محمد بوعزیزی ایک 26 سالہ نوجوان تھے جو تیونس میں رہتے تھے۔‏ حالانکہ وہ پڑھے لکھے تھے لیکن اُن کو کوئی اچھی ملازمت نہیں ملی۔‏ روزی روٹی کمانے کے لئے آخرکار اُنہوں نے سبزیوں اور پھلوں کا ٹھیلا لگا لیا۔‏ اکثر کچھ پولیس والے ٹھیلے پر آ کر اُن سے رشوت لیتے تھے۔‏ لیکن 17 دسمبر 2010ء کی صبح بوعزیزی کے صبر کا پیمانہ لبریز ہو گیا۔‏ ہوا یہ کہ کچھ پولیس والوں نے زبردستی اُن کے ٹھیلے سے سارے پھل اُٹھا لئے۔‏ لیکن جب اُنہوں نے ترازو بھی اُٹھانا چاہا تو بوعزیزی نے اُنہیں روکنے کی کوشش کی۔‏ جو لوگ وہاں کھڑے یہ دیکھ رہے تھے،‏ اُن میں سے بعض کا کہنا ہے کہ جب بوعزیزی پولیس والوں کو روک رہے تھے تو ایک پولیس والی نے اُن کو تھپڑ مارا۔‏

بوعزیزی اپنی بےعزتی برداشت نہ کر سکے۔‏ وہ بڑے غصے میں قریب کے ایک سرکاری دفتر میں اپنی شکایت درج کرانے گئے۔‏ لیکن کسی نے اُن کی نہ سنی۔‏ بعض لوگوں کا کہنا ہے کہ بوعزیزی دفتر کے سامنے کھڑے ہو کر چلّا رہے تھے کہ ”‏مجھے بتاؤ،‏ مَیں اپنے گھر والوں کا پیٹ کیسے پالوں؟‏“‏ پھر بوعزیزی نے اپنے اُوپر تیل ڈالا اور خود کو آگ لگا لی۔‏ وہ بُری طرح جُھلس گئے اور تقریباً تین ہفتے بعد فوت ہو گئے۔‏

بوعزیزی نے جو کچھ کِیا،‏ وہ ایک چنگاری کی طرح تھا جس نے تیونس کے ساتھ‌ساتھ کئی اَور ملکوں میں آگ لگا دی۔‏ کئی لوگوں کا خیال ہے کہ اِسی وجہ سے تیونس کی عوام نے حکومت کے خلاف احتجاج کِیا اور اُس کا تختہ اُلٹ دیا۔‏ احتجاج کی یہ لہر بہت سے عرب ملکوں میں پھیل گئی۔‏ سن 2011ء میں یورپی پارلیمنٹ نے بوعزیزی اور چار اَور لوگوں کو اپنے حق کے لئے آواز اُٹھانے پر ایوارڈ دیا۔‏ اِس کے ساتھ‌ساتھ لندن کے اخبار دی ٹائمز نے بوعزیزی کو 2011ء کی بہترین شخصیت قرار دیا۔‏

اِس واقعے سے ظاہر ہوتا ہے کہ احتجاج ایک طاقت‌ور ہتھیار ثابت ہو سکتا ہے۔‏ لیکن آج‌کل اِتنے زیادہ احتجاج کیوں ہوتے ہیں؟‏ کیا احتجاج کئے بغیر مسائل کو حل کِیا جا سکتا ہے؟‏

بہت سے لوگ اِن باتوں کی وجہ سے احتجاج کرتے ہیں:‏

• سماجی نظام سے مایوسی۔‏ جب ایک ملک کی مالی حالت ٹھیک ہوتی ہے اور حکومت عوام کی ضروریات کو پورا کرتی ہے تو لوگ احتجاج کرنے کی طرف زیادہ مائل نہیں ہوتے۔‏ اگر اُنہیں کسی مسئلے کا سامنا ہوتا بھی ہے تو وہ حکومت کے بنائے نظام کے تحت اِسے حل کرتے ہیں۔‏ اِس کے برعکس اگر لوگوں کو لگتا ہے کہ اُن کے ملک کا نظام خراب ہے،‏ عوام کو اِنصاف نہیں مل رہا اور حکومت لوگوں کو سہولیات فراہم کرنے میں طرف‌داری سے کام لے رہی ہے تو لوگ احتجاج کرنے پر اُتر آتے ہیں۔‏

• کوئی خاص واقعہ۔‏ کبھی‌کبھار کوئی ایک واقعہ لوگوں کو احتجاج کرنے پر اُکساتا ہے۔‏ شاید لوگ پہلے اِس قسم کے واقعات پر چپ رہتے تھے لیکن اِس واقعے پر اُن کو لگتا ہے اُنہیں اِس کے خلاف آواز اُٹھانی چاہئے۔‏ محمد بوعزیزی کے واقعے پر تیونس کے لوگوں نے ایسا ہی کِیا تھا۔‏ جب بھارت میں ایک سماجی کارکن انا ہزارے نے رشوت‌خوری کے خلاف بھوک ہڑتال کی تو 450 شہروں اور گاؤں میں اُن کے حمایتیوں نے بھی احتجاج کِیا۔‏

خدا کے کلام میں بہت پہلے بتا دیا گیا تھا کہ اِس دُنیا میں ”‏کچھ لوگوں کے پاس اِختیار ہوتا ہے اور باقی لوگوں کو اِختیار والوں کے ہاتھوں تکلیف سہنی پڑتی ہے۔‏“‏ (‏واعظ 8:‏9‏،‏ گڈ نیوز ٹرانسلیشن‏)‏ پُرانے زمانے کی نسبت آج‌کل رشوت‌خوری اور نااِنصافی زیادہ پھیل گئی ہے۔‏ اب لوگ سیاسی اور معاشی نظام سے اَور بھی زیادہ مایوس ہو چکے ہیں۔‏ اِس کے علاوہ آج‌کل سمارٹ‌فون،‏ اِنٹرنیٹ اور ٹی‌وی کی وجہ سے کسی واقعے کی خبر جنگل میں آگ کی طرح پھیل جاتی ہے اور بڑے پیمانے پر احتجاج کا باعث بنتی ہے۔‏

احتجاج کرنے والوں کا دعویٰ ہے کہ احتجاج کے یہ فائدے ہیں:‏

• غریبوں کی مدد ہوتی ہے۔‏ سن 1931ء میں ریاستہائے متحدہ امریکہ کے شہر شکاگو میں بہت سے لوگ بےروزگار تھے اور اِس وجہ سے مکان کا کرایہ ادا نہیں کر سکتے تھے۔‏ جب مالک مکانوں نے اُن کو گھر خالی کرنے کے لئے نوٹس بھیجے تو اِن لوگوں نے اِس کے خلاف احتجاج کئے۔‏ اِن احتجاجوں کی وجہ سے حکومت نے لوگوں کو کچھ عرصے تک کرایہ دئے بغیر گھر میں رہنے کی اِجازت دے دی اور بعض لوگوں کو ملازمت بھی دی۔‏ شہر نیو یارک میں بھی ایسے ہی مسئلے پر احتجاج کِیا گیا جس کی وجہ سے 77 ہزار خاندان بےگھر ہونے سے بچ گئے۔‏

• لوگوں کو اِنصاف ملتا ہے۔‏ امریکہ کی ریاست الاباما کے شہر مونٹ‌گومری میں بہت عرصے تک بسوں میں سیاہ‌فام اور سفیدفام لوگوں کے لئے الگ الگ سیٹیں ہوتی تھیں۔‏ لیکن یہاں کے بہت سے لوگ اِس اِمتیازی سلوک کو ختم کرنا چاہتے تھے۔‏ اِس لئے اُنہوں نے 1955ء سے 1956ء تک احتجاج کے طور پر بسوں کو اِستعمال نہیں کِیا۔‏ اِس کے نتیجے میں حکومت نے حکم جاری کِیا کہ بسوں میں سیاہ‌فام اور سفیدفام لوگوں کے لئے الگ الگ سیٹیں نہیں ہوں گی۔‏

•   تعمیراتی کام روک دیا جاتا ہے۔‏ ایک کمپنی ہانگ‌کانگ کے قریب کوئلے سے چلنے والا ایک بجلی‌گھر بنانا چاہتی تھی۔‏ لیکن دسمبر 2011ء میں ہزاروں لوگوں نے اِس منصوبے کے خلاف احتجاج کِیا کیونکہ اُنہیں لگتا تھا کہ اِس سے بہت زیادہ آلودگی پھیلے گی۔‏ اِس کے نتیجے میں اِس منصوبے کو روک دیا گیا۔‏

سچ ہے کہ احتجاج کرنے والے کسی حد تک اپنی مانگیں پوری کرا لیتے ہیں۔‏ لیکن ہمیشہ ایسا نہیں ہوتا۔‏ مثال کے طور پر کچھ سیاسی رہنما لوگوں کی مانگیں پوری کرنے کی بجائے اُن پر اَور زیادہ سختی کرنے لگتے ہیں۔‏ حال ہی میں مشرقِ‌وسطیٰ کے ایک صدر نے اپنے ملک میں ہونے والے احتجاج کے بارے میں کہا:‏ ”‏ہمیں احتجاج کرنے والوں کے خلاف سخت کارروائی کرنی ہوگی۔‏“‏ اور اِس صدر نے ایسا کِیا بھی۔‏ اِس کے نتیجے میں اِس ملک میں ہزاروں احتجاجی اپنی جان سے ہاتھ دھو بیٹھے۔‏

حالانکہ کبھی‌کبھار احتجاج کرنے والوں کے مطالبے پورے ہو جاتے ہیں لیکن اِس کے بعد اکثر اَور مسئلے کھڑے ہو جاتے ہیں۔‏ مثال کے طور پر ایک افریقی ملک کے حکمران کو عوام کے احتجاج کرنے پر عہدے سے ہٹا دیا گیا۔‏ اِس احتجاج میں حصہ لینے والے ایک شخص نے نئی حکومت کے بارے میں رسالے ٹائم کو یہ بیان دیا:‏ ”‏ہم نے تو سوچا تھا کہ ملک کے حالات ٹھیک ہو جائیں گے لیکن فوراً ہی حالات بہت بگڑ گئے۔‏“‏

بہت سے مشہور لوگوں کا کہنا ہے کہ ہر اِنسان کو ظلم کے خلاف اپنی آواز اُٹھانی چاہئے۔‏ اِس سلسلے میں جمہوریہ چیک کے سابق صدر واسلاو ہاویل کے بیان پر غور کریں جنہوں نے اِنسانی حقوق کی خاطر کئی  سال جیل میں کاٹے۔‏ اُنہوں نے کہا:‏ ”‏جو شخص ظلم کے خلاف احتجاج کرتا ہے،‏ اُسے خود کو صحیح ثابت کرنے کے لئے اپنی جان تک دینے کو تیار رہنا چاہئے۔‏“‏

محمد بوعزیزی اور کئی اَور لوگوں نے ایسا ہی کِیا۔‏ حال ہی میں ایک ایشیائی ملک میں بہت سے لوگوں نے مذہبی اور سیاسی نااِنصافیوں سے تنگ آ کر خود کو آگ لگا لی۔‏ اِنہی نااِنصافیوں کے شکار ایک آدمی نے رسالے نیوز ویک کو بتایا کہ ”‏نہ تو ہمارے پاس بندوقیں ہیں اور نہ ہی ہم لوگوں کو نقصان پہنچانا چاہتے ہیں۔‏ اپنی جان دینے کے سوا ہمارے پاس کوئی اَور راستہ نہیں ہے۔‏“‏

پاک کلام میں بتایا گیا ہے کہ نااِنصافی،‏ رشوت‌خوری اور ظلم‌وستم کو کیسے ختم کِیا جائے گا۔‏ اِس میں یہ بھی بتایا گیا ہے کہ خدا نے آسمان پر ایک حکومت قائم کی ہے جو زمین کے سیاسی اور معاشی نظام کو ختم کر دے گی۔‏ خدا کی حکومت کے بادشاہ کے بارے میں یہ پیش‌گوئی کی گئی ہے کہ ”‏وہ محتاج کو جب وہ فریاد کرے اور غریب کو جس کا کوئی مددگار نہیں چھڑائے گا۔‏ وہ فدیہ دے کر اُن کی جان کو ظلم اور جبر سے چھڑائے گا۔‏“‏—‏زبور 72:‏12،‏ 14‏۔‏

یہوواہ کے گواہ مانتے ہیں کہ صرف خدا کی بادشاہت کے ذریعے ہی زمین پر امن قائم ہوگا۔‏ (‏متی 6:‏9،‏ 10‏)‏ اِسی وجہ سے وہ احتجاجوں میں حصہ نہیں لیتے۔‏ شاید کچھ لوگوں کو اِس بات پر یقین کرنا مشکل لگے کہ خدا کی حکومت اِنسانوں کے مسائل کو حل کرے گی۔‏ لیکن بہت سے لوگوں نے پاک کلام سے اِس بات کے ثبوت دیکھے ہیں کہ خدا کی بادشاہت واقعی ایسا کرے گی۔‏ اِس وجہ سے اُن کو خدا کی حکومت پر پورا بھروسا ہو گیا ہے۔‏ کیوں نہ آپ بھی پاک کلام سے اِس حکومت کے بارے میں سیکھیں؟‏