سوالات از قارئین

کیا کنواری مریم کی ناکاملیت نے یسوع کے استقرارِحمل پر منفی اثر ڈالا تھا؟‏

‏”‏یسوؔع .‏ .‏ .‏ کی پیدایش“‏ کے متعلق الہامی ریکارڈ بیان کرتا ہے:‏ ”‏جب اُس کی ماں مرؔیم کی منگنی یوؔسف کے ساتھ ہو گئی تو اُن کے اکٹھے ہونے سے پہلے وہ رُوح‌اُلقدس کی قدرت سے حاملہ پائی گئی۔‏“‏ (‏متی ۱:‏۱۸‏)‏ واقعی،‏ خدا کی روح‌القدس نے مریم کے حمل کے سلسلے میں نہایت اہم کردار ادا کِیا تھا۔‏

تاہم،‏ مریم کی بابت کیا ہے؟‏ کیا مریم کا تولیدی خلیہ یا بیضہ اس کے حمل میں کوئی عمل‌دخل رکھتا تھا؟‏ مریم کے آباؤاجداد—‏ابرہام،‏ اضحاق،‏ یعقوب،‏ یہوداہ اور بادشاہ داؤد سے کئے گئے خدا کے وعدوں کے مطابق،‏ پیدا ہونے والے بچے کو اُن کی حقیقی نسل ہونا تھا۔‏ (‏پیدایش ۲۲:‏۱۸؛‏ ۲۶:‏۲۴؛‏ ۲۸:‏۱۰-‏۱۴؛‏ ۴۹:‏۱۰؛‏ ۲-‏سموئیل ۷:‏۱۶‏)‏ بصورتِ‌دیگر مریم سے پیدا ہونے والا بچہ ان الہٰی وعدوں کا جائز وارث کیسے ہو سکتا تھا؟‏ اسے مریم کا حقیقی بیٹا ہونا تھا۔‏—‏لوقا ۳:‏۲۳-‏۳۴‏۔‏

یہوواہ کا فرشتہ کنواری مریم پر اس پیغام کے ساتھ ظاہر ہوا:‏ ”‏خوف نہ کر کیونکہ خدا کی طرف سے تجھ پر فضل ہوا ہے۔‏ اور دیکھ تو حاملہ ہوگی اور تیرے بیٹا ہوگا۔‏ اُس کا نام یسوؔع رکھنا۔‏“‏ (‏لوقا ۱:‏۳۰،‏ ۳۱‏)‏ استقرارِحمل اِس بات تقاضا کرتا ہے کہ بیضہ بارور ہو۔‏ پس صاف ظاہر ہے کہ جب یہوواہ خدا نے اپنے اکلوتے بیٹے کی زندگی کو روحانی عالم سے زمین پر منتقل کِیا تو مریم کے رحم میں ایک بیضہ بارور ہوا۔‏—‏گلتیوں ۴:‏۴‏۔‏

کیا ناکامل عورت کے رحم میں پرورش پانے والا ایک بچہ اپنے طبیعی جسم میں کامل اور گناہ سے پاک ہو سکتا ہے؟‏ کاملیت اور ناکاملیت کا امتزاج توارثی قوانین کو کیسے متوازن رکھتا ہے؟‏ یاد رکھیں کہ خدا کے بیٹے کی کامل زندگی کی منتقلی اور استقرارِحمل روح‌القدس کی مدد سے قرار پایا تھا۔‏ اس نے مریم کے بیضہ کی ہر طرح کی ناکاملیت کو کالعدم کرکے ایسی توارثی خصوصیت پیدا کر دی جو اپنے آغاز ہی سے کامل تھی۔‏

بہرکیف،‏ ہم یقین رکھ سکتے ہیں کہ اُس وقت خدا کی پاک روح کی کارفرمائی نے اُسکے مقصد کی کامیابی کی ضمانت دی تھی۔‏ جبرائیل فرشتے نے مریم کے سامنے بیان کِیا تھا:‏ ”‏رُوح‌اُلقدس تجھ پر نازل ہوگا اور خداتعالےٰ کی قدرت تجھ پر سایہ ڈالیگی اور اِس سبب سے وہ مولودِمُقدس خدا کا بیٹا کہلائیگا۔‏“‏ (‏لوقا ۱:‏۳۵‏)‏ جی‌ہاں،‏ خدا کی روح‌القدس نے گویا تحفظ کی دیوار کھڑی کر دی تھی تاکہ کوئی ناکاملیت یا نقصاندہ قوت استقرارِحمل کے بعد بڑھنے والے جنین کو داغدار نہ بنا سکے۔‏

بِلاشُبہ،‏ یسوع کی کامل انسانی زندگی کا انسان کی بجائے اُس کا آسمانی باپ ذمہ‌دار تھا۔‏ یہوواہ نے اس کے لئے ”‏ایک بدن تیار“‏ کِیا اور یسوع—‏استقرارِحمل کے وقت سے لیکر—‏واقعی ”‏بیداغ .‏ .‏ .‏ اور گنہگاروں سے جدا“‏ تھا۔‏—‏عبرانیوں ۷:‏۲۶؛‏ ۱۰:‏۵‏۔‏

‏[‏صفحہ ۱۹ پر تصویر]‏

‏”‏تُو حاملہ ہوگی اور تیرے بیٹا ہوگا“‏