کیا ان کی عمر واقعی اتنی لمبی تھی؟‏

پاک صحائف میں آدم کی عمر ۹۳۰ برس،‏ سیت کی ۹۱۲ برس اور متوسلح کی ۹۶۹ برس بتائی گئی ہے۔‏ ذرا غور کریں کہ اگر متوسلح ۳۱ سال اَور جیتا تو اُس کی عمر ۰۰۰،‏۱ سال ہو جاتی۔‏ (‏پیدایش ۵:‏۵،‏ ۸،‏ ۲۷‏)‏ کئی لوگوں کا خیال ہے کہ قدیم زمانے کے ان لوگوں کی عمر دراصل اتنی لمبی نہیں تھی۔‏ وہ کہتے ہیں کہ اُس زمانے میں لوگ جس عرصے کو سال کہتے تھے وہ ہمارے مہینے کے برابر تھا۔‏ کیا یہ سچ ہے؟‏

پاک صحائف پر غور کرنے سے ہم جان جاتے ہیں کہ قدیم زمانے میں بھی سال میں تقریباً اتنے ہی دن ہوتے تھے جتنے کہ آجکل ہوتے ہیں۔‏ اگر ایسا نہ ہوتا تو پھر اُس زمانے کے لوگ بہت ہی چھوٹی عمر میں باپ بن جاتے۔‏ مثال کے طور پر قینان ۶ سال کی عمر میں اور محلل‌ایل اور حنوک تقریباً ۵ سال کی عمر میں باپ بن جاتے۔‏—‏پیدایش ۵:‏۱۲،‏ ۱۵،‏ ۲۱‏۔‏

قدیم زمانے کے لوگ سال،‏ مہینہ اور دن میں فرق کرتے تھے۔‏ (‏پیدایش ۱:‏۱۴-‏۱۶؛‏ ۸:‏۱۳‏)‏ اُس زمانے میں ایک مہینے میں کتنے دن ہوتے تھے؟‏ اس بات کا اندازہ لگانے کے لئے اُن واقعات پر غور کریں جن کو خدا کے نبی نوح نے درج کِیا تھا۔‏ پیدایش ۷:‏۱۱،‏ ۲۴ کا مقابلہ پیدایش ۸:‏۳،‏ ۴ سے کرنے سے پتا چلتا ہے کہ دوسرے مہینے کی سترھویں تاریخ سے لے کر ساتویں مہینے کی سترھویں تاریخ تک ٹھیک ۱۵۰ دن یعنی پانچ مہینے گزرے تھے۔‏ اس سے ظاہر ہوتا ہے کہ نوح کے نزدیک ایک مہینہ ۳۰ دن کا اور ایک سال ۱۲ مہینے کا تھا۔‏—‏پیدایش ۸:‏۵-‏۱۳‏۔‏

لیکن یہ کیسے ہو سکتا ہے کہ اُس زمانے میں لوگ ۹۰۰ سال یا اس سے بھی زیادہ دیر تک زندہ رہتے تھے؟‏ پاک صحائف میں ہمیں بتایا جاتا ہے کہ خدا نے انسان کو ہر لحاظ سے بےعیب بنایا تھا اور اُسے ہمیشہ تک زندہ رہنے کے لئے خلق کِیا تھا۔‏ لیکن آدم نے گُناہ کِیا جس کی وجہ سے اُس میں نقص پیدا ہو گیا۔‏ اس لئے ہم سب جسمانی اور ذہنی طور پر عیب‌دار ہیں اور ہم سب کو مرنا پڑتا ہے۔‏ (‏پیدایش ۲:‏۱۷؛‏ ۳:‏۱۷-‏۱۹؛‏ رومیوں ۵:‏۱۲‏)‏ غور کریں کہ گُناہ کرنے سے پہلے آدم جسمانی طور پر بےعیب تھا۔‏ اس لئے جو لوگ آدم کے گُناہ کے بعد اور سیلاب کے آنے سے پہلے پیدا ہوئے وہ زیادہ دیر تک زندہ رہے۔‏ مثال کے طور پر متوسلح آدم سے سات پُشت بعد پیدا ہوا تھا جس کی وجہ سے اُس کی عمر اتنی لمبی تھی۔‏—‏لوقا ۳:‏۳۷،‏ ۳۸‏۔‏

جلد ہی یہوواہ خدا اُن لوگوں پر سے آدم کے گُناہ کا داغ مٹا دے گا جو یسوع مسیح کے بہائے ہوئے خون پر ایمان لاتے ہیں۔‏ پاک صحائف میں لکھا ہے کہ ”‏گُناہ کی مزدوری موت ہے مگر خدا کی بخشش ہمارے خداوند مسیح یسوؔع میں ہمیشہ کی زندگی ہے۔‏“‏ (‏رومیوں ۶:‏۲۳‏)‏ جی‌ہاں،‏ وہ وقت نزدیک ہے جب ہم متوسلح کی ۹۶۹ سال لمبی عمر کو ایک لمحہ کے برابر خیال کریں گے۔‏

‏[‏صفحہ ۲۷ پر گراف]‏

‏(‏تصویر کے لئے چھپے ہوئے صفحے کو دیکھیں)‏

۰۰۰،‏۱

متوسلح

آدم

سیت

۹۰۰

 

 

 

۸۰۰

 

 

 

۷۰۰

 

 

 

۶۰۰

 

 

 

۵۰۰

 

 

 

۴۰۰

 

 

 

۳۰۰

 

 

 

۲۰۰

 

 

 

۱۰۰

آجکل انسان کی اوسط عمر