ایک رپورٹ میں بتایا گیا ہے کہ پیدل سڑک پار کرنے والوں میں سے تقریباً 30 فیصد لوگوں نے دھیان سے سڑک پار نہیں کی حالانکہ وہاں بہت رش تھا۔‏ اِس کی وجہ یہ تھی کہ یہ لوگ گانے سُن رہے تھے،‏ فون پر بات کر رہے تھے یا کسی اَور کام میں مگن تھے۔‏ موبائل فون سے میسج بھیجنے والوں کا دھیان سب سے زیادہ بھٹکا۔‏ میسج بھیجنے والوں نے اُن لوگوں کی نسبت سڑک پار کرنے میں 18 فیصد زیادہ وقت لگایا جنہوں نے دھیان سے سڑک پار کی۔‏ دوسروں کی نسبت اِن لوگوں نے تقریباً چار گُنا زیادہ بار ٹریفک سگنل کو توڑا،‏ خطرناک جگہ سے سڑک پار کی یا دونوں طرف دیکھے بغیر سڑک پار کی۔‏

جو لوگ نائیجیریا کی عورتوں کو نوکری کے بہانے یورپ لا کر زبردستی جسم‌فروشی کراتے ہیں،‏ وہ پہلے اِن عورتوں کو نائجیریا میں ایسے درباروں پر لے کر جاتے ہیں جہاں کالا جادو کِیا جاتا ہے۔‏ وہاں وہ اِن عورتوں سے قسم لیتے ہیں کہ جو کچھ اُن سے کرایا جائے گا،‏ وہ اُسے راز میں رکھیں گی۔‏ اِن عورتوں کے دل میں یہ ڈر بیٹھا ہوتا ہے کہ قسم توڑنے پر بدروحیں سزا دیں گی۔‏ جسم‌فروشی کرانے والے اِس ڈر کا فائدہ اُٹھاتے ہیں۔‏

پانچ سے دس فیصد ایسے لوگ جو کافی عرصے سے بےروزگار ہیں،‏ کسی ملازمت کے لئے درخواست دیتے وقت اپنی دستاویزات میں یونیورسٹی کی ڈگری اور تجربے کا ذکر نہیں کرتے کیونکہ کمپنیاں اکثر ایسے لوگوں کو نوکری پر نہیں رکھتیں۔‏

خیال کِیا جاتا ہے کہ غریب ملکوں میں ہونے والی اموات کی ایک بڑی وجہ لکڑی اور کوئلے سے جلنے والے چولھوں کا دھواں ہے۔‏ ہر سال اِن ملکوں میں 40 لاکھ لوگ سانس کی ایسی بیماریوں کی وجہ سے مر جاتے ہیں جو اُنہیں دھوئیں سے لگتی ہیں۔‏ تحقیق‌دانوں کا کہنا ہے کہ لکڑی اور کوئلے سے جو دھواں اُٹھتا ہے،‏ وہ سگریٹ کے دھوئیں کی طرح جان‌لیوا ہوتا ہے۔‏