نوجوانوں کا سوال

مَیں کیوں اپنی صحت کی فکر کروں؟‏

نیچے دئے گئے اُن نکات پر ✔ کا نشان لگائیں جن پر آپ کام کرنا چاہتے ہیں:‏

◯ وزن کم کرنا

◯ جِلد اور رنگت کو نکھارنا

◯ اپنی توانائی بڑھانا

◯ زیادہ چاق‌وچوبند ہونا

◯ ٹینشن کم کرنا

◯ زیادہ خوش‌مزاج بننا

◯ اعتماد پیدا کرنا

زندگی میں کچھ باتیں ایسی ہیں جن کا آپ خود انتخاب نہیں کر سکتے،‏ مثلاً جس گھرانے میں آپ پیدا ہوئے ہیں،‏ جس جگہ آپ رہتے ہیں،‏ وغیرہ۔‏ لیکن جہاں تک آپ کی صحت کا تعلق ہے،‏ معاملہ فرق ہے۔‏ یہ آپ کے ہاتھ میں ہے کہ آپ کس حد تک تندرست‌وتوانا رہیں۔‏ *

شاید آپ سوچیں کہ ”‏میری عمر ہی کیا ہے کہ مَیں اپنی صحت کی فکر کروں۔‏“‏ لیکن ذرا ٹھہریئے۔‏ اُوپر دی گئی فہرست کو دوبارہ سے دیکھیں۔‏ آپ نے کتنے نکات پر نشان لگایا ہے؟‏ شاید آپ یہ جان کر حیران ہوں کہ آپ اپنی صحت کا خیال رکھنے سے اِن تمام باتوں میں بہتری لا سکتے ہیں۔‏

امبر * جس کی عمر ۱۷ سال ہے،‏ کہتی ہے:‏ ”‏نہ جی،‏ سارا وقت میٹھے اور تلے ہوئے کھانوں سے پرہیز کرنا میرے بس کی بات نہیں!‏“‏ اگر آپ بھی ایسا محسوس کرتے ہیں تو فکر مت کریں۔‏ آپ کو نہ تو میٹھا کھانا بند کرنا پڑے گا اور نہ ہی روزانہ لمبی‌لمبی دوڑیں لگانی پڑیں گی۔‏ دراصل اپنے معمول میں کچھ تبدیلیاں لانے سے آپ زیادہ اچھے لگنے لگیں گے،‏ زیادہ چست‌وتوانا ہوں گے اور زندگی کے ہر حلقے میں بہتر کارکردگی دکھائیں گے۔‏ آئیں دیکھیں کہ آپ کے ہم‌عمر اِس سلسلے میں کیسے کامیاب رہے ہیں۔‏

اچھی خوراک کھائیں—‏اچھے لگیں!‏

خدا کے کلام میں لکھا ہے:‏ ”‏بےتحاشا کھانا مت کھاؤ۔‏“‏ (‏امثال ۲۳:‏۲۰‏،‏ کانٹیمپوریری انگلش ورشن‏)‏ لیکن اِس ہدایت پر عمل کرنا آسان نہیں ہے۔‏

● ‏”‏بہت سے نوجوانوں کی طرح مجھے بھی ہر وقت بھوک ستاتی ہے۔‏ اکثر میرے ماں‌باپ مجھ سے کہتے ہیں کہ تمہارا پیٹ ہے یا کنواں؟‏“‏—‏اینڈرو،‏ عمر ۱۵ سال۔‏

 ● ‏”‏چونکہ مجھے فوراً یہ احساس نہیں ہوتا کہ مَیں جو کچھ کھا رہی ہوں اِس سے مجھے نقصان ہو رہا ہے اِس لئے مَیں کھاتی چلی جاتی ہوں۔‏“‏—‏ڈینی‌ایلا،‏ عمر ۱۹ سال۔‏

کیا آپ کے خیال میں آپ کو کھانے کے معاملے میں زیادہ احتیاط سے کام لینا چاہئے؟‏ آئیں چند تجاویز پر غور کریں جن پر آپ کے ہم‌عمروں نے کامیابی سے عمل کِیا ہے۔‏

اپنے پیٹ کی سنیں۔‏ ‏”‏پہلے مَیں کھانے میں کلوریز کی تعداد گن کر کھانا کھاتی تھی لیکن اب مَیں تب کھانا بند کر دیتی ہوں جب مَیں سیر ہو جاتی ہوں۔‏“‏—‏جولیا،‏ عمر ۱۹ سال۔‏

ایسی چیزیں نہ کھائیں‌پئیں جو صحت کے لئے نقصان‌دہ ہیں۔‏ ‏”‏جب مَیں نے سوڈا جیسے میٹھے مشروب پینا بند کر دئے تو ایک مہینے کے اندراندر میرا وزن پانچ کلو کم ہو گیا۔‏“‏—‏پیٹر،‏ عمر ۲۱ سال۔‏

عادتوں میں تبدیلی لائیں۔‏ ‏”‏مَیں اپنی پلیٹ میں ایک ہی بار کھانا ڈالتی ہوں اور اِسے ختم کرکے دوبارہ نہیں لیتی۔‏“‏—‏اِرم،‏ عمر ۱۹ سال۔‏

کامیابی کا نسخہ:‏ دن میں تینوں وقت کا کھانا کھائیں ورنہ آپ کو اتنی بھوک لگے گی کہ جب آپ کھانے کے لئے بیٹھیں گے تو آپ حد سے زیادہ کھا لیں گے۔‏

ورزش کریں—‏چست‌وتوانا رہیں

خدا کے کلام میں لکھا ہے:‏ ”‏جسمانی ریاضت سے تھوڑا فائدہ تو ہوتا ہے۔‏“‏ (‏۱-‏تیمتھیس ۴:‏۸‏،‏ نیو اُردو بائبل ورشن‏)‏ البتہ بہت سے نوجوان ورزش کرنے کا شوق نہیں رکھتے۔‏

● ‏”‏جب مَیں کالج میں پڑھتا تھا تو بہت سے نوجوانوں کو پی‌ٹی میں اچھے نمبر نہیں ملتے تھے حالانکہ یہ تو سب سے آسان پیریڈ ہوتا تھا!‏“‏—‏رچرڈ،‏ عمر ۲۱ سال۔‏

● ‏”‏کئی نوجوان کہتے ہیں کہ کیا مَیں پاگل ہوں کہ اِس گرمی میں دوڑ لگا کے پسینے پسینے ہو جاؤں اور خود کو تھکاؤں؟‏ اِس سے بہتر تو یہ ہے کہ مَیں گھر بیٹھے ویڈیو گیم کے کسی کردار کو اپنے لئے دوڑاؤں۔‏“‏—‏روتھ،‏ عمر ۲۲ سال۔‏

کیا آپ ورزش کا نام سنتے ہی تھک جاتے ہیں؟‏ تو پھر نیچے دئے گئے تین فائدوں پر غور کریں جو آپ کو ورزش کا معمول قائم کرنے سے ملیں گے۔‏

فائدہ نمبر ۱:‏ آپ جلد بیمار نہیں ہوں گے۔‏ ‏”‏میرے ابو کہا کرتے تھے کہ اگر تُم ورزش کرنے کے لئے وقت نہیں نکالو گی تو پھر تمہیں بیمار ہونے کے لئے وقت نکالنا پڑے گا۔‏“‏—‏راحیلہ،‏ عمر ۱۹ سال۔‏

فائدہ نمبر ۲:‏ ٹینشن کم ہو جاتی ہے۔‏ ‏”‏جب مَیں ٹینشن لینے لگتی ہوں تو مَیں دوڑ لگاتی ہوں۔‏ اِس سے مَیں تازہ‌دم ہو جاتی ہوں اور میرا مزاج بھی اچھا ہو جاتا ہے۔‏“‏—‏امیلیا،‏ عمر ۱۶ سال۔‏

فائدہ نمبر ۳:‏ ورزش کرنے سے مزا آتا ہے۔‏ ‏”‏مجھے کُھلی فضا میں وقت گزارنا اچھا لگتا ہے۔‏ اِس لئے مَیں باقاعدگی سے پیدل سیر کرتی ہوں،‏ تیراکی کرتی ہوں اور سائیکل چلاتی ہوں۔‏“‏—‏روتھ،‏ عمر ۲۲ سال۔‏

کامیابی کا نسخہ:‏ ہفتے میں تین بار کم‌ازکم ۲۰ منٹ کے لئے ایسی ورزش کریں جس سے پسینہ آئے اور جو آپ کو پسند بھی ہو۔‏

نیند بھر کر سوئیں—‏اچھی کارکردگی دکھائیں

خدا کے کلام میں لکھا ہے:‏ ”‏ایک مٹھی بھر آرام محنت اور ہوا کے تعاقب سے بھری ہوئی دو مٹھیوں سے بہتر ہے۔‏“‏ (‏واعظ ۴:‏۶‏،‏ کیتھولک ترجمہ‏)‏ اگر  آپ نیند بھر کر نہیں سوئیں گے تو بہت سے حلقوں میں آپ کی کارکردگی متاثر ہوگی۔‏

● ‏”‏اگر میری نیند پوری نہیں ہوتی تو میرا دماغ ٹھیک طرح سے کام نہیں کرتا۔‏“‏—‏راحیلہ،‏ عمر ۱۹ سال۔‏

● ‏”‏دوپہر کے ۲ بجے مجھے اتنی نیند آتی ہے کہ بات کرتےکرتے مجھ پر نیند کا غلبہ ہونے لگتا ہے۔‏“‏—‏کرسٹین،‏ عمر ۱۹ سال۔‏

کیا آپ کی نیند اکثر پوری نہیں ہوتی؟‏ آپ کے ہم‌عمروں نے اِس مسئلے کو حل کرنے کے لئے یہ تجاویز آزمائی ہیں:‏

رات کو دیر تک جاگتے نہ رہیں۔‏ ‏”‏مَیں رات کو جلدی سونے کی کوشش کرتی ہوں۔‏“‏—‏کِرن،‏ عمر ۱۸ سال۔‏

دیر تک گپ‌شپ نہ لگائیں۔‏ ‏”‏کبھی‌کبھار میرے دوست مجھے آدھی رات کو ایس‌ایم‌ایس بھیجتے ہیں یا فون کرتے ہیں۔‏ لیکن مَیں زیادہ دیر تک اُن سے بات نہیں کرتا بلکہ سو جاتا ہوں۔‏“‏—‏رچرڈ،‏ عمر ۲۱ سال۔‏

معمول قائم کریں۔‏ ‏”‏مَیں نے رات کو سونے اور صبح اُٹھنے کا وقت مقرر کِیا ہے اور میری کوشش ہوتی ہے کہ مَیں اِسی وقت پر سو جاؤں اور اُٹھوں۔‏“‏—‏جمیلہ،‏ عمر ۲۰ سال۔‏

کامیابی کا نسخہ:‏ روزانہ آٹھ تا دس گھنٹے نیند لیں۔‏

ذرا اِن تین باتوں پر دوبارہ سے غور کریں جن کا اِس مضمون میں ذکر ہوا ہے۔‏ آپ کو اِن باتوں میں سے کن میں بہتری لانے کی ضرورت ہے؟‏

◯ خوراک ◯ ورزش ◯ نیند

نیچے لکھیں کہ آپ اِن باتوں میں بہتری لانے کے لئے کیا کر سکتے ہیں۔‏

‏․․․․․‏

یاد رکھیں کہ اگر آپ اپنی صحت کا خیال رکھنے کیلئے تھوڑی سی بھی تبدیلیاں لائیں گے تو آپ کو فائدے ہی فائدے ہوں گے۔‏ آپ زیادہ اچھے لگنے لگیں گے،‏ چست‌وتوانا رہیں گے اور زندگی کے ہر حلقے میں بہتر کارکردگی دکھائیں گے۔‏ تندرست اور توانا رہنا بڑی حد تک آپ کی کوششوں پر منحصر ہے۔‏ اُنیس سالہ اِرم کہتی ہے:‏ ”‏اپنی صحت کو بہتر بنانا آپ کے اپنے ہاتھ میں ہے۔‏“‏

‏”‏نوجوانوں کا سوال“‏ کے سلسلے میں مزید مضامین ویب سائٹ www.watchtower.org/ype پر مل سکتے ہیں۔‏

‏[‏فٹ‌نوٹ]‏

ذرا سوچیں

● اپنی صحت کا خیال رکھنے سے آپ کا اعتماد کیوں بڑھے گا؟‏

● جہاں تک صحت کا خیال رکھنے کا تعلق ہے،‏ آپ میانہ‌روی کیسے اختیار کر سکتے ہیں؟‏

‏[‏صفحہ ۱۱ پر بکس/‏تصویریں]‏

آپ کے ہم‌عمروں کی رائے

”‏انسان کا جسم گاڑی کی طرح ہوتا ہے۔‏ اِس کا خیال رکھنے کی ذمہ‌داری اُس کے مالک پر آتی ہے۔‏ اِس لئے مَیں باقاعدگی سے ورزش کرتا ہوں۔‏“‏

”‏اگر آپ کسی کے ساتھ مل کر باقاعدگی سے ورزش کرتے ہیں تو آپ ناغہ نہیں کریں گے کیونکہ آپ اُس شخص کو مایوس نہیں کرنا چاہتے ہیں۔‏“‏

”‏ورزش کرکے مَیں بہت اچھا محسوس کرتی ہوں۔‏ اور چونکہ ورزش کرنے سے میرے جسم اور میری رنگت پر اچھا اثر پڑتا ہے اِس لئے میرا اعتماد بھی بڑھ جاتا ہے۔‏“‏

‏[‏تصویریں]‏

ایتھن

برِیانا

امیلیا

‏[‏صفحہ ۱۲ پر بکس]‏

‏’‏مَیں اپنی عادتوں میں تبدیلیاں لائی‘‏

”‏چھ سال کی عمر میں مَیں کافی گول‌مٹول تھی۔‏ مَیں میٹھی چیزوں کی بہت شوقین تھی۔‏ آہستہ‌آہستہ مَیں اِن چیزوں کی اتنی عادی ہو گئی کہ مَیں سارا دن کوئی نہ کوئی سنیک کھاتی رہتی تھی۔‏ مجھے ورزش کرنا بھی سخت بُرا لگتا تھا۔‏ اِس طرح مَیں بہت موٹی ہو گئی۔‏ لیکن مَیں تو موٹی نہیں ہونا چاہتی تھی۔‏ اپنی حالت کو دیکھ کر مجھے بڑا افسوس ہوتا تھا۔‏ اِس لئے مَیں اپنا وزن کم کرنے کے لئے اکثر ڈائٹنگ کرتی تھی۔‏ لیکن ڈائٹنگ ختم کرنے کے بعد میرا وزن پھر سے بڑھ جاتا تھا۔‏ پھر جب مَیں ۱۵ سال کی ہوئی تو مَیں نے سوچا کہ اب بہت ہو چکا۔‏ مَیں نے فیصلہ کِیا کہ مَیں اپنا وزن اِس طرح کم کروں گی کہ وہ دوبارہ سے نہ بڑھے۔‏ مَیں نے ایک کتاب خریدی جس میں متوازن غذا اور ورزش کے سلسلے میں بنیادی معلومات دی گئی تھیں۔‏ اِس میں جو مشورے دئے گئے تھے اِن پر مَیں نے عمل کرنا شروع کر دیا۔‏ مَیں نے ٹھان لی کہ اگر مجھ سے بھو ل ہو بھی جائے تو مَیں پھر بھی ہمت نہیں ہاروں گی بلکہ اِن مشوروں پر عمل کرتی رہوں گی۔‏ اور پتہ ہے کیا؟‏ مَیں کامیاب رہی۔‏ ایک سال کے اندراندر مَیں نے اپنا ۲۵ کلو وزن کم کر لیا۔‏ اور دو سال سے میرا وزن نہیں بڑھا ہے۔‏ مجھے خود بھی اِس بات پر یقین نہیں آ رہا کہ ایسا بھی ہو سکتا ہے۔‏ میرے خیال میں مَیں اِس لئے کامیاب رہی ہوں کیونکہ مَیں نے صرف ڈائٹنگ ہی نہیں کی بلکہ مَیں اپنی عادتوں میں تبدیلیاں بھی لائی۔‏ جب مَیں یہ سمجھ گئی کہ کامیاب ہونے کے لئے مجھے زندگی کے ہر پہلو میں تبدیلیاں لانی پڑیں گی تو مَیں نے خوشی سے ایسا کِیا۔‏“‏—‏کِرن،‏ عمر ۱۸ سال۔‏

‏[‏صفحہ ۱۲ پر تصویر]‏

آپ کی صحت ایک گاڑی کی طرح ہے۔‏ اگر آپ اِس کا خیال نہیں رکھیں گے تو یہ خراب ہو جائے گی