جنوبی سپین کے قصبے لورکا میں 2011ء میں زلزلہ آیا تھا جس میں نو لوگ ہلاک اور درجنوں زخمی ہوئے تھے۔‏ کچھ سائنس‌دانوں کو لگتا ہے کہ اِس زلزلے کے ذمےدار اِنسان ہیں۔‏ ماہرینِ‌ارضیات نے دیکھا ہے کہ جس علاقے میں زلزلہ آیا تھا،‏ وہاں کی زمین سے فصلوں کو سیراب کرنے کے لیے بہت زیادہ مقدار میں پانی نکالا گیا تھا۔‏

چینی سیاحوں نے 2012ء میں بین‌الاقوامی سیاحت پر 102 ارب امریکی ڈالر خرچ کیے۔‏ اقوامِ‌متحدہ کے اِدارہ برائے عالمی سیاحت کے مطابق یہ پہلی بار ہوا ہے کہ بین‌الاقوامی سیاحت پر رقم خرچ کرنے میں چین پہلے نمبر پر آیا ہے۔‏ چین نے اِس معاملے میں جرمنی اور ریاستہائے متحدہ امریکہ کو بھی پیچھے چھوڑ دیا ہے۔‏ اِن دونوں میں سے ہر ملک کے سیاحوں نے بین‌الاقوامی سیاحت پر تقریباً 84 ارب امریکی ڈالر خرچ کیے۔‏

برطانیہ کے طبی رسالے بی‌ایمجے کی ایک رپورٹ کے مطابق 1920ء سے 1945ء کے دوران پیدا ہونے والے تقریباً 68 ہزار جاپانیوں کا اوسطاً 23 سال تک جائزہ لیا گیا۔‏ پتہ چلا کہ جن عورتوں نے بیس سال سے کم عمر میں سگریٹ پینا شروع کِیا،‏ وہ اُن عورتوں کی نسبت دس سال پہلے فوت ہو گئیں جنہوں نے کبھی سگریٹ نہیں پی۔‏ اور جن آدمیوں نے بیس سال سے کم عمر میں سگریٹ پینا شروع کِیا،‏ وہ سگریٹ نہ پینے والے آدمیوں کی نسبت آٹھ سال پہلے فوت ہو گئے۔‏

پلاسٹک کی تھیلیوں کو درآمد کرنے،‏ بنانے اور اِن کے اِستعمال پر پابندی لگا دی گئی ہے تاکہ آبی جانوروں اور خشکی کے جانوروں کو بچایا جا سکے۔‏ پلاسٹک کی تھیلیوں کو نگلنے کی وجہ سے یہ جانور مر سکتے ہیں۔‏ حکومت ایسی تھیلیوں کے اِستعمال پر زور دے رہی ہے جو قدرتی طور پر گل سڑ جاتی ہیں۔‏

اِنشورنس کمپنیوں کو موسمی آفات کی وجہ سے ہر سال تقریباً 50 ارب امریکی ڈالر [‏تقریباً 53 کھرب 69 ارب روپے]‏ کے نقصان کی بھرپائی کرنی پڑتی ہے۔‏ اگر پیسے کی قدر کے حساب سے دیکھا جائے تو 1980ء سے لے کر ہر دس سال بعد اِنشورنس کمپنیوں کو دُگنا نقصان ہوا ہے۔‏