عنقریب جُرم سے پاک دُنیا

ذرا جُرم سے پاک دُنیا کا تصور کریں!‏ وہاں پولیس،‏ جیلوں یا مہنگے اور پیچیدہ عدالتی نظاموں کی کوئی ضرورت نہیں ہوگی۔‏ یہ ایک ایسی دُنیا ہوگی جہاں ہر انسان دوسرے انسان کی زندگی اور جائیداد کا احترام کریگا۔‏ کیا یہ سب ناقابلِ‌یقین نہیں لگتا؟‏ شاید آپ ایسا سوچیں مگر اسی حیران‌کُن تبدیلی کا بائبل وعدہ کرتی ہے۔‏ کیوں نہ اس زمین پر جُرم اور بدکاری کے سلسلے میں پیشینگوئی کرنے والے صحائف پر غور کریں؟‏

زبور کی کتاب میں ہم پڑھتے ہیں:‏ ”‏تُو بدکرداروں کے سبب سے بیزار نہ ہو اور بدی کرنے والوں پر رشک نہ کر۔‏ کیونکہ وہ گھاس کی طرح جلد کاٹ ڈالے جائینگے اور سبزہ کی طرح مُرجھا جائینگے۔‏ لیکن حلیم مُلک کے وارث ہونگے اور سلامتی کی فراوانی سے شادمان رہینگے۔‏“‏ (‏زبور ۳۷:‏۱،‏ ۲،‏ ۱۱‏)‏ واقعی،‏ خدا کو اس وعدے اور اُسکے دیگر تمام دل کو گرما دینے والے وعدوں کو پورا کرنے سے کوئی نہیں روک سکتا۔‏

خدا اپنی بادشاہت کے ذریعے یہ برکات لائیگا۔‏ دُعائےخداوندی میں،‏ یسوع مسیح نے اپنے پیروکاروں کو اس بادشاہی کے آنے اور خدا کی مرضی ”‏جیسی آسمان پر پوری ہوتی ہے زمین پر بھی“‏ پوری ہونے کی بابت دُعا کرنا سکھایا تھا۔‏ (‏متی ۶:‏۹،‏ ۱۰‏)‏ جلد ہی اُس بادشاہت کے تحت،‏ زمین پر کوئی بھی شخص غربت،‏ استبداد یا خودغرضی کی وجہ سے جُرم کی طرف مائل نہیں ہوگا۔‏ اسکی بجائے،‏ خدا کا کلام بیان کرتا ہے:‏ ”‏زمین میں پہاڑوں کی چوٹیوں پر اناج کی افراط ہوگی۔‏“‏ (‏زبور ۷۲:‏۱۶‏)‏ یقیناً،‏ یہوواہ خدا زمین کے سب باشندوں کیلئے اچھی چیزیں افراط سے مہیا کریگا۔‏ سب سے بڑھ کر،‏ انسانی معاشرہ خدا اور پڑوسی کیلئے محبت سے معمور ہوگا اور دُنیا پھر کبھی جُرم سے پریشان نہ ہوگی۔‏