اگر آپ کو یہ جاننا ہو کہ وقت کیا ہوا ہے تو آپ کیا کریں گے؟‏ بےشک آپ گھڑی کی طرف دیکھیں گے۔‏ فرض کریں کہ دوپہر کا وقت ہے اور گھڑی پر گھنٹوں والی سوئی 1 پر ہے اور منٹوں والی سوئی 6 پر۔‏ اگر آپ کا کوئی دوست آپ سے وقت پوچھے گا تو آپ اُسے کیا بتائیں گے؟‏

کچھ علاقوں میں لوگ کہیں گے کہ 1 بج کر 30 منٹ ہوئے ہیں جبکہ کچھ علاقوں کے لوگوں کا جواب ہوگا کہ 30:‏13 ہوئے ہیں۔‏ بعض علاقوں میں لوگ کہیں گے کہ ڈیڑھ بجا ہے جبکہ بعض میں یہ کہا جائے گا کہ 2 بجنے میں 30 منٹ ہیں۔‏

جس دَور میں بائبل لکھی گئی،‏ تب یہ کیسے بتایا جاتا تھا کہ وقت کیا ہوا ہے؟‏ اِس کے بھی فرق فرق طریقے تھے۔‏ عبرانی صحیفوں میں ہمیں دن کے مختلف اوقات،‏ مثلاً ”‏صبح،‏“‏ ”‏دوپہر“‏ اور ”‏شام“‏ کا ذکر ملتا ہے۔‏ (‏پیدایش 8:‏11؛‏ 19:‏27؛‏ 43:‏16؛‏ 1-‏سلاطین 18:‏26‏)‏ لیکن بائبل میں کہیں کہیں یہ بھی بتایا گیا ہے کہ فلاں واقعہ صبح،‏ دوپہر،‏ شام یا رات کے کس حصے میں ہوا تھا۔‏

اُس زمانے میں چوکیدار رکھنے کا رواج عام تھا اور خاص طور پر رات کے وقت چوکیداروں سے رکھوالی کروائی جاتی تھی۔‏ بنی‌اِسرائیل نے رات کے وقت کو تین حصوں میں تقسیم کِیا ہوا تھا جنہیں ”‏پہر“‏ کہا جاتا تھا۔‏ (‏زبور 63:‏6‏)‏ مثال کے طور پر قضاۃ 7:‏19 میں رات کے ”‏بیچ کے پہر“‏ کا ذکر ہوا ہے۔‏ یسوع مسیح کے زمانے تک یہودیوں نے رات کو چار پہروں میں تقسیم کر لیا تھا جیسے یونانیوں اور رومیوں نے کِیا ہوا تھا۔‏

اناجیل میں کئی بار رات کے اِن چاروں پہروں کا ذکر ملتا ہے۔‏ مثال کے طور پر یسوع ”‏رات کے چوتھے پہر“‏ پانی پر چل کر اُس کشتی کی طرف گئے جس پر اُن کے شاگرد سوار تھے۔‏ (‏متی 14:‏25‏)‏ اِس کے علاوہ یسوع نے ایک مثال دیتے ہوئے کہا:‏ ”‏یاد رکھیں کہ اگر گھر کے مالک کو پتہ ہوتا کہ چور کس پہر آئے گا تو وہ جاگتا رہتا اور چور کو گھر میں گھسنے نہ دیتا۔‏“‏—‏متی 24:‏43‏۔‏

یسوع مسیح نے اپنے پیروکاروں کو ایک نصیحت کی جس میں اُنہوں نے رات کے چاروں پہروں کا ذکر کِیا۔‏ اُنہوں نے کہا:‏ ”‏چوکس رہیں کیونکہ آپ نہیں جانتے کہ گھر کا مالک کب آئے گا:‏ شام کو،‏ آدھی رات کو،‏ پَو پھٹتے وقت یا پھر صبح سویرے۔‏“‏ (‏مرقس 13:‏35‏،‏ فٹ‌نوٹ)‏ چار پہروں میں سے پہلا پہر ”‏شام“‏ کے وقت ہوتا تھا یعنی سورج غروب ہونے سے لے کر تقریباً رات 9 بجے تک۔‏ دوسرا پہر یعنی ”‏آدھی رات“‏ کا پہر تقریباً رات 9 بجے سے لے کر آدھی رات تک ہوتا تھا۔‏ تیسرا پہر ’‏پَو پھٹنے‘‏ کا وقت کہلاتا تھا جو کہ آدھی رات سے شروع ہو کر صبح کے تقریباً 3 بجے ختم ہوتا تھا۔‏ یہ وہ پہر تھا جس میں ’‏مُرغا بانگ‘‏ دیتا تھا۔‏ جس رات یسوع کو پکڑوایا گیا،‏ اُس رات بھی مُرغے نے غالباً اِسی پہر بانگ دی تھی۔‏ (‏مرقس 14:‏72‏)‏ چوتھا پہر ”‏صبح سویرے“‏ یعنی رات کے تقریباً 3 بجے سے لے کر سورج نکلنے تک ہوتا تھا۔‏

اِس سے پتہ چلتا ہے کہ اگرچہ قدیم زمانے میں لوگوں کے پاس گھڑیاں نہیں ہوتی تھیں تو بھی اُنہوں نے وقت کا اندازہ لگانے کے لیے ایک نظام بنایا ہوا تھا۔‏