 تُم کسی چور کو دیکھ کر اُسے صحیح قرار دیتے ہو*اور زِناکاروں کے ساتھ اُٹھتے بیٹھتے ہو۔
19 تمہارا مُنہ بُری باتیں پھیلاتا ہےاور تمہاری زبان پر دھوکادہی رہتی ہے۔
20 تُم بیٹھ کر اپنے بھائی کے خلاف باتیں کرتے ہو؛تُم اپنے بھائی کی خامیاں دوسروں کو بتاتے ہو۔*
21 جب تُم یہ سب کام کر رہے تھے تو مَیں خاموش رہااِس لیے تُم نے سوچا کہ مَیں بھی تمہارے جیسا ہوں۔
لیکن اب مَیں تمہاری اِصلاح کروں گااور تمہارے خلاف اپنا مُقدمہ پیش کروں گا۔
22 تُم جو خدا کو بھول گئے ہو، ذرا اِن باتوں پر غور کروورنہ مَیں تمہارے ٹکڑے ٹکڑے کر دوں گا اور تمہیں بچانے والا کوئی نہیں ہوگا۔
23 جو میرا شکر ادا کرتا ہے اور یوں میرے حضور قربانی پیش کرتا ہے، وہ میری بڑائی کرتا ہےاور جو مضبوط اِرادے سے صحیح راہ پر چلتا رہتا ہے،اُسے مَیں نجات دِلاؤں گا۔“
فٹ نوٹس
^ یا ”سورج کے نکلنے سے ڈوبنے تک“
^ یا ”تربیت؛ ہدایت“
^ لفظی ترجمہ: ”پیٹھ پیچھے پھینک دیتے ہو۔“
^ یا شاید ”اُس کے ساتھ مل جاتے ہو“
^ یا ”بھائی کو بدنام کرتے ہو۔“
