‏’‏وہ تہ میں چلے گئے‘‏

‏”‏گہرے پانی نے اُنکو چھپا لیا۔‏ وہ پتھر کی مانند تہ میں چلے گئے۔‏“‏

موسیٰ اور اسرائیلیوں نے بحرِقلزم پار کرنے اور اپنے تعاقب کرنے والے مصری دُشمن—‏فرعون اور اُس کی فوجوں کے غرقاب ہونے پر ان الفاظ کے ساتھ خوشی کا گیت گایا۔‏—‏خروج ۱۵:‏۴،‏ ۵‏۔‏

وہ حیرت‌انگیز واقعہ عینی‌شاہدوں کے لئے ایک واضح سبق تھا۔‏ کوئی بھی شخص یہوواہ کو چیلنج کرنے میں کامیاب نہیں ہو سکتا اور نہ اُس کے اختیار کی مخالفت کرکے زندہ رہ سکتا ہے۔‏ تاہم کچھ ہی مہینوں بعد اسرائیلی سرداروں—‏قورح،‏ داتن،‏ ابیرام اور اُن کے ۲۵۰ ساتھیوں—‏نے موسیٰ اور ہارون کے خداداد اختیار کی علانیہ مخالفت شروع کر دی۔‏—‏گنتی ۱۶:‏۱-‏۳‏۔‏

یہوواہ کی ہدایت پر،‏ موسیٰ نے اسرائیلیوں کو ان باغیوں کے خیموں سے دُور ہٹ جانے کیلئے کہا۔‏ داتن،‏ ابیرام اور انکے خاندان ہٹ‌دھرمی سے اپنی روش پر قائم رہے۔‏ ایسی صورتحال میں موسیٰ نے کہا کہ یہوواہ اپنے طریقے سے ان لوگوں پر یہ واضح کرے گا کہ ان اشخاص نے ”‏[‏یہوواہ]‏ کی تحقیر کی ہے۔‏“‏ اُس وقت یہوواہ نے اُن کے پاؤں تلے کی زمین کا مُنہ کھول دیا۔‏ ”‏سو وہ اور اُنکا سارا گھربار جیتےجی پاتال میں سما گئے اور زمین اُن کے اُوپر برابر ہو گئی۔‏“‏ قورح اور دیگر باغیوں کے ساتھ کیا واقع ہوا؟‏ ”‏[‏یہوواہ]‏ کے حضور سے آگ نکلی اور اُن ڈھائی سو آدمیوں کو جنہوں نے بخور گذرانا تھا بھسم کر ڈالا۔‏“‏—‏گنتی ۱۶:‏۲۳-‏۳۵؛‏ ۲۶:‏۱۰‏۔‏

فرعون اور اُسکے لشکروں کے علاوہ،‏ بیابان میں اُن باغیوں کو بھی نیست‌ونابود کر دیا گیا جو یہوواہ کے اختیار اور اپنے لوگوں کے معاملات میں اُس کی دلچسپی کی قدر کرنے میں ناکام رہے تھے۔‏ پس ان بُرے ایّام میں یہوواہ کے تحفظ کے خواہاں اشخاص کیلئے ”‏حق‌تعالیٰ“‏ اور ”‏قادرِمطلق“‏ کے طور پر یہوواہ کی بابت سیکھنا اور اُس کی فرمانبرداری کرنا نہایت ضروری ہے۔‏ ایسا کرنے سے وہ یہوواہ کے تسلی‌بخش الفاظ سے تقویت حاصل کر سکتے ہیں:‏ ”‏تیرے آس‌پاس ایک ہزار گر جائیں گے اور تیرے دہنے ہاتھ کی طرف دس ہزار لیکن وہ تیرے نزدیک نہ آئے گی۔‏ لیکن تُو اپنی آنکھوں سے نگاہ کرے گا اور شریروں کے انجام کو دیکھے گا۔‏ پر تُو اَے [‏یہوواہ]‏!‏ میری پناہ ہے!‏ تُو نے حق‌تعالیٰ کو اپنا مسکن بنا لیا ہے۔‏“‏—‏زبور ۹۱:‏۱،‏ ۷-‏۹‏۔‏