‏”‏بیماری“‏ جس سے طعامِ‌خاص بنتا ہے

میکسیکو سے جاگو!‏ کا رائٹر

مکئی کی فصل چوکھی ہوگی۔‏ لہٰذا،‏ ایک کسان بڑے اطمینان کیساتھ اپنے کھیتوں میں جاکر مکئی کے خوشوں کا جائزہ لیتا ہے۔‏ جب وہ ایک خوشہ پکڑتا ہے تو فوراً اُسکی نظر ایک کالے دھبے پر پڑتی ہے۔‏ اس پر غور کرنے سے اُسے پتہ چلتا ہے کہ یہ مکئی کا بڑا اور کالے رنگ کا خراب دانہ ہے۔‏ جب وہ اُسے کھولتا ہے تو اس کالے مادے سے مشروم جیسی بو آتی ہے۔‏ مکئی کا یہ خوشہ ایک طفیلی پھپھوندی کے حملے کا شکار ہوا ہے!‏ کیا فصل خراب ہو گئی ہے؟‏ جی‌نہیں۔‏ کسان خوشی سے مسکراتا ہے۔‏ وہ فصل کاٹنے کی تیاریوں پر سوچ‌بچار کرتا ہے!‏

قدیم زمانے سے میکسیکو کے لوگ ویٹلاکوچی نامی خوش‌ذائقہ مکئی مشروم سے لطف‌اندوز ہوتے آئے ہیں جو دراصل مکئی کی ایک بیماری سے بنتی ہے۔‏ دیگر ممالک میں اِسے طعامِ‌خاص سمجھا جاتا ہے اور میکسیکن ٹرافل کہا جاتا ہے۔‏

ویٹلاکوچی دراصل اُسٹلاگو میڈس نامی پھپھوندی سے بنتی ہے۔‏ یہ پھپھوندی زی میز مکئی کی ہر فصل کو تھوڑا بہت متاثر کرتی ہے لیکن خاص طور پر یہ گرم اور معتدل خشک علاقوں کی فصل پر اثرانداز ہوتی ہے۔‏ محققین نے ویٹلاکوچی کے ست میں ”‏یومامی ذائقے سے متعلق چار امینو ایسڈز میں سے تین دریافت کئے ہیں۔‏“‏ * ‏(‏جرنل آف ایگریکلچر اینڈ فوڈ کیمسٹری)‏ ویٹلاکوچی میں کھانے کے لائق دیگر مشرومز سے زیادہ نشاستے ہوتے ہیں جس کی وجہ سے یہ کچھ میٹھی ہوتی ہے۔‏ اس طعامِ‌خاص میں وینالن جیسے اجزا بھی دریافت ہوئے ہیں جو راحت‌انگیز مہک پیدا کرتے ہیں۔‏ اگرچہ ویٹلاکوچی کا ذائقہ اس کی سب سے نمایاں خاصیت ہے توبھی اس کی غذائیت توجہ کی مستحق ہے کیونکہ اس میں وٹامن سی،‏ فاسفورس،‏ کیلسیم اور مقوی اجزا پائے جاتے ہیں۔‏

پس،‏ اس میں حیرانی کی کوئی بات نہیں کہ آزٹک لوگ ویٹلاکوچی کو بہت پسند کرتے تھے اور اُنہوں نے ہی اِسے کویٹلاکوچن نام دیا تھا جسکا مطلب ہے ”‏مخفی نمو [‏غیرطبعی افزائش]‏۔‏“‏ بعدازاں اسکا نام بدل کر ویٹلاکوچی رکھ دیا گیا جو تاحال مستعمل ہے۔‏ میکسیکو میں ویٹلاکوچی روایتاً ہاتھ کی بنی ہوئی گول ترتلا میں بھر کر کھائی جاتی ہے۔‏ تاہم،‏ اسے میٹھے نان،‏ سوپ اور ساس کیساتھ بھی استعمال کِیا جاتا ہے۔‏ حال ہی میں جینیاتی محققین نے اس مشروم پر تحقیق شروع کر دی ہے تاکہ اسکی پیداوار کو بڑھا کر اسے تجارتی مقاصد کیلئے استعمال کِیا جا سکے۔‏

اگر ویٹلاکوچی مقامی طور پر دستیاب ہے تو کیوں نہ اِسے ساتھ دی ہوئی ترکیب کے مطابق تیار کرکے کھایا جائے۔‏ * آپ حیران رہ جائینگے کہ ایک ”‏بیماری“‏ سے اتنا لذیذ طعامِ‌خاص کیسے تیار ہو سکتا ہے!‏

‏[‏فٹ‌نوٹ]‏

 ‏[‏صفحہ ۱۵ پر بکس/‏تصویریں]‏

‏”‏ویٹلاکوچی“‏ کی تیاری

تازہ کٹی ہوئی ویٹلاکوچی ۱۸ اونس (‏یا ۸ اونس کے دو ڈبے)‏

ایک کٹا ہوا درمیانے سائز کا پیاز (‏تقریباً ۲۰۰ گرام)‏

لہسن کی کٹی ہوئی ۲ تا ۴ پوتھیاں

ایپازوٹے (‏کینوپوڈیم ایمبروسائیوڈس)‏ یا سلانٹرو پتے کے ۲ بڑے چمچ

تیل ۳ بڑے چمچ

مکھن ا بڑا چمچ

نمک حسبِ‌ذائقہ

پیاز کو تیل میں براؤن کرنے کے بعد اس میں ایپازوٹے اور ویٹلاکوچی شامل کریں۔‏ نمک اور مکھن بھی ملا دیں۔‏ اچھی طرح ہلائیں۔‏ ڈھانپ کر ۱۵ منٹ تک پکنے دیں اور تھوڑی تھوڑی دیر بعد ہلاتے رہیں۔‏

آپ اس آمیزے کو ترتلا کے اندر ویسے بھی بھر سکتے ہیں یا اس میں گوشت اور پنیر ملا سکتے ہیں یا سوپ بنانے کیلئے اسے دیگر چیزوں میں ڈال سکتے ہیں۔‏ آپ اسے بلینڈر میں ڈالکر اسکی پوری بنا کر گوشت کیساتھ کھا سکتے ہیں۔‏