فریب کھانے سے بچیں

فریب کی ابتدا تقریباً انسانی تاریخ کے ساتھ ہی ہو گئی تھی۔‏ رقم‌شدہ تاریخ کے ابتدائی واقعات میں سے ایک کا تعلق فریب سے ہے۔‏ یہ اُس وقت پیش آیا جب شیطان نے حوا کو باغِ‌عدن میں فریب دیا تھا۔‏—‏پیدایش ۳:‏۱۳؛‏ ۱-‏تیمتھیس ۲:‏۱۴‏۔‏

اگرچہ ہمیشہ ہی سے زمین پر فریب ہوتا رہا ہے توبھی زمانۂ‌جدید میں اس میں خاص طور پر اضافہ ہوا ہے۔‏ بائبل نے زمانۂ‌حال کی بابت آگاہی دی تھی:‏ ”‏بُرے اور دھوکاباز آدمی فریب دیتے اور فریب کھاتے ہوئے بگڑتے چلے جائینگے۔‏“‏—‏۲-‏تیمتھیس ۳:‏۱۳‏۔‏

لوگ مختلف وجوہات کی بِنا پر فریب کھاتے ہیں۔‏ دھوکےباز اور وعدہ خلافی کرنے والے اشخاص پیسوں کی خاطر لوگوں کو اپنا نشانہ بناتے ہیں۔‏ کچھ سیاستدان ہر قیمت پر حکومت میں رہنے کیلئے انتخابی حلقے کے نمائندوں کو فریب دیتے ہیں۔‏ لوگ تو اپنے آپ کو بھی دھوکا دیتے ہیں۔‏ ناخوشگوار سچائیوں کا سامنا کرنے کی بجائے وہ خود کو تسلی دیتے ہیں کہ سگریٹ‌نوشی،‏ منشیات کے غلط استعمال یا جنسی بداخلاقی جیسے خطرناک کام کرنے میں کوئی بُرائی نہیں۔‏

مذہبی معاملات میں بھی فریب شامل ہوتا ہے۔‏ یسوع کے زمانہ کے مذہبی پیشوا لوگوں کو فریب دیا کرتے تھے۔‏ یسوع نے ان فریبیوں کی بابت بیان کِیا:‏ ”‏وہ اندھے راہ بتانے والے ہیں اور اگر اندھے کو اندھا راہ بتائیگا تو دونوں گڑھے میں گرینگے۔‏“‏ (‏متی ۱۵:‏۱۴‏)‏ علاوہ‌ازیں،‏ لوگ مذہبی معاملات میں خود کو فریب دیتے ہیں۔‏ امثال ۱۴:‏۱۲ بیان کرتی ہے:‏ ”‏ایسی راہ بھی ہے جو انسان کو سیدھی معلوم ہوتی ہے پر اُسکی انتہا میں موت کی راہیں ہیں۔‏“‏

کچھ عجب نہیں کہ یسوع کے زمانہ کی طرح آجکل بھی بہتیرے لوگ مذہبی معاملات میں فریب کھاتے ہیں!‏ پولس رسول نے کہا کہ شیطان نے ”‏[‏بےایمانوں کو]‏ اندھا کر دیا ہے تاکہ مسیح جو خدا کی صورت ہے اُسکے جلال کی خوشخبری کی روشنی اُن پر نہ پڑے۔‏“‏—‏۲-‏کرنتھیوں ۴:‏۴‏۔‏

اگر ہم ایک مال بٹورنے والے کے فریب کا شکار ہو جاتے ہیں تو ہمیں مالی نقصان ہوتا ہے۔‏ اگر کوئی سیاستدان ہمیں فریب دے تو ہم نتیجتاً کسی حد تک اپنی آزادی کھو سکتے ہیں۔‏ لیکن شیطان کے فریب میں آکر یسوع مسیح کی بابت سچائی کو رد کرنے سے ہم ہمیشہ کی زندگی کھو دیتے ہیں!‏ پس فریب کھانے سے بچیں۔‏ غیرجانبداری سے مذہبی سچائی کے قابلِ‌اعتماد ذریعے،‏ بائبل پر غوروخوض کریں۔‏ ایسا کرنے میں ناکام رہنے سے ہم بہت کچھ کھو سکتے ہیں۔‏—‏یوحنا ۱۷:‏۳‏۔‏