بادشاہتی مُناد رپورٹ دیتے ہیں

لٹویا میں خوشخبری کی پذیرائی

بائبل کے مطابق خدا کی مرضی یہ ہے کہ ”‏سب آدمی نجات پائیں اور سچائی کی پہچان تک پہنچیں۔‏“‏ (‏۱-‏تیمتھیس ۲:‏۴‏)‏ کئی سالوں تک خوشخبری پر کان نہ دھرنے والے بہتیرے اشخاص اب اسے سننے کی طرف مائل ہیں!‏ مندرجہ‌ذیل تجربات سے ظاہر ہوتا ہے کہ دُنیا کے دیگر ممالک کی طرح لٹویا میں بھی مختلف عمروں اور پس‌منظر کے لوگ پیغام قبول کر رہے ہیں۔‏

‏• مشرقی لٹویا کے قصبے ریزکنی میں ایک ماں اور اس کی نوعمر بیٹی نے گلی میں ایک عورت سے کوئی پتا پوچھا۔‏ پتا بتانے کے بعد اس عورت نے جو یہوواہ کی ایک گواہ تھی انہیں گواہوں کے اجلاس پر حاضر ہونے کی دعوت دی۔‏

یہ ماں اور بیٹی دونوں مذہب سے لگاؤ رکھتی تھیں اس لئے انہوں نے اجلاس پر جانے کا فیصلہ کر لیا۔‏ راستے میں اُنہوں نے یہ طے کِیا کہ اگر انہیں وہاں کوئی نامناسب بات نظر آئی تو وہ فوراً وہاں سے چلی آئینگی۔‏ تاہم،‏ اجلاس اس قدر دلچسپ تھا کہ وہاں سے لوٹ آنے کا خیال بھی انکے ذہن میں نہ آیا۔‏ اُنہوں نے بائبل مطالعے کی پیشکش قبول کر لی اور اجلاسوں پر باقاعدہ حاضر ہونا شروع کر دیا۔‏ صرف تین ماہ میں،‏ اُنہوں نے منادی کے کام میں شمولیت اور بپتسمہ پانے کی خواہش کا اظہار کِیا۔‏

‏• مغربی لٹویا کے ایک شہر میں،‏ ایک گواہ ۸۵ سالہ اینا سے ملا جس نے حقیقی دلچسپی ظاہر کی اور بائبل مطالعے کی پیشکش قبول کر لی۔‏ اس کی بیٹی اور خاندان کے دیگر افراد نے اس کی سخت مخالفت کی۔‏ لیکن اینا نے اس مخالفت یا اپنے بڑھاپے اور خراب صحت کو اپنے بائبل مطالعے میں حائل ہونے کی اجازت نہ دی۔‏

ایک روز،‏ اینا نے اپنی بیٹی کو بتایا کہ وہ بپتسمہ لینے والی ہے۔‏ اینا کی بیٹی نے جواب دیا کہ ”‏اگر تم نے بپتسمہ لیا تو مَیں تمہیں نرسنگ ہوم میں ڈال دونگی۔‏“‏ تاہم،‏ اس دھمکی سے اینا بالکل بھی خوفزدہ نہ ہوئی۔‏ اس کی جسمانی حالت کی وجہ سے اسے اس کے گھر پر ہی بپتسمہ دیا گیا۔‏

اینا کی بیٹی نے اس سلسلے میں کیسا ردِعمل دکھایا؟‏ اُس نے اپنا ارادہ بدل دیا اور اپنی ماں کے بپتسمے کے بعد اس کیلئے ایک خاص کھانا تیار کِیا۔‏ اس نے اپنی ماں سے پوچھا کہ ”‏اب آپ بپتسمہ پانے کے بعد کیسا محسوس کر رہی ہیں؟‏“‏ اینا کا جواب؟‏ ”‏ایک نوزائیدہ بچے کی مانند!‏“‏

‏• دسمبر ۱۹۹۸ میں،‏ دو گواہ سابقہ سوویت یونین کے ریٹائرڈ آرمی افسر سے ملے۔‏ ایک خالق پر ایمان رکھنے کی وجہ سے اُس نے بائبل مطالعے کی پیشکش قبول کر لی اور بعدازاں اس کی بیوی نے بھی مطالعہ شروع کر دیا۔‏ اُنہوں نے تیزی سے ترقی کی اور جلد ہی غیربپتسمہ‌یافتہ پبلشر بن گئے۔‏ اگلے موسمِ‌گرما تک سابقہ افسر نے بپتسمہ لے لیا۔‏ اس جوڑے کی روحانی چیزوں سے محبت کلیسیا میں تمام افراد کیلئے حوصلہ‌افزا ثابت ہوئی ہے۔‏ علاوہ‌ازیں،‏ اُنہوں نے ایک مقامی رہائش‌گاہ کو ایک خوبصورت کنگڈم ہال بنانے میں بھی گرمجوشی سے حصہ لیا۔‏