جنگی نقصان کی تلافی کرنا

ابرہام نے ۲۰ سال تک گوریلا فوج میں رہنے کے بعد اب جنگ میں کبھی حصہ نہ لینے کا قصد کر لیا ہے۔‏ * دراصل،‏ اُسکے سابقہ دُشمن اُسکے جگری دوست بن گئے ہیں۔‏ اُس میں یہ تبدیلی کیسے آئی؟‏ بائبل کی بدولت۔‏ اس نے ابرہام کو اُمید اور بصیرت عطا کی جس سے وہ انسانی معاملات کو خدائی نقطۂ‌نظر سے دیکھنے کے قابل ہوا۔‏ بائبل نے اُسکی متشدّد ذہنیت کو ختم کر ڈالا جس سے وہ اپنے رنج‌والم اور نفرت‌وعناد پر قابو پانے لگا۔‏ اُس نے محسوس کِیا کہ بائبل دل کیلئے زوداثر دوا ہے۔‏

بائبل جذباتی گھاؤ بھرنے میں کسی شخص کی مدد کیسے کر سکتی ہے؟‏ یہ اُن حالتوں کو تو بدل نہیں سکتی تھی جنکا ابرہام کو تجربہ ہو چکا تھا۔‏ البتہ،‏ خدا کے کلام کی پڑھائی اور غوروخوض سے وہ اپنے خالق کا اندازِفکر اپنانے کے قابل ہو گیا۔‏ اب اُسکے پاس مستقبل کی اُمید اور نئی ترجیحات ہیں۔‏ خدا جن چیزوں کو اہم سمجھتا ہے وہ اُسکے نزدیک بھی اہم ہیں۔‏ جب ایسا واقع ہونا شروع ہوا تو اُسکے دل کے زخم بھرنے لگے۔‏ یوں ابرہام کی بدلنے میں مدد ہوئی۔‏

خانہ‌جنگی میں ملوث

ابرہام ۱۹۳۰ کے دہے میں افریقہ میں پیدا ہوا۔‏ دوسری عالمی جنگ کے بعد،‏ ابرہام کے مُلک پر ایک طاقتور پڑوسی مُلک کی حکومت تھی جس سے اُسکے ہم‌وطن آزادی حاصل کرنا چاہتے تھے۔‏ ابرہام ۱۹۶۱ میں،‏ تحریکِ‌آزادی میں شامل ہو گیا اور اُسی طاقتور پڑوسی مُلک کے خلاف گوریلا جنگ لڑی۔‏

ابرہام بیان کرتا ہے کہ ”‏وہ ہمارے جانی دُشمن تھے۔‏ اُنہوں نے ہمیں ہلاک کرنے کا منصوبہ بنایا جس کا انتقام لینے کیلئے ہم نے بھی اُنہیں نیست کر ڈالنے کی ٹھان لی۔‏“‏

ابرہام کی زندگی ہر لمحہ خطرے میں رہتی تھی جس کی وجہ سے وہ ۲۰ سال تک جنگ لڑنے کے بعد ۱۹۸۲ میں یورپ فرار ہو گیا۔‏ اب اُسکی عمر تقریباً ۵۰ سال تھی اور اُسکے پاس اپنی زندگی کا جائزہ لینے کا وقت تھا۔‏ کیا اُسکے خوابوں کی تعبیر ہوئی تھی؟‏ اُسکا مستقبل کیسا ہوگا؟‏ ابرہام کی ملاقات یہوواہ کے گواہوں میں سے کچھ لوگوں کیساتھ ہوئی اور اُس نے اُنکے اجلاسوں پر حاضر ہونا شروع کر دیا۔‏ اُسے یاد تھا کہ کچھ سال پہلے افریقہ میں ایک گواہ نے اُسے ایک اشتہار دیا تھا جسے اُس نے پڑھا بھی تھا۔‏ اُس اشتہار میں زمینی فردوس اور نوعِ‌انسان پر حکمرانی کرنے والی آسمانی حکومت کی بابت معلومات تھیں۔‏ کیا یہ واقعی سچ ہو سکتا تھا؟‏

 ابرہام بیان کرتا ہے:‏ ”‏مَیں نے بائبل کی مدد سے سمجھ لیا تھا کہ مَیں نے جنگ میں وقت ضائع کِیا تھا۔‏ صرف خدا کی بادشاہت ہی سب کیساتھ انصاف کریگی۔‏“‏

جب ابرہام کا یہوواہ کے گواہ کے طور پر بپتسمہ ہوا تو اس کے تھوڑے ہی عرصہ بعد رابرٹ نامی ایک شخص افریقہ سے بھاگ کر اُسی یورپی شہر میں آ گیا جہاں ابرہام مقیم تھا۔‏ رابرٹ اور ابرہام ایک دوسرے کے جنگی حریف تھے۔‏ رابرٹ اکثر زندگی کے حقیقی مقصد کی بابت سوچا کرتا تھا۔‏ وہ مذہبی رُجحان رکھتا تھا اور بائبل کے کئی حصے پڑھنے کی بدولت خدا کے نام یہوواہ سے واقف تھا۔‏ جب ابرہام کی کلیسیا کے گواہوں نے بائبل کی بہتر سمجھ حاصل کرنے کے لئے رابرٹ کو مدد کی پیشکش کی تو اُس نے فوراً قبول کر لی۔‏

رابرٹ وضاحت کرتا ہے:‏ ”‏مَیں شروع ہی سے اس بات کا قائل تھا کہ گواہ یہوواہ اور یسوع کو الگ‌الگ ہستیاں سمجھتے ہوئے اُنکے ناموں کو کتنی دُرستی سے استعمال کرتے ہیں۔‏ یہ بات مَیں نے بائبل سے پہلے ہی سیکھ لی تھی۔‏ گواہ صاف‌ستھرا لباس پہنتے اور تمام قومیتوں کے لوگوں سے مہربانہ سلوک کرتے ہیں۔‏ ایسی باتوں سے مَیں بہت ہی متاثر تھا۔‏“‏

دُشمن دوست بن جاتے ہیں

رابرٹ اور ابرہام پہلے ایک دوسرے کے جانی دُشمن تھے مگر اب وہ قریبی دوست ہیں۔‏ وہ یہوواہ کے گواہوں کی ایک ہی کلیسیا میں کُل‌وقتی مُنادوں کے طور پر خدمت کرتے ہیں۔‏ ”‏جنگ کے دوران مَیں اکثر سوچا کرتا تھا کہ پڑوسی ممالک کے لوگ ایک ہی مذہب کے پیروکار ہونے کے باوجود ایک دوسرے سے اتنی نفرت کیوں کرتے ہیں،‏“‏ ابرہام وضاحت کرتا ہے۔‏ ”‏مَیں اور رابرٹ ایک ہی چرچ کے رُکن ہونے کے باوجود ایک دوسرے کے خلاف لڑ رہے تھے۔‏ اب ہم دونوں یہوواہ کے گواہ ہیں اور ہمارے ایمان نے ہمیں متحد کر دیا ہے۔‏“‏

‏”‏یہی تو فرق ہے،‏“‏ رابرٹ مزید بیان کرتا ہے۔‏ ”‏اب ہمارا تعلق ایک ایسے ایمان سے ہے جس نے ہمیں حقیقی برادری کا حصہ بنا دیا ہے۔‏ اب ہم کبھی جنگ نہیں کرینگے۔‏“‏ بائبل نے ان سابقہ دُشمنوں کے دلوں پر گہرا اثر کِیا ہے۔‏ نفرت‌وعناد بتدریج اعتماد اور دوستی میں بدل گئے ہیں۔‏

جب ابرہام اور رابرٹ جنگ میں تھے تو دو اَور نوجوان کسی دوسری جگہ پر دو پڑوسی ممالک کی جنگ میں ایک دوسرے کے خلاف لڑ رہے تھے۔‏ جلد ہی بائبل اُن کے زخموں کا مرہم بھی بنی۔‏ کیسے؟‏

مارو اور پھر شہید ہو جاؤ

ایک مذہبی خاندان میں پرورش پانے والے گبرئیل کو سکھایا گیا تھا کہ اُسکا آبائی وطن مُقدس جنگ لڑ رہا ہے۔‏ لہٰذا،‏ ۱۹ سال کی عمر میں،‏ وہ رضاکارانہ طور پر فوج میں بھرتی ہو گیا اور سب سے اگلے مورچوں میں بھیجے جانے کی درخواست کی۔‏ وہ ۱۳ ماہ تک جنگی خطروں سے کھیلتا رہا،‏ بعض‌اوقات تو وہ دُشمن سے صرف ایک میل کے فاصلے پر ہوتا تھا۔‏ ”‏مجھے ایک موقع خاص طور پر یاد ہے،‏“‏ وہ بیان کرتا ہے۔‏ ”‏ہمارے کمانڈر نے  ہمیں بتایا کہ دُشمن آج رات حملہ کرنے والا ہے۔‏ ہم اسقدر جوش میں تھے کہ ہم نے ساری رات گولہ‌باری جاری رکھی۔‏“‏ وہ پڑوسی مُلک کے باشندوں کو اپنا دُشمن اور موت کے لائق سمجھتا تھا۔‏ ”‏مَیں زیادہ سے زیادہ لوگوں کو مارنا چاہتا تھا۔‏ تاہم،‏ اپنے دیگر دوستوں کی طرح مجھے بھی جامِ‌شہادت نوش فرمانے کی حسرت تھی۔‏“‏

البتہ،‏ ایک وقت آیا جب گبرئیل کی آنکھیں کھل گئیں۔‏ وہ پہاڑوں پر بھاگ گیا جہاں سے وہ سرحد پار کر کے ایک غیرجانبدار مُلک میں آ گیا اور پھر یورپ چلا گیا۔‏ وہ خدا سے ہمیشہ یہی سوال کرتا تھا کہ زندگی اسقدر کٹھن کیوں ہے اور کیا یہ ساری مشکلات اُسکی طرف سے سزا کا ثبوت ہیں۔‏ جب اُسکی ملاقات یہوواہ کے گواہوں کیساتھ ہوئی تو اُنہوں نے اُسے بائبل میں سے بتایا کہ زندگی آجکل مشکلات سے پُر کیوں ہے۔‏—‏متی ۲۴:‏۳-‏۱۴؛‏ ۲-‏تیمتھیس ۳:‏۱-‏۵‏۔‏

بائبل کی ترقی‌پسندانہ تحقیق نے گبرئیل پر واضح کر دیا کہ سچائی اسی میں ہے۔‏ ”‏مَیں نے سیکھا کہ ہمارے لئے فردوسی زمین پر ابد تک زندہ رہنا ممکن ہے۔‏ دلچسپی کی بات تو یہ ہے کہ بچپن سے مجھے اسی کی آرزو تھی۔‏“‏ بائبل نے گبرئیل کے مضطرب دل کو اطمینان بخشا۔‏ اُسکے گہرے جذباتی زخم بھرنے لگے۔‏ لہٰذا،‏ جب اُسکی ملاقات اپنے سابقہ دُشمن ڈینئل سے ہوئی تو گبرئیل کے دل میں اُس کیلئے کسی قسم کی کوئی نفرت نہیں تھی۔‏ لیکن ڈینئل یورپ کس لئے آیا تھا؟‏

‏”‏اگر واقعی تیرا کوئی وجود ہے تو میری مدد کر!‏“‏

ڈینئل نے ایک کیتھولک کے طور پر پرورش پائی تھی اور وہ ۱۸ سال کی عمر میں فوج میں بھرتی ہوا تھا۔‏ وہ جنگ میں گبرئیل کا حریف تھا۔‏ میدانِ‌جنگ میں ڈینئل ایک ٹینک پر سوار دُشمن کی جانب بڑھ رہا تھا کہ ایک میزائل سیدھا آ کر ٹینک کو لگا۔‏ اُس کے دوست مارے گئے جبکہ اُسے شدید چوٹیں آئیں اور اُسے اسیر کر لیا گیا۔‏ اُس نے کئی مہینے ہسپتال اور کیمپ میں گزارے جس کے بعد اُسے ایک غیرجانبدار مُلک میں بھیج دیا گیا۔‏ تنہائی اور مایوسی کے عالم میں اُس نے خودکُشی کرنی چاہی۔‏ ڈینئل نے خدا سے دُعا کی:‏ ”‏اگر واقعی تیرا کوئی وجود ہے تو میری مدد کر!‏“‏ اگلے ہی دن،‏ یہوواہ کے گواہوں نے اُسکے دروازے پر دستک دی اور اُسکے بہت سے سوالوں کا جواب دیا۔‏ بالآخر،‏ اُس نے یورپ میں پناہ لے لی۔‏ ایک بار پھر،‏ ڈینئل نے گواہوں سے رابطہ کِیا اور بائبل مطالعہ شروع کر دیا۔‏ بائبل کی تعلیم نے اُسکی پریشانی اور تلخی کو ختم کر دیا۔‏

گبرئیل اور ڈینئل اب اچھے دوست اور یہوواہ کے بپتسمہ‌یافتہ گواہوں کی روحانی برادری کا حصہ ہیں۔‏ ”‏یہوواہ کیلئے میری محبت اور بائبل کے علم نے خدائی نقطۂ‌نظر اپنانے میں میری مدد کی ہے۔‏ ڈینئل اب میرا دُشمن نہیں ہے۔‏ کئی سال پہلے مَیں نے اُسے قتل کر کے خوشی محسوس کی ہوتی۔‏ لیکن بائبل نے مجھے اسکے بالکل برعکس تعلیم دی ہے کہ اُسکی خاطر خوشی سے اپنی جان دے دوں،‏“‏ گبرئیل بیان کرتا ہے۔‏

‏”‏مَیں نے مختلف مذاہب اور قومیتوں کے لوگوں کو ایک دوسرے کو قتل کرتے دیکھا ہے،‏“‏ ڈینئل بیان کرتا ہے۔‏ ”‏بلکہ ایک ہی مذہب کے لوگ مدِمقابل کھڑے ہو کر ایک دوسرے کو قتل کرتے ہیں۔‏ جب  مَیں نے یہ سب کچھ دیکھا تو مجھے محسوس ہوا کہ اس کا ذمہ‌دار خدا ہی ہے۔‏ اب مَیں جانتا ہوں کہ تمام جنگوں کی پُشت پر شیطان ہے۔‏ مَیں اور گبرئیل اب ہم‌ایمان ہیں۔‏ ہم دوبارہ کبھی نہیں لڑیں گے!‏“‏

‏”‏خدا کا کلام زندہ اور مؤثر ہے“‏

ابرہام،‏ رابرٹ،‏ گبرئیل اور ڈینئل میں اتنی بڑی ڈرامائی تبدیلیاں کیوں واقع ہوئیں؟‏ وہ گہری نفرت اور غم کو اپنے دل سے نکالنے میں کیسے کامیاب ہوئے؟‏

ان سب نے خدا کے ”‏زندہ اور مؤثر“‏ کلام کی سچائی کو پڑھ کر پورے دل سے اُس پر غور کرنے کے بعد اسے قبول کِیا تھا۔‏ (‏عبرانیوں ۴:‏۱۲‏)‏ نوعِ‌انسان کا خالق ہی بائبل کا مصنف ہے جو سننے اور سیکھنے پر آمادہ شخص کے دل پر مثبت اثر ڈالنا جانتا ہے۔‏ ”‏ہر ایک صحیفہ جو خدا کے الہام سے ہے تعلیم اور الزام اور اصلاح اور راستبازی میں تربیت کرنے کے لئے فائدہ‌مند بھی ہے۔‏“‏ بائبل پڑھنے والا کوئی بھی شخص جب اسکی راہنمائی کو قبول کرتا ہے تو اُسے اقداروقواعد کا ایک نیا ضابطہ مل جاتا ہے۔‏ وہ معاملات کو یہوواہ کے نقطۂ‌نظر سے دیکھنے لگتا ہے۔‏ اس سے جنگی نقصان کی تلافی کے علاوہ اَور بھی کئی فائدے حاصل ہوتے ہیں۔‏—‏۲-‏تیمتھیس ۳:‏۱۶‏۔‏

خدا کا کلام واضح کرتا ہے کہ کسی قوم،‏ نسل یا طبقے کو کسی دوسرے پر فوقیت حاصل نہیں ہے۔‏ ”‏خدا کسی کا طرفدار نہیں۔‏ بلکہ ہر قوم میں جو اُس سے ڈرتا اور راستبازی کرتا ہے وہ اُسکو پسند آتا ہے۔‏“‏ جو شخص اس حقیقت کو تسلیم کر لیتا ہے اُس کی قومی یا نسلی نفرت کے احساسات پر قابو پانے میں مدد ہوتی ہے۔‏—‏اعمال ۱۰:‏۳۴،‏ ۳۵‏۔‏

بائبل کی پیشینگوئیوں سے یہ بات ظاہر ہوتی ہے کہ بہت جلد موجودہ انسانی حکمرانی کی جگہ خدا کی مسیحائی بادشاہت لے لیگی۔‏ اپنی اس آسمانی حکومت کے ذریعے خدا ”‏زمین کی انتہا تک جنگ موقوف کراتا ہے۔‏“‏ جنگ کو ہوا دینے والے ادارے بھی ختم کر دئے جائینگے جو لوگوں کو جنگ میں حصہ لینے کی تحریک دیتے ہیں۔‏ جنگ سے ہلاک ہونے والوں کو زندہ کر کے فردوسی زمین پر رہنے کا موقع بخشا جائیگا۔‏ پھر کسی کو بھی ظلم‌وستم سے ڈر کر بھاگنا نہیں پڑیگا۔‏—‏زبور ۴۶:‏۹؛‏ دانی‌ایل ۲:‏۴۴؛‏ اعمال ۲۴:‏۱۵‏۔‏

اُس وقت زمین پر زندہ لوگوں کی بابت بائبل بیان کرتی ہے:‏ ”‏وہ گھر بنائینگے اور اُن میں بسینگے۔‏ وہ تاکستان لگائینگے اور اُنکے میوے کھائینگے۔‏ نہ کہ وہ بنائیں اور دوسرا بسے۔‏ .‏ .‏ .‏ اُنکی محنت بےسُود نہ ہوگی اور اُنکی اولاد ناگہاں ہلاک نہ ہوگی۔‏“‏ اُس وقت ہر نقصان یا زخم کا ازالہ کر دیا جائیگا۔‏ ایسی اُمید پر ایمان رکھنا بتدریج ایک شخص کے دل سے رنج‌والم کو دُور کر دیتا ہے۔‏—‏یسعیاہ ۶۵:‏۲۱-‏۲۳‏۔‏

بائبل واقعی دل کی زوداثر دوا ہے۔‏ اسکی تعلیمات پہلے ہی سے جنگی نقصان کی تلافی کر رہی ہیں۔‏ سابقہ دُشمن عالمگیر برادری میں متحد ہو گئے ہیں۔‏ خدا کے نئے نظام میں اصلاح کا یہ سلسلہ اُس وقت تک چلتا رہیگا جب تک انسان کے دل سے نفرت‌وعناد اور رنج‌والم نہیں نکل جاتے۔‏ خالق کا وعدہ ہے کہ ”‏پہلی چیزوں کا پھر ذکر نہ ہوگا اور وہ خیال میں نہ آئینگی۔‏“‏—‏یسعیاہ ۶۵:‏۱۷‏۔‏

‏[‏فٹ‌نوٹ]‏

‏[‏صفحہ ۴ پر عبارت]‏

‏”‏مَیں نے بائبل کی مدد سے سمجھ لیا تھا کہ مَیں نے جنگ میں وقت ضائع کِیا تھا“‏

‏[‏صفحہ ۵ پر عبارت]‏

بائبل سابقہ دُشمنوں کے دلوں پر گہرا اثر کر سکتی ہے

‏[‏صفحہ ۶ پر عبارت]‏

نفرت‌وعناد رفتہ‌رفتہ اعتماد اور دوستی میں بدل گئے

‏[‏صفحہ ۶ پر عبارت]‏

بائبل پڑھنے والا کوئی بھی شخص جب اسکی راہنمائی کو قبول کرتا ہے تو اُسے اقداروقواعد کا ایک نیا ضابطہ مل جاتا ہے

‏[‏صفحہ ۷ پر تصویر]‏

سابقہ دُشمن اب عالمگیر برادری میں متحد ہو گئے ہیں

‏[‏صفحہ ۵ پر تصویر کا حوالہ]‏

Refugee camp: UN PHOTO 186811/​J. Isaac