بائبل کا نقطۂ‌نظر

کیا خدا نے غلاموں کی تجارت سے چشم‌پوشی کی تھی؟‏

کپاس کی گانٹھوں کے بوجھ سے جھکے اور پسینے سے شرابور سیاہ جسم جہاز تک جانے والے تختوں پر پاؤں گھسیٹ‌گھسیٹ کر چل رہے ہیں۔‏ بیرحم نگران اُنہیں تیزی سے آگے بڑھنے کیلئے کوڑے لگا رہے ہیں۔‏ چیخ‌وپکار کرتے ہوئے بچوں کو سسکتی ماؤں کی بانہوں سے چھین کر نیلامی میں بھاری بولی لگانے والے کے ہاتھوں فروخت کر دیا جاتا ہے۔‏ جب آپ غلامی کی بابت سوچتے ہیں تو یقیناً آپکے ذہن میں ایسے انتہائی ظالمانہ اور بھیانک تصورات آتے ہونگے۔‏

ستم‌ظریفی کی بات تو یہ ہے کہ غلاموں کی خریدوفروخت کرنے والے بیشتر لوگ انتہائی مذہبی تھے۔‏ مؤرخ جیمز وال‌وِن نے لکھا:‏ ”‏سینکڑوں یورپی اور امریکی لوگ غلاموں سے بھرے جہازوں کیساتھ نئی دُنیا (‏مغربی نصف‌کرہ جس میں شمالی اور جنوبی امریکہ شامل ہیں)‏ کی طرف روانہ ہوتے وقت خدا کی ستائش کی اور اس کا شکر ادا کِیا کہ اُس نے اُنہیں افریقہ میں نفع‌بخش اور محفوظ کاروبار کرکے واپس لوٹنے کے قابل بنایا۔‏“‏

بعض لوگوں نے تو یہ بھی دعویٰ کِیا ہے کہ خدا نے غلاموں کی تجارت سے چشم‌پوشی کی تھی۔‏ مثال کے طور پر،‏ ۱۸۴۲ میں میتھوڈسٹ پروٹسٹنٹ چرچ کی جنرل کانفرنس میں ایک تقریر کے دوران،‏ الیگزینڈر میک‌کین نے بیان کِیا کہ غلامی کو ”‏خدا نے خود رائج کِیا تھا۔‏“‏ کیا میک‌کین نے صحیح کہا تھا؟‏ کیا خدا نے لڑکیوں کے اغوا اور زنابالجبر،‏ خاندانوں کے بیرحمی سے جُدا کئے جانے اور ظالمانہ مارپیٹ جیسے کاموں کی اجازت دی تھی جو کہ میک‌کین کے زمانے میں غلاموں کی تجارت کا اہم حصہ تھے؟‏ نیز اُن لاکھوں لوگوں کی بابت کیا ہے جنہیں آجکل استبدادی حالتوں کے تحت غلاموں کے طور پر زندگی بسر کرنے پر اور کام کرنے پر مجبور کِیا جاتا ہے؟‏ کیا خدا ایسے انسانیت‌سوز برتاؤ سے چشم‌پوشی کرتا ہے؟‏

غلامی اور اسرائیلی

بائبل بیان کرتی ہے کہ ”‏ایک شخص دوسرے پر حکومت کرکے اپنے اُوپر بلا لاتا ہے۔‏“‏ (‏واعظ ۸:‏۹‏)‏ شاید اسکا واضح ثبوت انسان کی وضع‌کردہ غلامی کی مختلف استبدادی اقسام میں زیادہ نظر آتا ہے۔‏ یہوواہ خدا اُس تکلیف سے غافل نہیں ہے جو غلامی کی وجہ سے آتی ہے۔‏

مثال کے طور پر،‏ اسرائیلیوں کے سلسلے میں واقع ہونے والی اس حالت پر غور کریں۔‏ بائبل ہمیں بتاتی ہے کہ مصریوں نے ”‏اُن سے سخت محنت سے گارا اور اِینٹ بنوا بنوا کر اور کھیت میں ہر قِسم کی خدمت لے لیکر انکی زندگی تلخ کی۔‏ اُنکی سب خدمتیں جو وہ اُن سے کراتے تھے تشدد کی تھیں۔‏“‏ لہٰذا بنی‌اِسرائیل ”‏اپنی غلامی کے سبب سے آہ بھرنے لگے اور روئے اور  اُنکا رونا جو اُنکی غلامی کے باعث تھا خدا تک پہنچا۔‏“‏ کیا یہوواہ اُنکی مصیبت سے غافل تھا؟‏ اس کے برعکس،‏ ”‏خدا نے اُنکا کراہنا سنا اور خدا نے اپنے عہد کو جو اؔبرہام اور اضحاؔق اور یعقوؔب کے ساتھ تھا یاد کِیا۔‏“‏ مزیدبرآں،‏ یہوواہ نے اپنے لوگوں کو بتایا:‏ ”‏مَیں تمکو مصریوں کے بوجھوں کے نیچے سے نکال لونگا۔‏ اور مَیں تمکو اُنکی غلامی سے آزاد کرونگا۔‏“‏—‏خروج ۱:‏۱۴؛‏ ۲:‏۲۳،‏ ۲۴؛‏ ۶:‏۶-‏۸‏۔‏

واضح طور پر،‏ یہوواہ نے استبدادی غلامی کے ذریعے ’‏انسان کے انسان پر حکومت کرنے‘‏ کو ناپسند کِیا تھا۔‏ تاہم،‏ کیا بعد میں خدا نے اپنے لوگوں کے درمیان غلامی کی اجازت نہیں دی تھی؟‏ جی‌ہاں،‏ اُس نے اجازت دی تھی۔‏ تاہم،‏ اسرائیل میں غلامی تاریخ کے اندر واقع ہونے والی غلامی کی دیگر جابرانہ اقسام سے بالکل مختلف تھی۔‏

خدا کی شریعت نے بیان کِیا تھا کہ اغوا اور انسانوں کو فروخت کرنے کی سزا موت تھی۔‏ مزیدبرآں،‏ یہوواہ نے غلاموں کے تحفظ کے سلسلے میں ہدایات فراہم کی تھیں۔‏ مثال کے طور پر،‏ مالک کی وجہ سے معذور ہو جانے والے غلام کو آزاد کر دیا جاتا تھا۔‏ اگر ایک غلام اپنے مالک کی مارپیٹ سے مر جاتا تو مالک کو موت کی سزا ہو سکتی تھی۔‏ اسیر عورتوں کو یا تو لونڈیاں بنا لیا جاتا تھا یا پھر اُنہیں بیوی کا درجہ بھی دیا جا سکتا تھا۔‏ مگر اُنہیں محض جنسی تسکین کیلئے استعمال نہیں کِیا جا سکتا تھا۔‏ شریعت نے راستدل اسرائیلیوں کو غلاموں کے ساتھ عزت‌واحترام اور مہربانی سے پیش آنے اور اُنہیں اُجرت پر رکھے گئے مزدور خیال کرنے کی تحریک دی ہوگی۔‏—‏خروج ۲۰:‏۱۰؛‏ ۲۱:‏۱۲،‏ ۱۶،‏ ۲۶،‏ ۲۷؛‏ احبار ۲۲:‏۱۰،‏ ۱۱؛‏ استثنا ۲۱:‏۱۰-‏۱۴‏۔‏

بعض یہودی قرض ادا کرنے کی غرض سے اپنی مرضی سے ساتھی یہودیوں کے غلام بن گئے۔‏ اس عمل نے لوگوں کو فاقہ‌زدگی سے محفوظ رکھا اور بیشتر کو غربت سے نکلنے میں مدد دی۔‏ علاوہ‌ازیں،‏ یہودی تقویم میں خاص خاص موقعوں پر غلاموں کو اگر وہ چاہیں تو آزاد کر دیا جاتا تھا۔‏ * (‏خروج ۲۱:‏۲؛‏ احبار ۲۵:‏۱۰؛‏ استثنا ۱۵:‏۱۲‏)‏ غلاموں کی بابت اِن قوانین پر تبصرہ کرتے ہوئے،‏ یہودی عالم موزیز ملزی‌نر بیان کرتا ہے کہ ”‏غلام کا ایک انسان ہونا کبھی ختم نہیں ہو سکتا ہے،‏ اُسے ہمیشہ ایک ایسا شخص خیال کِیا جاتا تھا جسکے کچھ انسانی حقوق ہیں جن میں مالک کبھی بیجا مداخلت نہیں کر سکتا تھا۔‏“‏ یہ غلامی کے اِس استبدادی نظام کے بالکل برعکس ہے جو انسانی تاریخ پر ایک بدنما دھبا ہے!‏

غلامی اور مسیحی

پہلی صدی کے مسیحی جس رومی سلطنت کے تحت رہتے تھے،‏ غلامی اُسکے معاشرتی نظام کا حصہ تھی۔‏ لہٰذا،‏ بعض مسیحی غلام تھے اور دیگر غلام رکھتے تھے۔‏ (‏۱-‏کرنتھیوں ۷:‏۲۱،‏ ۲۲‏)‏ لیکن کیا اسکا یہ مطلب ہے کہ یسوع کے شاگرد غلاموں پر ظلم کرنے والے مالک تھے؟‏ ہرگز نہیں!‏ رومی قانون کی اجازت سے قطع‌نظر،‏ ہم یہ یقین رکھ سکتے ہیں کہ مسیحی اپنے تابع لوگوں سے بدسلوکی نہیں کرتے تھے۔‏ پولس رسول نے تو فلیمون کو یہ نصیحت کی تھی کہ اپنے غلام اُنیسمس کیساتھ جو کہ مسیحی بن چکا تھا ”‏بھائی“‏ جیسا برتاؤ کرے۔‏ *‏—‏فلیمون ۱۰-‏۱۷‏۔‏

بائبل اس بات کی نشاندہی نہیں کرتی کہ انسانوں کا انسانوں کی غلامی کرنا نسلِ‌انسانی کیلئے خدا کے ابتدائی مقصد کا حصہ تھی۔‏ علاوہ‌ازیں،‏ کوئی بھی بائبل پیشینگوئی یہ بیان نہیں کرتی کہ خدا کی نئی دُنیا میں انسان ساتھی انسانوں کو غلام رکھیں گے۔‏ بلکہ اُس آنے والے فردوس میں،‏ راستباز آدمی ”‏اپنی تاک اور اپنے انجیر کے درخت کے نیچے بیٹھیگا اور اُنکو کوئی نہ ڈرائیگا۔‏“‏—‏میکاہ ۴:‏۴‏۔‏

پس صاف ظاہر ہے کہ بائبل دوسروں کیساتھ کسی بھی طرح کی بدسلوکی کو نظرانداز نہیں کرتی۔‏ اسکے برعکس،‏ یہ انسانوں کے اندر عزت‌واحترام اور مساوات کی حوصلہ‌افزائی کرتی ہے۔‏ (‏اعمال ۱۰:‏۳۴،‏ ۳۵‏)‏ یہ انسانوں کو نصیحت کرتی ہے کہ جیسا وہ چاہتے ہیں کہ اُنکے ساتھ برتاؤ کِیا جائے ویسا ہی وہ دوسروں سے برتاؤ کریں۔‏ (‏لوقا ۶:‏۳۱‏)‏ اس کے علاوہ بائبل مسیحیوں کی حوصلہ‌افزائی کرتی ہے کہ وہ اپنے معاشرتی مرتبے سے قطع‌نظر دوسروں کو فروتنی کیساتھ اپنے سے بہتر خیال کریں۔‏ (‏فلپیوں ۲:‏۳‏)‏ یہ اُصول بیشتر قوموں میں بالخصوص حالیہ وقتوں میں پائی جانے والی غلامی کی غلط اقسام کے بالکل متضاد ہیں۔‏

‏[‏فٹ‌نوٹ]‏