1،‏ 2.‏ مسح‌شُدہ مسیحی رومیوں کے آٹھویں باب میں خاص دلچسپی کیوں رکھتے ہیں؟‏

آپ نے دیکھا ہوگا کہ یسوع مسیح کی موت کی یادگاری تقریب پر اکثر رومیوں 8:‏15-‏17 پڑھی جاتی ہے۔‏ اِن آیتوں میں بتایا گیا ہے کہ مسح‌شُدہ مسیحیوں کو کیسے پتہ چلتا ہے کہ اُنہیں مسح کِیا گیا ہے۔‏ اِس باب کی پہلی آیت سے ظاہر ہوتا ہے کہ یہ باب مسح‌شُدہ مسیحیوں کے لیے لکھا گیا تھا کیونکہ اِس میں اُن لوگوں کا ذکر ہے جو ”‏مسیح یسوع کے ساتھ متحد ہیں۔‏“‏ تو پھر کیا اِس باب میں بتائی گئی باتیں صرف مسح‌شُدہ مسیحیوں پر لاگو ہوتی ہیں؟‏ یا پھر کیا ایسے مسیحی بھی اِن سے فائدہ حاصل کر سکتے ہیں جو فردوس میں رہنے کی اُمید رکھتے ہیں؟‏

² یہ سچ ہے کہ رومیوں کا آٹھواں باب خاص طور پر مسح‌شُدہ مسیحیوں کے لیے لکھا گیا کیونکہ اُن کو ”‏پاک روح ملی ہے“‏ اور وہ ’‏بےتابی سے اُس وقت کا اِنتظار کر رہے ہیں جب اُنہیں گود لیا جائے گا یعنی جب اُنہیں اپنے جسموں سے رِہائی ملے گی۔‏‘‏ (‏روم 8:‏23‏)‏ وہ مستقبل میں آسمان پر خدا کے بیٹوں کے طور پر رہیں گے۔‏ یہ اِس لیے ممکن ہے کیونکہ خدا نے فدیے کی بِنا پر اُن کے گُناہ معاف  کیے ہیں اور اُنہیں نیک قرار دیا ہے۔‏—‏روم 3:‏23-‏26؛‏ 4:‏25؛‏ 8:‏30‏۔‏

3.‏ جو مسیحی فردوس میں رہنے کی اُمید رکھتے ہیں،‏ اُنہیں بھی رومیوں کے آٹھویں باب میں دلچسپی کیوں لینی چاہیے؟‏

³ لیکن جو مسیحی فردوس میں رہنے کی اُمید رکھتے ہیں،‏ اُنہیں بھی رومیوں کے آٹھویں باب میں بتائی گئی باتوں میں دلچسپی لینی چاہیے۔‏ اِس کی وجہ یہ ہے کہ خدا اُنہیں بھی نیک خیال کرتا ہے۔‏ ہم یہ کیسے جانتے ہیں؟‏ پولُس رسول نے رومیوں کے چوتھے باب میں ابراہام کے بارے میں کہا کہ اُن کے ایمان کی وجہ سے ”‏اُن کو نیک قرار دیا گیا“‏ حالانکہ وہ یسوع مسیح کی موت سے سینکڑوں سال پہلے زندہ تھے۔‏ ‏(‏رومیوں 4:‏20-‏22 کو پڑھیں۔‏)‏ اِسی طرح یہوواہ خدا آج بھی اُن مسیحیوں کو نیک خیال کر سکتا ہے جو ہمیشہ تک زمین پر رہنے کی اُمید رکھتے ہیں۔‏ اِس لیے وہ بھی اُن باتوں سے فائدہ حاصل کر سکتے ہیں جو رومیوں کے آٹھویں باب میں لکھی ہیں۔‏

4.‏ ہمیں رومیوں 8:‏21 کے حوالے سے خود سے کیا پوچھنا چاہیے؟‏

⁴ رومیوں 8:‏21 میں اِس بات کی ضمانت دی گئی ہے کہ نئی دُنیا ضرور آئی گی۔‏ اِس آیت میں بتایا گیا ہے کہ اِنسان ’‏تباہی کی غلامی سے آزاد ہو جائیں گے اور خدا کی اولاد کی شان‌دار آزادی کا مزہ لیں گے۔‏‘‏ لیکن سوال یہ ہے کہ کیا ہم بھی اُس وقت کو دیکھیں گے اور نئی دُنیا میں رہنے کا لطف اُٹھائیں گے؟‏ آئیں،‏ رومیوں 8 باب پر غور کریں اور دیکھیں کہ نئی دُنیا میں رہنے کے لیے ہمیں کیا کرنا ہوگا۔‏

5.‏ پولُس رسول نے رومیوں 8:‏4-‏13 میں کس سنگین صورتحال کا ذکر کِیا؟‏

⁵ رومیوں 8:‏4-‏13 کو پڑھیں۔‏ رومیوں 8 باب میں پولُس رسول نے دو طرح کے لوگوں کے بارے میں بات کی۔‏ ایک تو وہ جو ”‏جسم کی خواہشوں کے مطابق چلتے ہیں“‏ اور دوسرے وہ جو ”‏پاک روح کے مطابق چلتے ہیں۔‏“‏ کچھ لوگوں کا خیال ہے کہ پولُس رسول یہاں مسیحیوں کا موازنہ ایسے لوگوں سے کر رہے تھے جو مسیحی نہیں تھے۔‏ لیکن یاد رکھیں کہ پولُس نے یہ خط اُن مسیحیوں کو لکھا ”‏جنہیں مُقدس ہونے کے لیے بلایا گیا“‏ تھا۔‏ (‏روم 1:‏7‏)‏ لہٰذا پولُس مسیحیوں سے ہی مخاطب ہو رہے تھے جن میں سے کچھ ”‏جسم کی خواہشوں  کے مطابق“‏ چل رہے تھے اور کچھ ”‏پاک روح کے مطابق“‏ چل رہے تھے۔‏ آئیں،‏ دیکھتے ہیں کہ ”‏جسم کی خواہشوں کے مطابق“‏ چلنے کا کیا مطلب ہے۔‏

6،‏ 7.‏ ‏(‏الف)‏ بائبل میں لفظ ”‏جسم“‏ کن معنوں میں اِستعمال کِیا گیا ہے؟‏ (‏ب)‏ رومیوں 8:‏4-‏13 میں اِصطلاح ’‏جسم کی خواہشوں کے مطابق چلنے‘‏ کا کیا مطلب ہے؟‏

⁶ بائبل میں لفظ ”‏جسم“‏ کو فرق فرق معنوں میں اِستعمال کِیا گیا ہے۔‏ اکثر اِس لفظ سے مُراد گوشت پوست کا جسم ہوتا ہے۔‏ (‏روم 2:‏28؛‏ 1-‏کُر 15:‏39،‏ 50‏)‏ مگر یہ لفظ رشتہ ظاہر کرنے کے لیے بھی اِستعمال ہوا ہے۔‏ مثال کے طور پر پولُس رسول نے کچھ بھائیوں کے بارے میں کہا کہ وہ ”‏جسمانی طور پر میرے رشتےدار ہیں۔‏“‏—‏روم 9:‏3‏۔‏

⁷ تو پھر اِصطلاح ’‏جسم کی خواہشوں کے مطابق چلنے‘‏ کا کیا مطلب ہے؟‏ رومیوں 7:‏5 سے ظاہر ہوتا ہے کہ جسم کی خواہشیں دراصل ”‏گُناہ‌گار خواہشیں“‏ ہوتی ہیں۔‏ پولُس رسول نے ’‏جسم کی خواہشوں کے مطابق چلنے‘‏ والے مسیحیوں کے بارے میں یہ بھی کہا کہ ”‏اُن کا دھیان جسمانی چیزوں پر رہتا ہے۔‏“‏ اِس سے ظاہر ہوتا ہے کہ ایسے مسیحی اپنی خواہشوں کے غلام ہوتے ہیں۔‏ وہ اپنی ہر حسرت،‏ خواہش،‏ شوق اور ہوس کو پورا کرنے کی جستجو میں رہتے ہیں۔‏

8.‏ پولُس رسول نے مسح‌شُدہ مسیحیوں کو ”‏جسم کی خواہشوں کے مطابق“‏ چلنے سے کیوں خبردار کِیا؟‏

⁸ لیکن پولُس رسول نے مسح‌شُدہ مسیحیوں کو ”‏جسم کی خواہشوں کے مطابق“‏ چلنے سے کیوں خبردار کِیا؟‏ اور کیا آج بھی مسیحی ”‏جسم کی خواہشوں کے مطابق“‏ چلنے کے خطرے میں ہیں؟‏ افسوس کی بات ہے کہ کوئی بھی مسیحی اپنے جسم کی گُناہ‌گار خواہشوں کا غلام بن سکتا ہے۔‏ مثال کے طور پر پولُس رسول نے روم کی کلیسیا کے کچھ مسیحیوں کا ذکر کِیا جو ”‏اپنی خواہشوں کے غلام“‏ تھے۔‏ ہو سکتا ہے کہ یہ مسیحی اپنی جنسی خواہش،‏ کھانے پینے کی خواہش یا کسی اَور خواہش کو حد سے زیادہ اہمیت دینے لگے تھے۔‏ اِن میں سے کچھ تو ’‏سیدھے سادے لوگوں کو بھی بہکا رہے تھے۔‏‘‏ (‏روم 16:‏17،‏ 18؛‏ فل 3:‏18،‏ 19؛‏ یہوداہ 4،‏ 8،‏ 12‏)‏ کُرنتھس کی کلیسیا میں بھی ایک بھائی تھا جو ”‏اپنے باپ کی بیوی کے ساتھ حرام‌کاری“‏ کر رہا تھا۔‏ (‏1-‏کُر 5:‏1‏)‏ یہی وجہ تھی کہ پولُس رسول نے خدا کے اِلہام سے  مسیحیوں کو ”‏جسمانی چیزوں پر دھیان دینے“‏ سے خبردار کِیا۔‏—‏روم 8:‏5،‏ 6‏۔‏

9.‏ رومیوں 8:‏6 میں پولُس رسول کیا نہیں کہہ رہے تھے؟‏

⁹ آج بھی مسیحیوں کو ”‏جسمانی چیزوں پر دھیان دینے“‏ سے خبردار رہنا چاہیے۔‏ جو مسیحی بہت عرصے سے یہوواہ خدا کی خدمت کر رہے ہیں،‏ وہ بھی ”‏جسم کی خواہشوں کے مطابق“‏ چلنے لگ سکتے ہیں۔‏ کیا رومیوں 8:‏6 میں پولُس رسول یہ کہہ رہے تھے کہ ہمیں کبھی کھانے پینے،‏ ملازمت یا سیروتفریح کے بارے میں نہیں سوچنا چاہیے یا یہ کہ ہر جنسی خواہش غلط ہے؟‏ نہیں تو۔‏ یہ باتیں تو زندگی کا حصہ ہیں۔‏ یسوع مسیح بھی اچھے کھانوں سے لطف اُٹھاتے تھے اور اُنہوں نے دوسروں کو بھی کھانا کھلایا۔‏ اور پولُس رسول نے لکھا کہ ازدواجی بندھن میں جنسی تعلقات کو اہم مقام حاصل ہے۔‏

10.‏ رومیوں 8:‏5،‏ 6 میں اِصطلاح ”‏دھیان دینے“‏ کا کیا مطلب ہے؟‏

¹⁰ لیکن پھر اِصطلاح ”‏جسمانی چیزوں پر دھیان دینے“‏ کا کیا مطلب ہے؟‏ پولُس رسول نے اِصطلاح ”‏دھیان دینے“‏ کے لیے جو یونانی لفظ اِستعمال کِیا،‏ اِس کا مطلب ہے:‏ ”‏اپنی سوچ کسی چیز پر مرکوز کر لینا اور اِسے حاصل کرنے کی جستجو میں رہنا۔‏“‏ ایک عالم کے مطابق جو لوگ جسمانی چیزوں پر دھیان دیتے ہیں،‏ ”‏وہ اِنہی میں گہری دلچسپی رکھتے ہیں،‏ اِنہیں سر پر سوار کر لیتے ہیں اور سارا وقت اِن کے بارے میں بات کرتے رہتے ہیں۔‏“‏

11.‏ کچھ ”‏جسمانی چیزوں“‏ کا ذکر کریں جو ہماری سوچ کا مرکز بن سکتی ہیں۔‏

¹¹ یہ ضروری تھا کہ روم کی کلیسیا کے مسیحی یہ دیکھنے کے لیے اپنا جائزہ لیتے کہ وہ کن چیزوں کو سب سے زیادہ اہمیت دے رہے تھے۔‏ کیا اُن کا دھیان ”‏جسمانی چیزوں“‏ پر رہتا تھا؟‏ اِسی طرح ہمیں بھی اپنا جائزہ لینا چاہیے کہ ہمارا دھیان کن چیزوں پر لگا رہتا ہے۔‏ ہم کن چیزوں کے بارے میں سوچتے رہتے ہیں اور بات کرتے ہیں؟‏ اِس طرح سے اپنا جائزہ لینے کے بعد شاید کچھ بہن بھائیوں کو احساس ہو کہ اُن کا دھیان کھانے پینے،‏ بناؤسنگھار،‏ سرمایہ‌کاری،‏ سیروتفریح وغیرہ پر رہتا ہے۔‏ ایسی چیزیں بذاتِ‌خود غلط نہیں ہوتیں۔‏ یاد کریں کہ یسوع مسیح بھی اچھے کھانوں سے لطف‌اندوز ہوتے تھے۔‏ (‏لُو 5:‏29؛‏ یوح 12:‏2‏)‏ لیکن کیا اُن کا دھیان کھانے پینے پر رہتا تھا اور وہ سارا وقت اِسی کے بارے میں بات کرتے تھے؟‏ نہیں۔‏ تو پھر ہمارا دھیان کن چیزوں پر رہتا ہے؟‏

12،‏ 13.‏ اِس بات کا جائزہ لینا کیوں اہم ہے کہ ہم کن چیزوں پر دھیان دے رہے ہیں؟‏

¹² یہ بہت اہم ہے کہ ہم جسمانی چیزوں کے حوالے سے اپنا جائزہ لیں کیونکہ پولُس رسول نے لکھا:‏ ”‏جسمانی چیزوں پر دھیان دینے کا انجام موت ہے۔‏“‏ (‏روم 8:‏6‏)‏ اِس سے ظاہر ہوتا ہے کہ ہم اِن چیزوں پر دھیان دینے کی وجہ سے خدا سے دُور ہو سکتے ہیں اور ہمیشہ کی زندگی پانے سے محروم ہو سکتے ہیں۔‏ لیکن ”‏جسمانی چیزوں پر دھیان“‏ دینے والا شخص اِس انجام سے بچ سکتا ہے کیونکہ وہ بدل سکتا ہے۔‏ کُرنتھس کی کلیسیا میں جس بھائی نے حرام‌کاری کی تھی اور جسے کلیسیا سے خارج کِیا گیا تھا،‏ اُس نے بھی اپنی غلط روِش چھوڑ دی اور دوبارہ سے سیدھی راہ پر چلنے لگا۔‏—‏2-‏کُر 2:‏6-‏8‏۔‏

¹³ اگر وہ بھائی اپنی روِش کو بدل سکتا تھا تو آج بھی ایک مسیحی اپنی روِش کو بدل سکتا ہے،‏ خاص طور پر اگر اُس نے اِتنا سنگین گُناہ نہ کِیا ہو جتنا کہ اُس بھائی نے کِیا تھا۔‏ اگر ہم جسمانی چیزوں پر دھیان دینے کے انجام کو یاد رکھیں گے تو ہمیں اپنی روِش کو بدلنے کی ترغیب ملے گی۔‏

14،‏ 15.‏ ‏(‏الف)‏ ہمیں ”‏جسمانی چیزوں پر دھیان“‏ دینے کی بجائے کس پر دھیان دینا چاہیے؟‏ (‏ب)‏ ”‏پاک روح پر دھیان دینے“‏ کا مطلب کیا نہیں ہے؟‏

¹⁴ ‏”‏جسمانی چیزوں پر دھیان“‏ دینے سے خبردار کرنے کے  بعد پولُس رسول نے یہ حوصلہ‌افزا بات لکھی:‏ ”‏پاک روح پر دھیان دینے کا انجام زندگی اور صلح ہے۔‏“‏ یہ کتنا اچھا انجام ہے!‏

¹⁵ کیا ”‏پاک روح پر دھیان دینے“‏ کا مطلب یہ ہے کہ ہم سارا وقت صرف خدا،‏ اُس کے کلام اور بادشاہت کے بارے میں سوچتے رہیں؟‏ نہیں۔‏ یاد کریں کہ پولُس رسول اور اُن کے زمانے کے باقی مسیحی بھی دوسرے لوگوں کی طرح زندگی گزارتے تھے۔‏ وہ کھانا کھاتے تھے اور محنت مزدوری کر کے روزی کماتے تھے۔‏ اُن میں سے بہت سے بہن بھائی شادی‌شُدہ تھے اور بچوں کی پرورش کر رہے تھے۔‏—‏مر 6:‏3؛‏ 1-‏تھس 2:‏9‏۔‏

16.‏ پولُس رسول نے اپنی زندگی میں کس کام کو پہلا درجہ دیا؟‏

¹⁶ لیکن پولُس رسول اور اُن کے زمانے کے باقی مسیحی اِن مصروفیات کو زندگی میں سب سے پہلا درجہ نہیں دیتے تھے۔‏ ہم جانتے ہیں کہ پولُس رسول کا پیشہ خیمے بنانا تھا۔‏ مگر اُن کا پیشہ اُن کی سوچ کا مرکز نہیں تھا بلکہ اُن کا دھیان خدا کی خدمت کرنے پر تھا۔‏ وہ مُنادی کرنے اور تعلیم دینے میں مگن رہتے تھے۔‏ ‏(‏اعمال 18:‏2-‏4؛‏ 20:‏20،‏ 21،‏ 34،‏ 35 کو پڑھیں۔‏)‏ پولُس رسول نے روم کی کلیسیا کے بہن بھائیوں کے لیے اور ہمارے لیے بھی کیا ہی عمدہ مثال قائم کی!‏—‏روم 15:‏15،‏ 16‏۔‏

17.‏ ‏”‏پاک روح پر دھیان“‏ دینے کا کیا نتیجہ نکلتا ہے؟‏

¹⁷ خدا کی خدمت پر دھیان دینے کا کیا انجام ہوتا ہے؟‏ رومیوں 8:‏6 میں لکھا ہے:‏ ”‏پاک روح پر دھیان دینے کا انجام زندگی اور صلح ہے۔‏“‏ پاک روح پر دھیان دینے کا مطلب ہے کہ ہم خدا کی سوچ کو جاننے اور اِس کو اپنانے کی کوشش کریں۔‏ اِس کے نتیجے میں ہماری زندگی خوش‌گوار اور بامقصد ہو جائے گی اور ہم ہمیشہ تک زندہ رہنے کی اُمید رکھ سکیں گے۔‏

18.‏ پاک روح پر دھیان دینے کا انجام صلح کیوں ہوتا ہے؟‏

¹⁸ لیکن اِس بات کا کیا مطلب ہے کہ ”‏پاک روح پر دھیان دینے کا انجام .‏ .‏ .‏ صلح ہے“‏؟‏ اگر ہم پاک روح کے مطابق چلتے ہیں تو ہم دوسروں کے ساتھ صلح صفائی سے رہنے کی کوشش کرتے ہیں،‏ چاہے یہ گھر پر ہو یا کلیسیا میں۔‏ ہم سب خطاکار ہیں اور غلطیاں کرتے ہیں جس کی وجہ سے کبھی کبھار ہمارے درمیان کشیدگیاں پیدا ہو سکتی ہیں۔‏ لیکن ایسی صورت میں ہم یسوع مسیح کی اِس ہدایت پر عمل کرتے ہیں:‏ ”‏اپنے بھائی سے صلح کریں۔‏“‏ (‏متی 5:‏24‏)‏ جب ہم یاد رکھتے ہیں کہ ہمارے بہن بھائی بھی اُسی خدا کی عبادت کرتے ہیں ”‏جو امن کا سرچشمہ ہے“‏ تو ہمیں اُن سے صلح کرنا زیادہ آسان لگتا ہے۔‏ (‏روم 16:‏20‏)‏ دوسروں کے ساتھ صلح صفائی سے رہنے سے ہمیں دلی سکون اور اِطمینان بھی ملتا ہے۔‏

19.‏ ‏”‏پاک روح پر دھیان دینے“‏ سے ہماری کس کے ساتھ صلح ہو جاتی ہے؟‏

¹⁹ ‏”‏پاک روح پر دھیان دینے“‏ سے اپنے پروردگار کے ساتھ ہماری صلح ہو جاتی ہے۔‏ اِس کا کیا نتیجہ ہوتا ہے؟‏ یسعیاہ نبی نے کہا:‏ ”‏اَے [‏یہوواہ]‏،‏ جس کا اِرادہ مضبوط ہے اُسے تُو محفوظ رکھتا ہے۔‏ اُسے پوری سلامتی حاصل ہے،‏ کیونکہ وہ تجھ پر بھروسا رکھتا ہے۔‏“‏—‏یسع 26:‏3‏،‏ اُردو جیو ورشن؛‏ رومیوں 5:‏1 کو پڑھیں۔‏

20.‏ آپ رومیوں 8 باب میں درج نصیحت کے لیے شکرگزار کیوں ہیں؟‏

²⁰ چاہے ہم مسح‌شُدہ ہوں یا فردوس میں رہنے کی اُمید رکھتے ہوں،‏ ہم سب اُن باتوں سے فائدہ حاصل کر سکتے ہیں جو رومیوں 8 باب میں درج ہیں۔‏ ہم شکرگزار ہیں کہ ہمیں جسمانی چیزوں پر دھیان دینے سے خبردار کِیا گیا ہے اور پاک روح پر دھیان دینے کی حوصلہ‌افزائی کی گئی ہے جس کا انجام ”‏زندگی اور صلح ہے۔‏“‏ اِس نصیحت پر عمل کرنے کا بڑا خوش‌کُن نتیجہ نکلتا ہے کیونکہ پولُس رسول نے لکھا:‏ ”‏گُناہ کی مزدوری موت ہے لیکن خدا کی نعمت ہمیشہ کی زندگی ہے جو ہمیں اپنے مالک مسیح یسوع کے ذریعے ملتی ہے۔‏“‏—‏روم 6:‏23‏۔‏