چیونٹی کے بھیس میں مکڑی

یہ ایک ایسی چھوٹی مکڑی ہے جو چیونٹی کی بستی میں گھس جاتی ہے اور اپنے دُشمنوں کے درمیان بہروپ دھارے رہتی ہے۔‏ پکڑے جانے کے ڈر سے یہ اپنی شکل اور طرزِعمل تبدیل کرتی رہتی ہے۔‏ یہ بہت ضروری ہے کیونکہ اگر چیونٹیوں کو چھیڑا جائے تو یہ بہت غصے میں آ جاتی ہیں۔‏ اب چونکہ مکڑی کا جسم چیونٹیوں سے بالکل مختلف ہوتا ہے لہٰذا اسے بڑی مشکل کا سامنا کرنا پڑتا ہے۔‏

چیونٹی کی چھ ٹانگیں اور دو محاسے ہوتے ہیں جبکہ مکڑی کی آٹھ ٹانگیں اور کوئی محاسہ نہیں ہوتا۔‏ پس مکڑی خود کو کیسے چیونٹی بناتی ہے؟‏ یہ چھ ٹانگوں پر چیونٹیوں کی بستی کی طرف بھاگتی ہے اور اپنی دو ٹانگوں کو محاسوں کی طرح کھڑا کر لیتی ہے۔‏

مزیدبرآں،‏ مکڑی اپنے دو نقلی محاسوں کو بھی حیرت‌انگیز طریقے سے حرکت دیتی ہے۔‏ وہ انہیں اتنی تیزی سے جنبش دیتی ہے کہ اُنہیں چیونٹی کے محاسے خیال کِیا جاتا ہے۔‏ بہروپ دھارنے کی ماہر یہ مکڑی چیونٹیوں کی طرح لڑکھڑا لڑکھڑا کر آڑاترچھا چلنے کی بھی خوب نقل اُتار سکتی ہے!‏

مکڑی ہر لحاظ سے چیونٹی کی نقل اُتارنے کی کوشش کرتی ہے کیونکہ چیونٹیوں کی بستی کا ایک فرد خیال کِیا جانا اُسکی بقا کیلئے اشد ضروری ہے۔‏ اس بستی کے اندر اُسے قدرتی دشمن سے تحفظ ملتا ہے جس میں بھڑیں بھی شامل ہیں۔‏ گانے والا پرندہ جو مکڑی کو اپنی من‌پسند خوارک خیال کرتا ہے وہ بھی اسے نہیں پہچان پاتا۔‏ دوسری مکڑیوں کو پکڑنے والے مکڑے بھی اس کے ”‏محاسوں“‏ سے دھوکا کھا جاتے ہیں۔‏

تاہم،‏ اگر کوئی پرندہ یا چھپکلی چیونٹیوں پر حملہ کرتی ہے تو مکڑی فوراً اپنا اصلی روپ دھار کر وہاں سے فرار ہو جاتی ہے۔‏ مکڑیوں کی نظر بھی چیونٹیوں سے بہتر ہوتی ہے نیز وہ چھلانگ لگا سکتی ہیں جبکہ چیونٹیاں ایسا نہیں کر سکتیں لہٰذا اُن کیلئے بھاگ جانا کافی آسان ہوتا ہے۔‏

دن کے دوران مکڑی چیونٹیوں کی بستی میں چھپے رہنے کی بھرپور کوشش کرتی ہے۔‏ تاہم،‏ رات کو یہ خوب سرگرم ہوتی ہے اور جس بستی میں یہ چھپی ہوتی ہے وہیں کی چیونٹیوں کو کھا جاتی ہے!‏ اگر مکڑی کی چال کامیاب نہیں ہوتی اور اسکا پتا چل جاتا ہے تو یہ اپنی آٹھوں ٹانگوں کا فائدہ اُٹھاتے ہوئے تیزی سے بھاگ جاتی ہے۔‏

چیونٹیوں کی بستی میں مکڑا بھی مکڑی کے ہمراہ جا سکتا ہے۔‏ وہ نہ صرف اپنے ساتھی کے لئے وفاداری ظاہر کرتی ہے بلکہ اپنے ساتھی کے لئے خلوصدلی کا بھی مظاہرہ کرتی ہے۔‏ وہ چیونٹیوں کے گھر میں محفوظ تانابانا بنتی ہے جو نہ صرف اُس کے ساتھی کو بلکہ اُس کے انڈوں کو بھی محفوظ رکھتا ہے۔‏

بِلاشُبہ اس مکڑی کی بابت اَور بہت کچھ دریافت کرنا باقی ہے۔‏ لیکن زمین پر پائے جانے والے جانوروں کی دیگر اقسام کی بابت بھی یہی کہا جا سکتا ہے۔‏ مستقبل میں خدا کی حیران‌کُن مخلوق کی بابت سیکھنا کسقدر خوشی کا باعث ہوگا!‏

‏[‏صفحہ ۲۰ پر تصویر]‏

دو چیونٹیوں کے درمیان ایک مکڑی

‏[‏تصویر کا حوالہ]‏

Bill Beatty