سوالات از قارئین
سوالات از قارئین
مُردوں کیلئے بپتسمہ لینے سے کیا مُراد ہے؟
آسمانی قیامت کے بارے میں پولس رسول نے ایک دلچسپ حوالے کا ذکر کرتے ہوئے کہا: ”جو لوگ مُردوں کیلئے بپتسمہ لیتے ہیں وہ کیا کرینگے؟ اگر مُردے جی اُٹھتے ہی نہیں تو پھر کیوں اُنکے لئے بپتسمہ لیتے ہیں؟“ اسی طرح کیتھولک ورشن بھی بیان کرتی ہے: ”جو مُردوں کیلئے بپتسمہ پاتے ہیں وہ کیا کرینگے؟ اگر مُردے نہیں جی اُٹھتے تو کیوں اُنکے لئے بپتسمہ پاتے ہیں؟“—۱-کرنتھیوں ۱۵:۲۹۔
کیا یہاں پولس رسول ہمیں یہ بتا رہا ہے کہ زندہ لوگوں کو اُن مُردہ لوگوں کیلئے بپتسمہ لینا چاہئے جو بپتسمہ لینے کے بغیر ہی مر گئے ہیں؟ بعض بائبل ترجمے شاید ایسا خیال پیش کرتے ہوں۔ تاہم، اگر ہم بائبل کے دیگر حوالوں اور یونانی الفاظ کے معنوں پر غور کریں تو ہم اس صحیفے کا صحیح مطلب سمجھ سکتے ہیں۔ پولس رسول کا مطلب یہ تھا کہ ممسوح مسیحیوں کو بپتسمہ لینے کے بعد بھی یسوع مسیح کی طرح اپنی موت تک وفادار رہنا چاہئے۔ اگر وہ ایسا کرینگے تو اُنکو روح کے طور پر آسمان میں زندگی دی جائیگی۔
اِس بات کا ثبوت ہمیں بائبل سے ملتا ہے۔ پولس نے یوں لکھا: ”کیا تُم نہیں جانتے کہ ہم جتنوں نے مسیح یسوؔع میں شامل ہونے کا بپتسمہ لیا تو اُسکی موت میں شامل ہونے کا بپتسمہ لیا؟“ (رومیوں ۶:۳) ایک اَور موقع پر بھی پولس نے اپنی بابت بیان کِیا: ”مَیں . . . [مسیح] کیساتھ دُکھوں میں شریک ہونے کو معلوم کروں اور اُسکی موت سے مشابہت پیدا کروں۔ تاکہ کسی طرح مُردوں میں سے جی اُٹھنے کے درجہ تک پہنچوں۔“ (فلپیوں ۳:۱۰، ۱۱) پولس رسول یہاں ممسوح مسیحیوں کی بات کر رہا تھا جنہیں دُکھوں کو برداشت کرنا اور مشکلات میں وفادار رہنا تھا تاکہ وہ آسمانی قیامت حاصل کر سکیں۔
اس بات پر غور کرنا اہم ہے کہ جب بھی بائبل بپتسمہیافتہ کے حوالے سے موت کا ذکر کرتی ہے تو یہ زندہ اشخاص کے بپتسمے کی طرف اشارہ کرتی ہے۔ پولس نے ساتھی ممسوح مسیحیوں کو یوں لکھا: ”[تم] اُسی کیساتھ بپتسمہ میں دفن ہوئے اور اس میں خدا کی قوت پر ایمان لا کر جس نے اُسے مُردوں میں سے جلایا اُسکے ساتھ جی بھی اُٹھے۔“—کلسیوں ۲:۱۲۔
پولس نے ۱-کرنتھیوں ۱۵:۲۹ میں یونانی لفظ ہائپر استعمال کِیا ہے۔ جسکا ترجمہ اکثر ”کیلئے“ کِیا جاتا ہے۔ لیکن اسکا ترجمہ ”کے مقصد سے“ بھی کِیا جا سکتا ہے۔ اسلئے بائبل کے باقی حوالہجات کو مدِنظر رکھتے ہوئے نیو ورلڈ ٹرانسلیشن نے ۱-کرنتھیوں ۱۵:۲۹ کو یوں بیان کِیا: ”وہ لوگ کیا کرینگے جو مرنے کے مقصد سے بپتسمہ لیتے ہیں؟ اگر مُردے جی اُٹھتے ہی نہیں تو پھر تم کیوں مرنے کے مقصد سے بپتسمہ لیتے ہو؟“