دو عورتوں پر بیوگی کا اثر

سینڈرا آسٹریلیا میں رہنے والی ایک بیوہ ہے۔‏ کچھ سال پہلے اپنے شوہر کی وفات پر سینڈرا کو گہرا صدمہ پہنچا۔‏ وہ بیان کرتی ہے کہ ”‏اچانک اپنے ساتھی اور قریبی دوست سے محروم ہو جانے کے احساس نے مجھے غم سے نڈھال کر دیا۔‏ مجھے بالکل یاد نہیں کہ مَیں گھر واپس کیسے پہنچی اور دن‌بھر مَیں نے کیا کِیا۔‏ اگلے چند ہفتوں کے دوران میرے اندیشوں نے مستقل جسمانی تکلیف کی صورت اختیار کر لی۔‏“‏

سینڈرا سے عمر میں بڑی اُس کی ایک سہیلی ایلین تقریباً چھ سال سے بیوہ ہے۔‏ اُس کے شوہر نے کینسر کی وجہ سے وفات پائی تھی۔‏ تاہم،‏ ایلین نے اُس کی موت سے پہلے چھ ماہ تک اُس کی دل‌وجان سے خدمت کی تھی۔‏ اُس کا غم اسقدر شدید تھا کہ شوہر کی وفات کے بعد وہ عارضی طور پر نابینا ہو گئی۔‏ دو سال بعد،‏ ایک موقع پر تو وہ سرِعام بیہوش ہو گئی۔‏ مکمل معائنے کے باوجود اُس کے ڈاکٹر کو کسی بیماری کی کوئی علامت نہ مِل سکی۔‏ تاہم،‏ اُسے یہ پتہ چلا کہ ایلین نے اپنے غم کو دل میں دبا رکھا ہے،‏ لہٰذا اُس نے اسے گھر جا کر رونے کی کوشش کرنے کا مشورہ دیا۔‏ ایلین تسلیم کرتی ہے کہ ”‏مجھے اپنے غم پر قابو پانے میں کافی وقت لگا“‏ اور جب مَیں تنہا ہوتی تھی تو ”‏بیڈروم میں جا کر ڈیوڈ کے کپڑوں میں اپنا مُنہ چھپا لیا کرتی تھی۔‏“‏

جی‌ہاں،‏ عزیز ساتھی کی موت مختلف اثرات مرتب کر سکتی ہے کیونکہ بیوگی میں محض شوہر کے بغیر زندگی بسر کرنا ہی شامل نہیں ہوتا۔‏ مثال کے طور پر،‏ سینڈرا نے کچھ وقت کے لئے محسوس کِیا کہ اُس کے شوہر کے بغیر اُسکی تو کوئی شناخت ہی نہیں ہے۔‏ حال ہی میں اپنے شوہروں کی موت پر ماتم کرنے والی بہتیری بیواؤں کی طرح،‏ وہ بھی خود کو بہت کمزور اور غیرمحفوظ محسوس کرتی تھی۔‏ سینڈرا یاد کرتی ہے:‏ ”‏پہلے تمام اہم فیصلے میرا شوہر کِیا کرتا تھا لیکن اب اُس کی موت کے بعد سارے فیصلے مجھے تنہا ہی کرنے تھے۔‏ اس سے میری نیند بھی خاصی متاثر ہوئی۔‏ مَیں ہمیشہ تھکی تھکی سی رہنے لگی۔‏ میری سمجھ میں کچھ نہیں آ رہا تھا کہ مَیں کیا کروں۔‏“‏

سینڈرا اور ایلین کی طرح کی کہانیاں ہر روز دہرائی جاتی ہیں۔‏ بیماریاں،‏ حادثات،‏ جنگیں،‏ نسل‌کُشی اور تشدد کی وجہ سے بیواؤں کی تعداد میں تیزی سے اضافہ ہوتا جا رہا ہے۔‏ * ان میں سے بہتیری عورتیں حالات کا مقابلہ کرنا نہیں جانتی اور نہ ہی وہ اپنے دُکھ کا اظہار کر پاتی ہیں۔‏ اس سلسلے میں دوست اور رشتہ‌دار بیواؤں کی مدد کیسے کر سکتے ہیں؟‏ اگلا مضمون کچھ مفید تجاویز پیش کرتا ہے۔‏

‏[‏فٹ‌نوٹ]‏