کمسن لڑکی کی درخشاں اُمید

ایک ۱۲ سالہ لڑکی سٹیفنی کی طرف سے جاگو!‏ کے ناشرین کو خط موصول ہوا۔‏ وہ لکھتی ہے:‏ ”‏مَیں آپ کو بتانا چاہتی ہوں کہ اِن رسالوں نے سکول میں میری کتنی زیادہ مدد کی ہے۔‏ حال ہی میں ہمیں ’‏ثقافتی تنوع‘‏ کے موضوع پر ایک پروجیکٹ تفویض کِیا گیا۔‏ مَیں نے اپنے خاندان کیساتھ ملکر ان رسالوں کا جائزہ لیا اور ایسی عبارتیں اور تصاویر نکال لیں جو ہمارے موضوع سے مطابقت رکھتی تھیں۔‏ اسکے بعد اِن تمام معلومات کو ایک پوسٹر بورڈ پر چسپاں کر دیا۔‏“‏ سٹیفنی کے ٹیچر نے کلاس سے کہا کہ وہ پانچ بہترین پروجیکٹس کا انتخاب کریں۔‏ سٹیفنی لکھتی ہے،‏ ”‏اگلے دن مجھے یہ جان کر بیحد خوشی ہوئی کہ میرا پروجیکٹ پانچ بہترین پروجیکٹس میں شامل تھا۔‏“‏

سٹیفنی کی معلومات کا ایک ماخذ اکتوبر ۲۲،‏ ۱۹۹۸ کا اویک!‏ تھا جس کا عنوان تھا ”‏کیا کبھی سب لوگ ایک دوسرے سے محبت کریں گے؟‏“‏ یہوواہ کی گواہ کے طور پر سٹیفنی کو اس بات کا پُختہ یقین ہے کہ مختلف ثقافتوں کے لوگ اَمن سے اکٹھے رہ سکتے ہیں۔‏ سچ ہے کہ وہ ایک ایسی بین‌الاقوامی برادری کا حصہ ہے جس میں سابقہ دُشمن—‏توتسی اور ہوتو،‏ جرمن اور روسی،‏ آرمینی اور ترکی،‏ جاپانی اور امریکی—‏بائبل سچائی کی بدولت متحد ہو گئے ہیں۔‏ وہ سب ملکر اپنے خالق کی نقل کرنے کی کوشش کرتے ہیں۔‏ کس طرح؟‏ اس کا جواب بائبل کا یہ صحیفہ دیتا ہے جسے سٹیفنی نے اپنے پروجیکٹ میں استعمال کِیا تھا:‏ ”‏خدا کسی کا طرفدار نہیں۔‏ بلکہ ہر قوم میں جو اُس سے ڈرتا اور راستبازی کرتا ہے وہ اُس کو پسند آتا ہے۔‏“‏ (‏اعمال ۱۰:‏۳۴،‏ ۳۵‏)‏ یہوواہ کے گواہ دوسروں کے ساتھ اپنے برتاؤ میں اسی طرح کی غیرجانبداری کا مظاہرہ کرنے کے لئے سرتوڑ کوشش کرتے ہیں۔‏

سٹیفنی بائبل کے اس وعدے کی تکمیل کی منتظر ہے جب خدا کی بادشاہت زمین پر راست حالتیں بحال کریگی۔‏ (‏مکاشفہ ۲۱:‏۳،‏ ۴‏)‏ وہ ایسی دُنیا میں بھی درخشاں اُمید رکھتی ہے جس میں نوجوانوں کی اکثریت مستقبل کی بابت خوف اور تذبذب کا شکار ہے۔‏