بادشاہتی مُناد رپورٹ دیتے ہیں

ایک غیرمتوقع جگہ پر سچائی پانا

خدا چاہتا ہے کہ ”‏سب آدمی نجات پائیں اور سچائی کی پہچان تک پہنچیں۔‏“‏ (‏۱-‏تیمتھیس ۲:‏۳،‏ ۴‏)‏ اس مقصد کے تحت یہوواہ کے گواہوں نے بائبل اور بائبل کی امدادی کتابوں کی لاکھوں کاپیاں شائع اور تقسیم کی ہیں۔‏ بعض‌اوقات،‏ ان مطبوعات نے غیرمتوقع طریقوں سے خلوصدل اشخاص کو سچائی سیکھنے میں مدد دی ہے۔‏ اس سلسلے میں فریٹاؤن،‏ سیرالیون کے بادشاہتی مُناد مندرجہ‌ذیل تجربہ بیان کرتے ہیں۔‏

ایک لڑکا نو بچوں کے خاندان میں دوسرا بیٹا تھا۔‏ ایک مذہبی گھرانے میں پرورش پانے کے دوران وہ اپنے باپ کیساتھ باقاعدگی سے پرستش کیلئے جایا کرتا تھا۔‏ تاہم،‏ دوزخ کی بابت اپنے مذہب کی تعلیم سے وہ بہت پریشان تھا۔‏ ایک مشفقانہ خدا کا بدکار لوگوں کو آگ میں جلا کر اذیت دینا اُسکی سمجھ سے باہر تھا۔‏ آتشی دوزخ کے عقیدہ کو سمجھنے میں مدد کرنے والی تمام وضاحیتیں بھی اُسے ذہنی سکون نہ بخش سکیں۔‏

جب وہ ۲۰ سال کا ہوا تو ایک دن اُسے کوڑےکرکٹ کے ڈبے میں پڑی ایک نیلی کتاب دکھائی دی۔‏ کتابوں کا شوق رکھنے کے باعث اُس نے اسے اُٹھایا،‏ صاف کِیا اور اسکے عنوان پر غور کِیا—‏سچائی جو باعثِ‌ابدی زندگی ہے۔‏ *

اُس نے سوچا،‏ ’‏یہ کونسی سچائی ہے؟‏‘‏ اُس کی دلچسپی بڑھی اور وہ اسے گھر لے گیا اور فوراً سے پوری کتاب پڑھ ڈالی۔‏ وہ یہ جان کر اسقدر خوش ہوا کہ خدا کا ذاتی نام یہوواہ ہے!‏ (‏زبور ۸۳:‏۱۸‏)‏ اُس نے یہ بھی سیکھ لیا کہ خدا کی سب سے بڑی خوبی محبت ہے اور لوگوں کو آگ میں جلانے کا خیال بھی اُس کیلئے نفرت‌انگیز ہے۔‏ (‏یرمیاہ ۳۲:‏۳۵؛‏ ۱-‏یوحنا ۴:‏۸‏)‏ آخر میں اُس نے پڑھا کہ یہوواہ بہت جلد زمین کو فردوس بنا دیگا جہاں لوگ ہمیشہ زندہ رہینگے۔‏ (‏زبور ۳۷:‏۲۹؛‏ مکاشفہ ۲۱:‏۳،‏ ۴‏)‏ ایک مہربان،‏ پُرمحبت خدا کی طرف سے کیا ہی شاندار سچائی!‏ اُس نے ایک نہایت غیرمتوقع جگہ سے سچائی حاصل کرنے کے لئے یہوواہ کا دلی شکر کِیا۔‏

کچھ دنوں بعد،‏ اُس نے بعض دوستوں کی مدد سے یہوواہ کے گواہوں کے کنگڈم ہال کا پتہ لگایا اور پہلی بار اجلاس پر حاضر ہوا۔‏ وہاں پر اُس نے ایک گواہ کیساتھ بائبل مطالعہ کرنے کی درخواست کی۔‏ شدید خاندانی مخالفت کے باوجود اُس نے روحانی ترقی جاری رکھی اور بپتسمہ لے لیا۔‏ (‏متی ۱۰:‏۳۶‏)‏ آج وہ کلیسیا میں ایک بزرگ کے طور پر خدمت کرتا ہے۔‏ کسقدر حیرانی کی بات ہے کہ کوڑےکرکٹ کے ڈبے سے ملنے والی بائبل پر مبنی اشاعت کی وجہ سے یہ سب کچھ واقع ہوا!‏

‏[‏فٹ‌نوٹ]‏